1. Jerikho nehnak (Josh.6:1-20)
Joshua in Israel pawl Kanaan ram ih a hruai luh tikah hmaisa
bikih an domi khua cu Jeikho a si. Jerikho hi fek zetih kulhmi a siih minung
cahnak ih pah bal ding ci rual a si lo. Jerikho hi lungdawl thuah hnih ih kulh a si ih a pawnsa sawn hi 6ft
lai ih sah ih dawl thok a si ih 23ft lai a sang, cun a sung kulh
sawn hi 12 ft lai sah ih dawl
thok a siih 30ft lai a sang tiih ruah a si. Cu tluk ih a hnget
khuahmi cu Israel pawl hmai ah awlai te’n a cim mai. Israel pawl in Jerikho
khaw kulh cu nikhat ah voi khat an hel ih a ni sarihnak ah voi sarih an hel ih
tawtawrawt an tum tikah Jerikho khaw kulh cu hma te khat ah a cim ṭheh. Jerikho
khaw kulh hnget lutuk, minung cahnak maimai ih ti cim theih lo a cim hi Pathian
huham cahnak lang fiang tertu sawn a si.
Zumtu pawl kan nunnak ah ziang kan tong ṭheu? Kan tonmi cu
a bang cio lo ding, hmansehla harsatnak hi cu kan ton caan a um cio ko ding. A
caan caan ahcun minung lam ih kan ti thei lo dingmi, a hak zetmi, a har zetmi,
a sah zetmi harsatnak kan parih a thlen caan a um ṭheu ding. Cuvek harsatnak
kan ton tikah Pathian kan rinsan ding hi a thupi zet. Harsatnak zianghman um lo
caan, ziangkim semrem te ih kan um tikah Pathian rinsannak thu kaa ih rel hi cu
a awl zet. A ngaingai tei’ kan ti asile harsat mangbangnak kan ton caan te hi
Pathian kan rinsan a ṭul bik caan a si. Bawipa cun Amah rinsannak thinlung a
neitu hnenah cahnak thazang a pek ṭheu (2 San.16:9). Jerikho khaw kulhnak cu a
hnget poh le Pathian cahnak a lang fiang sinsin bangin kan tonmi harsatnak hi a
tum poh le Pathian kut cak nasa sinsin ih kan hmuhnak sawn ah an cang ṭheu. A tu ih na ton mi harsatnak hi
a sah tuk maw? hi caan te hi Pathian na rinsan a ṭul lai tak fang a si, na tonmi
harsatnak sahpi kha Bawipa’i kut cak nasa sinsin ih a langnak dingah a si.
2. Pathian duhnak hawl hmaisa lo
a poi. (Josh.9:14)
Joshua le a ralkap pawl in ral an nehnak thu cu hmun kip ah
a thangih mi in an thei nasa. Cu tikah Gibeon mi pawl cun Joshua ih siatsuah
ding phangah bum dan ding an pol. A tlekmi dip in rawl an thun ih belh cop
sabit thawl an keng, belh copmi kedam le hnipuan siava an hru ih a car, a mawr
cia mi sang an keng. Lam nai teih um an si ko na’n lam hlapi ih um vekin an
tuah aw ih Joshua hnenah an feh. An
duhmi bik cu Pathian in Israel pawl nehnak a pek zia an theih tikah Israelmi
pawlih siahsuahmi ih tel ve lo dingih remnak tuah kha an duh bikmi a si. Joshua
hnen an thlen tikah lam hlapi ihsin remnak tuah dingih an rat thu an sim ih
cumi nemhngetnak dingah an thuamhnaw ṭet le an ti thawl hlun le an sang mawr
cia pawl an hmuh. Hi Gibeon mi pawl le
hlawhhlang Rahab hi kan zoh tikah
thil bangaw zetmi hmuh ding an um.
-
Kanaan rammi an si veve. (Joshua 2:1; 9:3)
-
Pathian in an ram cu Israel kut sungah a
pe ti an fiang veve. (Josh.2:9; 9:9)
-
An theihmi thu ruangah thin phangin an um veve. (Josh.2:9-11;9:3-5)
-
Siatsuahnak tong lo dingin thukam an tuah veve. (Josh.2:12-13; 9:6)
An bangawk lo nak te cu Raheb cun an bum hai lo ih Gibeon
mi pawl cun an bum. Hi ṭum ah hin Joshua le a hnaṭuanpi pawl cu bum in an um.
