Voikhat cu Ṭai-ar le
Sidon kiangkap ah Jesuh a feh. Baibal kan siar tikah Ṭai-ar le Sidon hi a rel
kop ṭheumi khua an si zia kan hmu thei (1 San.22:4; Ezr. 3:7; Jer.25:19-26;
27:3;47:4; Joel 3:4; Zek.9:2; Matt.11:21; 11:22; 15:21; Mk.3:8; 7:31; Luk.6:17;
10:13; Luk.10:14; Tirh.12:20). Hi tum ah nunau pakhat a hmin tarlang a silomi
hnenah Jesuh na ‘Na zumnak cu a nasa a si’
tiah a ti. Hi vekin Jesuh in mi a timi hi rel ding a tam lo. Matt.8:10 ah Rom
ralbawi hnenah “Israel pawl lak hmanah hipa zumnak bangtuk ka hmu dah hrih lo”
tiah a ti. An pahnih in Zentail mi an si. Israel pawl Jesuh in hi bangtuk ih a timi an um lo, an
zumnak a mal thu le zumnak an neih lo thu le zumnak an neih lo ruangih
mangbangza a tuah lo thu pawl sawn kan hmu ṭheu. Hi tluk ih Jesuh in a fakmi
nunau nu thuhla ihsin thazang la tlang sehla.
1.
Bawipa ṭahhnawh
Ṭai-ar le Sidon khaw kiangkap ah Jesuh
a um tia theitu nunau pakhat cu Jesuh hnenah a ra ih a fanu khawsia ih polhmi
damter dingah zangfah dilin a ra ṭahhnawh. Hi a ṭahhnawhnak ihsin thil pahnih
fiang zetin kan hmuh theimi a um.
a) Jesuh rinsannak : Ṭahhnawh timi in a
langtermi cu ‘thil pa khatkhat kanmahte ih kan tuah thei lomi kha in tuahsak
theitu dingih kan rinsanmi hnenih thungai thlakih bomnak va dil’ khi a si.
Bomnak dil ih mikan va ṭahhnawhmi cu kan rinsan ruangah a si. Curuangah hi
nunau nu hin Jesuh hi ziang tlukin a rinsan tihi kan hmu thei. Mi kan rinsan
lomi hi kan ṭahhnawh dah lo. Mi ṭhenkhat cun Pathian hi ka lawngin kan rinsan,
Pathian rinsan taktak tu cun an harsatnak a hnenah an thlen ṭheu.
b) Fanu zawnruahnak : Hi nunnau nu hin a
fanu khawsia ih polhmi hi ziang tlukin a zawh a ruat,seherh ti a lang. Khawsia ih polhmi a fanu hi a zoh men
lo, a um san men lo, Jesuh ih thuhla a theih tikah a hnenah a ra ih a fanu
hrangah ṭahhnawh rori in bomnak a va dil,dil menmen asilo nasa ngaingai, ninum
ding khop in Jesuh a auh (cang 23). A fanu hi seherh lemlo sehla Jesuh hnenah
bomnak dilin a feh lo ding. Zumtu kan nunnak hi cek aw sal cio uh si. Kan fanau
pawl hi khawsia ih polhmi cu an si kher lo ding nan nun nei lo, Satan thang
sungah a tanglaimi an sinak hi Pathian hnenah kan thlen dah maw? Kan fanau pawl
in thlarau lam ah damnak an co theinak dingah Pathian kan ṭahhnawh dah maw? Kan
fanau, kan unau pawl kumkhaw nunnak an co theinak dingah ziangtluk an hrangah
thla kan cam zo? Ziangvekin Pathian kan kar zo? Hi nunau nu in a fanu damnak
ding hrangih Jesuh a ṭahhnawh bangin kan innsang, kan unnau hrangah Pathian ṭahhnawh
uhsi.
2.
Beisei vek a si lo
Nunau nu in hi tluk rori ih Jesuh a ṭahhnawh
tikah ziangvek a tong? Kan thinlung te cun hi tlukih tahhnawh rero tu cu Jesuh
in a fanu a ti dam hngal ding hi cu kan ruat cio ko ding. Asinan cu vekin thil
a cang ta lo. Ziangvek thil a tong?:
-
Jesuh in kam khat hman a sawn lo. Dai
te’n a um.
-
Dungthlun pawlin dai teiih um
dingin Jesuh an fial.
-
Jesuh in “Israel hrang lawngah thlahka
si a ti.
-
“Nauhak rawl uico pek cu a dik lo”
tiah Jesuh in a ti.
Jesuh
ih thulehnak pawl zok tikah Jesuh cu ‘a va sual ve, zangfahnak a va nei lo ve,
ni a va thlei dang vek, zianghman ah mi a va siar lo ve’ ti ding awm a si. Nunau
nu in hi vekin thil ka tong ding ti hi cu a ruat lem lo ding. Hi nunau nu in
Jesuh a beisei sei thawn, Jesuh a rinsan san thawn, Jesuh iha rak son dan hi cu
riahsiat za a si. Kan ni khal Pathian hnenah thil kan dil ṭheu, nasa takin kan
dil ṭheu, asinan kan beisei vekin thil a thleng lo caan a um ṭheu. Cu tikah Pathian
hi ziang vekin kan hmu?
Hi vekin Jesuh in a let tikah nunau nu
hi ziang ih a rel lo ruangah a si lo ih zangfahnak a nei lo ti ding khal a si
lo. Jesuh cu mi thinlung theitu a siih hi nu in ziangtluk zumnak a nei ih
ziangtluk in a beisei, cun ziangtluk in Jesuh a rinsan timi hi midang ih hmuh
theih ih a um theinak dingah a si.
3.
Beidong Lo
Jesuh hnen ih a beisei vekin thuletnak
hmu lokhal sehla hi nunau nu cu a beidong duh lo. Jesuh daite a um khala thei,
dungthlun pawlih an kham duhnak khal a poisa lo, Israel pawl hrangah ka ra a ti
khal e daite’n a um duh cuang lo. Jesuh in “Nauhak rawl lak tahratin uico pek
cu a dik lo a si” tiih a ti mikhal nunau nu in “A si bawipa, na timi cu a dikmi
a si. Sikhalsehla bawi ih cabuai ihsina tlami rawl ṭil fuan cu uico khalin an ei ṭheu ko a sisi” tiah a
let. Hi thulehnak Jesuh in a theih tikah Jesuh dai te’n a um thei nawn lo,
nunau nu ih zumnak a nasat zia a phuangih a fanu te khalin damnak a rak co.
Hi nui nunnakih ropi emem cu a beisei vekin thil a thleng
lohli lo nan a beidong cuanglo in Jesuh hnenah a dil bet thotho. Cun Jesuh in
Israel mi pawl hrangah ka ra, uico nau rawl pek cu a dikmi a si lo, a ti hmanah
a ngol lo. Minung sinak ah hi vekin thulehnak dong nungna a ngolmi mi ziangzat meng kan um pei? Beidong lo in le
ngol duh lo in a beisei mi cu ngah ding rori in ngetzet in zumnak a din tikah a
beiseinak cu ti hlawhtlin in a um. Pathain hnenih thil kan beisei ih kan dil a
si ahcun zumnak thawn hnget zetin din a ṭul. Jeim 1:6 sungih kan hmuh theimi cu
“Sikhalsehla cu tiin thil a dil tikah thinlung ṭhukṭhunnakum lo tein a dil pei
ih ka ngah rori ding tiin a zum pei” tiah a ti.
