Noah Nunnak Ihsin Zirnak

          Noah hi Baibal sungih Pathian minung pawl lakih kan theih larzet mi a si. Thukam thar sungih zumnak thu a relnak khalah Noah ih hmin hi a lang ve ih dingnak thusimtu khal a si (Heb.11:7, 2 Pit.2:5).

1. Mi teh an tuah cio si ti hlah

          Noah san lai ah hin minung hi an karh zet zo ih cui san minung pawl hi an ṭha lo zet, an thinlung khal ruahnak siava lawnglawng in a khat ṭheh. Nunau mipatnak lam  khalah an sual zet (Luk.17:27). Pathian lam a hoitu khal an um lo ih Noah pakhat lawnghi Pathian lungtongtu  a si. Noah hi a san laiah sualnak le thil ṭha lo a um lo ruangih fel men a si lo, a kiangkap ah thil ṭha lo tuah ding tampi a um ve ko ti hi cu a thuanthu in kan thei thei. Ei  le in in an nuam ih an siatvatnak le ṭhat lo nak khal a zai vivo. Cuvek lakah Noah cu a um ve nan a kiang kap ih minung pawl vekin a um ve lo in Pathian ṭinzan te’n a um (Sem.6:9-10).

          Zumtu pawl kan nunnak ah Noah nunnak ihsin zir ding kan nei nasa. A tu ih kan san khal kan zoh asile sualnak, ṭhat lonak,siatnak hi an pung vivo. Kan kiangkap zoh sehla thil ṭha lo tamtak tuah ding a um. Cumi lakah a tlangleng mi kan sin an zumtu cu Pathian ṭihzahnak thawn cuang pawl hi hial ding kan si. Zu in ding a um lo ruangih zu in lo hi a um theih nan in ding tampi um cing khalih in lo theitu si hi a thu pi. Jesuh Khrih a rat hlan sungah cun sualnak, tisa nomnak pawl  an pung vivo ding. Sikhalsehla zumtu pawl cu Pathian ṭihzahnak thawn cuang sualnak pawl lakah pil ve lo in ding hnget ding kan si. Pathian ṭihzah kan timi cu kan kiangkap ah thil ṭha lo tuah ding tampi um cing si in tuah lo te’i um hi a si. Khawvelmi pawl cun mi vualvo ih antuahmi rak tuah ve lo hi an thinlung tein cangkanglo, hawi zawng lo, ti aw ter in ti men thei nan Pathian lungtong ngahtu kan si ding hi a thupi sawn. Thil ṭha lo thu ahcun ‘Pathian in zo hmuahhmuah ih tuah cio mi a sisi’ tiah a ngai zam men dah lo. Curuangah mi ten an tuah cio si tiin kanmah te’n ngaih ṭha ih ret aw men ding kan si lo. Mi teh an ei thup si, mi teh an ruk cio si, mi teh thuphan an rel cio si, mi teh an in cio si, mi teh an tuah cio si ti ding kan si lo. Noah cun ‘mi teh an si cio si’ ti lo in rinum te’n Pathian hmaiah ah a nung.

2. Pathian in thilṭha lo a zuah kumkhua lo

          Noah san laiah minung pawl hi an ṭha lo zet ti hi Pathian in a hmuh tikah a zoh liam men lo. Minung hi an um um in  a um ter men lo. Noah hnenah ziang ti’n a ti tile “Milai cu leilung par ihsin cem ter dingah ka ruat zo. Ka siatsuah thluh ding..” tiah a ti. A ti vek rori in Pathian in Noah san laiah leilung cu tidai in a kholh fai ih lawng sungih a ummi pawl lawng an luat.

          Mi tampi in tu ih kan umnak leilung pi hi kel awh ih  feh vivo dingah kan ruat men thei. Zumtu in kan theih dingmi cu Pathian in hi leilung hi meisa in a siatsuah ṭheh lai ding ti a si. Pathian in Noah le a innsang lawng kha a dang te’n a ret men ah a duh tawk lo mi dang pawl a siatsuah ṭheh a si khal. Cuvekin zumtu pawl lawng a dang te’n in finkhawm  ding lawng kha Pathian ih tummi a si lo, sualnak ih a khatmi leilung hi a siatsuah lai ding (2 Pit.3:7,10-12). Curuangah ziang vek in nung ding kan si ti hi in sim: kan nun dan ah thianghlim dingah le Pathian ngaihsak ding kan si. Tu ah hin kan kiangkap ṭhatlonak hi a pung rero, a tuahtu in an tuah rero ih hi tiin thil a feh rero dingah kan ruat men thei. Asinan nini khat ah Pathian in leilung hi a a siat suah lai ding. Pathian in ṭhatlonak hi a suah kumkhua lo tihi kan theih a ṭul.