An thil rak kenmi cu an ei ih siatsuah lo dingin thukamnak an tuah ta riai. A leh
hnu ah Gibeon mi pawl hi lam naite ih um an si kha an thei na’n an parah
siatnak tuah a cang thei nawn lo. Ziangruangah bumin an um thei ti asile ‘Pathian
ih duhnak an hawl hmaisa ta lo ruangah a si’ ti hi fiang takin a lang. Kum
reipi a liam hnu ah siangpahrang Saul in Gibeon mi pawl a that hai tikah
Pathian a thin heng ih paampi an tuarih tlunah buainak nasa tak an tong (2
Sam.21:1).
Joshua le a minung pawl in Pathian duhnak an hawl hmaisa ta
lo hi bum ih an umnak hrampi a si. Pathian duhnak an hawl hmaisa ta lo tikah
cun Gibeon mipawl ih lemcan thiamnak in a bum ngah. Thukam thar khalah ‘bum in
um hlah uh’ tiah ralrinnak pek kan si (Gal.6:7; 1 Kor.6:9; Jeam 1:16 KJV).
Gibeon pawl in an lemcan thiamnak in Joshua le a minung pawl an bum ngah vekin
kan ralpa Satan khalin zumtu pawl bum dingah lemcan thiamnak hi a hmang ve (2
Kor.11:14). Cui bumnak sungih kan pil lo nak dingah Pathian ih duhnak hawl
hmaisa ringring kan ṭul. Pathian ih duhnak hawl timi cu kan mahin thu bot cat
mai lo in Pathian hnenah kan thleng hmaisa ding tinak a si.
3. Pathian in minung ih thu a
ngai (Joshua 10:14)
Joshua ih ral nehnak thu le Gibeon pawl in remnak an tuah
thu kha Jerusalem siangpahrang Adonizedek in a theih tikah siangpahrang panga
pawl hnenah bomnak a dil ih Gibeon an do. Cui ṭumah Joshua le a ralkap pawlin
Gebion pawl an run ih ral pawl an that
ciamco. Cu ti cun Joshua cun mi zapi theih ah au in : “Maw Ninu, Gibeon khua tlunah ding law; Maw Thlapa, Aijalon Horkuam tlunah cawl law,” tiah a ti. Cu ti cun
Pathian cu mangbangza in a rung cangvai ih ral an neh lai hlan lo Ni cu feh
nawn lo in nikhat pumhlum a cawl. Hi ṭum ih thil a cangmi ah Baibal in ziangti’n
record a tuah tile ‘A cuih sun bangtuk, Pathian in Israel mi a ṭan ih Bawipa in milai ih thu a ngai caan, leilung
hramthawh ihsin a um dah keel lo’ a
ti.
Hi thu ihsin kan hmuh theimi cu
Pathian in minung thu hi a ngai ṭheu ih hi ṭum ah a ngai hleice cuang tinak a
si. Pathianin minung thu a ngai ti tikah minung in Pathian thu a pe, Pathian a
fial, Pathian hnakin dinhmun sang sawn ah a um tinak lam a si lo. Joshua ih
nunnak khal ihsin kan hmuh theimi cu
Joshua in Pathian thu a pe a si lo, Pathian hnenih a au hi dilnak au aw sawn a
si. Pathian in minung thu a ngai kan ti tikah minung ih fialnak ruangah Pathian a cang vai
siloin kan dilnak parah a cangvai sawn. Pathian hi kan ni ih tilh fial ding a
si lo ih a dil ih kan dil dingmi sawn a si. Pathian hi a duhnak kim tertu lawng
si lo in kan duhnak a kim ter caan khal a um.
- Lot cu tlangpar ih tlan an fial ko nan nai deuh
ih a ummi khua sawn ih talan dingih a dil tikah a dil vekin an siang.
- Israel pawl khalin siangpahrang neih an duh tukih
Pathian hnenah an dil ih pek an si.
- Joshua ih
au aw vekin Pathian in Ni a din ter.
