Kan Lei, Tongkam

Kan Lei & Tongkam ( Jeim.3:1-10 )

            James cakuat sung ahhin kan lei thuhla a ngan lang nasa ih zumtu leh zumlotu khal in

Kan lei hi minung sinak ah a uk theitu ngaingai kan um lo. Lei tileh tong timi hi a bang aw lo nan kan lei hi kan tongsuan theinak hrampi a si bang tuk in then  lo in kan rel kop mai pei.

1.      Ziang vek minung kan si ti lang tertu a si. Matt.12:34

Kaa cun thinlung sungih a ummi a ṭong a si.

Jesuh in a simmi cu kaa cun minung kan thinlung sung ih a ummi hi a tong suak a ti. Ziangvek thinlung kan nei, kan thinlung put ziang vek a si ti a lang suahnak pakhat cu kan kaa ihsin a suakmi tongkam in a si. Kan

tongkam hin kan thinlung mizia a phonglang theh tinak cu a si lo. Thinlung se zet khal tongkam nem ngaingai cu an um ve ko. Asinan a tlangpi thu in kan tongkam um dan in mi pakhat khi  mizia tawkfang nawn cu kan theithei. Kan tongkam hin kan mizia hmuahhmuah a pho lang thluh thei lo nan tampi cu a lang ter ve a si.

2.      Thilti theinak a nei. Thuf.15:1

Awkaa neem ih thulehnak in thinhengnak a daiter; Asinain ṭong hrang in thinhengnak a suahter sin.

Kan tongkam hi a thupit zia cu mi pakhat mithli tla ter theitu leh lungawi ter theitu a si. Kan tongkam hin mi dang hi nuam zet ih a um ter thei bang tuk in thinhar ih tuah theitu khal a si. Sum  leh pai, thil leh ri tha mi kan pek lawng inmi lung a awi ter cuanglo ih kan tongkam te khal hin mi nunnak ah lungawinak a thlen thei a si. Tongkam ruangah mi an that aw thei, tongkam ruangah mi ngan ngaih aw thei, an nel aw thei, tongkam ruangah sungkhat an then aw thei ih tongkam ruangah a thenawmi khal an rem aw sal thei. cu tluk ih thil ti thei hi kan lei/ tongkam a si.

3.      San tawinak leh san saunak a um. Saam 34:12-14

Leilung tlunah hin nuam zetih nun nan duh maw? Nun sau le lungawi nan duh maw? Nan duh a sile a ṭha lomi ṭong lo dingah le Thuphan sim lo dingah ralring uh.

Lei tlun ah mi nunsau, dam sau pawl an kawm ( interview ) tikah an nunsaunak san an rel theu mi cu an ei in ruangah maw, cin leh dan an neih that tuk ruangah maw hi a si theu. Zo hman in ka tongkam ruangah kan nunsau ti ih rel hi an um lem lo. Saam sungih kan hmuh vek in kan tongkam hin kan nunsau ding leh tawi ding tiang hin sullam a rak nei ban zia kan hmu thei a si.

4.      Nomnak leh can tha kanneih theinak a si. 1 Pit.3:10

Ca Thianghlim sungah, “Nunnom a duhtu le caan ṭha a duhtu cun ṭongsia ih ṭong sup sehla thuphan per nawn hlah seh.

Nomnak hi kan hawl cio mi leh kan duh ciomi a si ih cui nomnak kan hawl dan cu a bang aw cio lo. Sum leh pai in maw, ei leh in in maw, inn tha  lo tha in maw, nunau mipatnak in si maw, zu le sa cennak in si maw a si theu. Asinan kan tongkam ahhin kan nomnak ding hi a rak thum aw ve ih can tha kan conak ding khal kan tongkam aha rak um ve a si.

Thuf.21:23 A lei le a kaa a kil theitu cu harnak in a luat ding.

5.      Biaknaklamih kan teimaknak umzia nei tertu a si. Jeim 1:26

Biaknak lamah ka taima a si a titu nan um maw? Nan hmurka nan uk thei lo ahcun nan zumnak parih nan taimaknak cu santlai lo a si ih nanmah le nanmah a bum awtu nan si.

Jeim sungih kan hmuh theimi cu ziang ti vek in biaknak lam ah mi teima si khal nungna kan lei kan kil thei lo a si ahcun kan teimaknak thu zianghman santlai lo men a si. Curuangah Pathian in kan lei/ kan tongkam hi ziang tluk in a ngai thupi tihi cu kan thei thei. Vei tamtak cu uluk lemlo in kan duhduh kan tong suaiso theu ih mi dang hrangah ngai nuam lo, thil tha lo a si pei maw ti khal ruat lo men in kan um theu. Kan tongkam hi kan kan ruahnak hnakin Pathian in a rak ngai thupi zet tihi kan hngilh lo kei uh.

6.      Pathian hnenah hlan theu aw. Saam.141:3

Maw Bawipa, ka kaa ah kiltu re awla, Ka hmur ih saangka ah vengtu re hram aw.

Jeim sungih kan hmuh bang tukin mi zo khal mai duh thusam bang tuk ih kan lei kilkhawi theih leh uk thei kan um lo. Minung sinak mai cun kan kilkhawi cawk lo. Curuangah Saam hla ngantu in a ti bang in Pathian hnen ah hlan ringring a tul. Pathian thawn cun kan mahte ih kan neh theilo mi hi kan neh thei a si. Zohman ih uk theih lo a si ti ruangah ah kan tongkam hi thlahdah ding a si hrimhrim lo, kan uk thei lo ti kan theih hinPathian hnenah hlan sawn ding kan si. Ni khat sung ih kan tongkam hmanmi hi ruat sal theu uh si.