Pa Pawl ih Si Dan Ding 10

  

        Baibal ah Nu le Pa hi a dang  dang te’n a langnak a um ko nan hmun tamtak ahcun nu le pa hi a kop in a lang tlang. Innsang kilkhawinak ah nu le pa cu ṭhen hran theih a si lo. Na ti ding ka ti ding ti ih zem awk theih thluh khal a si lo, ṭuah tlang, feh tlang, kilkhawi tlang, kaihruai tlang ding kan si. Fa le pawl lamzin ṭha ih an pitlin theinak dingah pa a thupit vekin nu khal a thupi ve. Tui ṭum ahcun PA lam hoi in Pa pawl ih kan si dan ding le dihhmun pahra tarlang a si ding.

1. Na fa le pawl thinheng dingin tuah hlah (Efs.6:4)

          Hi Baibal cang thawn pehpar in kan theih ṭulmi thil a um. Hi Baibal cang hi kan fa le hi kan parah thinhengnak an nei ding a si hrimhrim lo tinak a si lo, kan fa le pawl an thinheng ding hnakin an duh kan zulh thluh ding tinak a si lo. Mawi lo takih an nun khal le an thin heng pang kei ti phangah kan kawk lo ding tinak khal a si lo. Lam zin ṭha lo an zawh lonak dingah Khristian nun dan ziaza le zirhawknak thawn cawm ding kan si. A caan caan ahcun an hrang ṭhatnak dingih kan tuahmi parah thinheng caan an nei ṭheu ko ding. Pa le parih voi khat hmen thinheng dah lo timi cu theih ding a har zet men ding. Kanmah lala khal kan pa le parah kan rak thin heng ṭheu nan kan hung upat tikah thil umdan kan theithiam sal ṭheu.

          Hi Baibal cang thawn pehpar in rel ka duhmi cu, pa le pawl hin kan fa le pawl kan umpi tikah an thin heng dingih tuah hi kanmah ngamnak ah kan hmang ṭheu. An duh lo zawng a si ti thei cingih kan ti hrim ṭheu ih a thinheng kha nuam kan ti, hnihnak ah kan hmang. Tahṭhimnak ah an lu thamsak an duh lo ti kan thei ih a thinheng seh ti phun in a duhlo mi a lu thamsak ṭeuṭeu kan tum. Cumi kha nomnak, leknak phun in kan timi cu a va si ko nan thil ṭha lo zet kan zirh rero a rak si ziar. Cucu ‘..thinheng dingin tuah hlah’ timi zawn ih sim duhmi si sehla. An thinheng dingih kan tuah silo, an ṭhatnak dingih kan tuahmi parih an thin heng kha cu  theih thiam lo ruangah a si.

         

2. