Aw! Bible

Aw! Bible

2 Tim. 3:16 Ca Thianghlim hmuahhmuah hi Pathian ih thawkhummi a si ih thutak zirhnak, zirhsual simhrinnak, a sualmi remsaalnak ah le dingteih nitin nunnak ih zirh awknak ah a ṭha.

            Zumtu pawl kan thumawknak, kan kaihhruai awknak, Kan zirhawknak le ziangkim ih kan thumawknak hrampi a si mi cu Bible a si.Zumtu le Bible cu a hlat aw thei lo, zumtu umnak ah Bible  hi a um lo thei lo.Zumtu le Bible a hlat awk a si ah cun tluk hram a thok ti nak a si.Zumtu hrangah
cun Bible hi kan ro sunglawi a si.Zum lo tui’ hrangah a tangkai lo ti si sawn lo in zumtu thawn cun a hlat aw thei lo lawlaw ti lam sawn lang ter duhnak sawn a si. Hi tluk a sunglawimi Bible thu thawn thangzang la tlang seh la.

1.      Thawkkhum a si.

            Thawkkhum ti cu a tawizawng inkan rel a si le Pathian hnen ihsin a rami a si, minung hnenin a ra mi a si lo. Mi thenkhat in Bible hi a ngantu minung an sisi ti tahrat ih ngainepnak ih hmang an um thei. Minung ih ngan cu a si ko el ding a um lo, sikhal sehla an mai thu in, an mai palung suak in an ngan mi a si lo. Pathian ih fialnak vekih ngan an si sawn.Curuangah Bible ih a manneihnak hi a ngantui’ sinak lam ah a thum aw lo ih ngantertui’ lam ah a thum aw sawn.A ngantu pawl hi sinak bang aw lo taktak, hnatuan bang aw lo taktak an si.Dinhmun sang le niam an um nan an nganmi thu cu mi hnenih hmual a neih dan a bang aw.Ziangah ti a si len an zaten Pathian hnen ihsin thusuakmi an ngan cio ruangah a si. 

            Bible hi a ngan sung tla  a rei nasa, kum 1600 sung hrawng rei ih ruah a si. Asinan hlanlai nganmi cu a khuahlan ( Out ) tuk, san a man nawn lo ti vek a um lo, ne ta bik nganmi thawn tuisan minung hrangah a tangkai dan a bang aw theh. Hlanlai hrangih a tangkai dan, tui san ih a tangkai dan le hmailam khal ah a tangkai dan cu a bang aw ringring. Cucu Bible ih mak ve nak pakhat a si ih  himi hin minung ih palung suak ih ngan men a si lo ti khal a lang ter nasa.

2.      Bible Thuneihnak

            Zumtu kan nunnak ih thuneitu sang bik ih kan ret dingmi cu Bible a si. Kan nun dan thumawknak hrampi bik ding a si. Bible hi kan duh dan ih mer ding a si lo ih Bible sawn in kan nun in mer ding a si sawn. Kan nun in kai hruaitu dingah le kan nun fingkhawi awknak dingah Bible hi tahfung ih hman ding a si. Bible in a kham maw, Bible in a fial maw tihi kan thumawknak a si a tul.

            Bible hi thuneibik ih kan retnak zawn ah kan fimkhur a tul theu mi cu kap hnih ih thlir tel hi a si. Cu mi umzia cu Bible in a siang maw, a fial maw? ti kan zoh rualrual in Bible in a kham maw? Ti lam khal kan zoh a tul. Tui’ san ih kan tuahmi pawl hi a cekci in Bible ah a lang lo mi a um. A fial lo mi uartuk khal a tha lo ih a kham lo mi do tuk khal a tha cuang lo. Curuangah hi kaphnih thlirnak kan neih lo a si len Bible ah a um lo ti zawng in thiltha dokalh a awl te. Cun Bible in a khamlo pi ti lam lawng uartuk khal le thiltha si hmang ti in Pathian lung tong lo a awl te thotho.

a.       Bible in ti uh, tuah uh a timi ah a tel maw?

b.      Bible in ti hlah uh, Tuah hlah uh a timi ah a tel maw?

Tihi kan zoh kop a tul.

3.      Bible Hnatuan ( 7 C )

a.      Sual theih ter ( It convicts )

      Bible hin Pathian hmai ah misual kan si zia, kan thatlo zia, kan ten um zia pawl in theih ter. Bible siar dah lo tu in mi tha emem in an thei aw theu ih Bible siar tam pawl cun Pathian hmaiah mitha zohman an um lo a timi thu ah kei cu misual ka si tiah an thatlonak a theih ter.

b.      Mi a thleng danglam ( It Converts )

      Nu le pa thusim theih lo, misual, mi ih beidon zo mi khal mi tha emem ih thleng danglam theitu cu Bible a si. River timi pa cu Bible cangkhat Rom.6:23 Sual man cu thihnak a si timi te a siar ih a ruat awk nguaungi hnu ah “ a man ka lak hlan ah ka bang” a ti ih a tha vuarvi.

c.       Mi a rem tha ( It Corrects )

      Zumtu pawl hi zumtu kan si ruangah kan famkim cuang lo ih kan nun dan ah duh thus am lo zetzet tla a um ve ko.Asinan Bible in zumtu cu kan nitin nun ih a tha lo mi pawl in rem ih nun thanlentha ih in rem ih in thanglian vivo tertu a si.

d.      Mi a kholhfai ( It Cleanses )

      Bible cun  nun borhbahnak ihsin in thiang ter vivo.Leitlun ah thianglim famkim a um thei lo ding nan kan nun hi a borhbah vivo zawng in silo in a thiangfai vivo zawng in Bible cun Zumtu hi in hruai a si.

e.       Mi a zaih ( It Conceives )

      Bible cu amah dodaltu pawl dodal ve lo a si ih a mai’ lam ah mi a hip vivo ih zumtu thar a pung zai ter vivo a si.

f.        Mi a neh ( It Conquers )

      Leitlun cabu hmauh hmuah lakah Bible hi dotu nei tambik a sin an tuisun ni tiang ram la bik, mi nehtu ah a tang vivo.

g.      Mi a hnem ( It comforts )

      Tah le aihram, ninghan, riahsiat kan tonlai caan khal ah Bible cun in hnem theu ih thazang thar thawn kan nun in cakter sal theu.

        Bible hi zumtui' hrangah Pathian in in pekmi ro sunglawi a si ih hi ro sunglawi a sunsak thiamtu pawl cu sunlawinak an co vivo ding.