3. Thupek thlunnak

          Pathian in leilung cu tilik ih a khol ding thlang tikah Noah cu lawng tuah dingah a fial. Lawng a tuah dan ding pawl le a thing hman dingmi pawl, a khan ṭhen dan ding le a erhnak ih hmandingmi pawl thil dang tampi a sim. Pathian in tuah a fialmi lawngtuah dingah lawng pianhmang khal a hmu hrih lo, tilik thu  khal theih ding a um hrih lo, asinan Pathian ih thupel bang tukin Noah cun a tuah ṭheh. Noah in Pathian a ṭihzahnak la a thu a ngainak kan hmuh theinak cu:

-         Pathian ih thupekmi vek cekci in Noah cun a tuah ṭheh. (Sem.6:22)

-         Cule Bawipa ih thupekmi vek cekci in Noah cun a tuah ṭheh. (Sem.7:5)

-         Pathian ih thupek vekin Noah thawn lawng sungah an lut. (Sem.7:9)

-         Noah thawn lawng sungah Pathian ih thupekmi vekin an lut. (Sem.7:15)

Thukam hlun san lai kan rel asile Pathian in Israel pawl hnenah thu a pek ṭheu. A thu pek an thlun asile a thlawsuah ih an thun lo sile an parah hremnak a thlen ter ṭheu. Pathian in a mi pawl thu a pe ṭheu, thupek thluntu dingih a fialmi khal a mi pawl an si. A tu kan san zumtu dinhmun in kan rel asile Pathian ih thupek thluntu ding cu kan mah zumtu pawl kan si. Pathian kanṭihzahnak la kan duhdawtnak a langnak cu a thu pek kan thlun le thlun lo ah a si (1 Johan 5:3, Johan 14:15). Lei dan ahcun tlun lamih thupek tlun hi har kan ti men thei. Cun mi dang kut hnuai ih hna kan ṭuan tikah an thupek vekin tuah  hi kan ṭuan vo a si. Pathian ih thu pekmi ziang ih rel lo kan si ahcun Pathian duhdawttu kan si thei lo tinak a si. Bawipai thupek thlun hi zumtui hrangah hmui ngilnak, himnak a si ih thlun lo hi siatralnak a si.

4. Pathian ih kilhimnak

          Lawng tuah ṭheh a si tikah Noah le a innsang cu rannung pawl thwnlawng sungah an lut. Cuticun ni sawm li le zan sawmli sung cat loin ruahpi a sur ih tidai in leilung a khuh ṭheh. Hi tilik hi a kang lohli mai lo ih ni 150 sung rori a rei. Ramsa ziang  maw ti zat thawn an si ih leidan ih ruah ahcun ziangtin ni cu hmuah sung lawng parah buaibai lo tein an um thei ti ding awm tak a si. Asinan lawng parah ziang buainak hman a um lo ih, ziang harsatnak khal rel ding a um lo. Pathian in Noah a fialmi cu lawngtuah ih a sungih luh ding kha si. Lawng sungih a thlen hnu ahcun Pathian in ziangkim semrem te’n a um ter.

          Tu ah hin Noah bang tukin ramnung kha hmuah thawn ni 150 sung tidai parah lawng pakhat sungah um khawm sehla ziang thu buai tal si maw rel ding a um ka zum. Asinan Noah cu lawng sungah an buai, an harsat le an thih thu theih ding zianghman a um lo. Pathian cun a thu pek kan thlun tikah lei tlan ih harsat le buainak awm taktak ah tluang takin Pathian in lam in hruai ṭheu. Ziang ah saw cu vek harnak tong lo ih kan um thiam, ziangah saw kan nat lo thiam, ziangah saw kan thih lo thiam, ziangtin saw kan luat thiam ti ding in kan nun lam in hruai ṭheu.

5. A pakhatnak ah Pathian

          Tidai a kang ih lawng ihsin an suah tikah Noah in a tuah hmaisa bikmi kan hmuh theimi cu Pathian hrangah biakṭheng donin mei ur thawinak a pek. Lawng sungah ni 150 lai an um ih an khop zet ko ding. Ni cu hmuah sung lawng sung ih um tete lawng ihsin an suah tikah thil dang ngaihtuah ding khal a tam zet ding. Hmansehla ziang thil dang hnakin Pathian hrangah thil a tuah hmai sa bik. Tidai bak lo hmuh ding zianghman um lo, lawng parah ni 150 ṭum lo in an umnak ihsin hmai sa bik lei parih an ṭum vete’n Bawipa hrangah mei ur thawinak a pek timi cu ziang tlukin a sunglawi. Pathian khalin Noah ih thawinak parah a lung a awi. Zumtu kan nunnak ah hin thil ziang vek caan khalah Pathian theih hngilh lo tu kan si ding hi a thupi zet. Bawipai kut cak kan par ih a thlengmi in kan nunnak ah Bawipa hi a pakhatnak ah in ret ter hram seh.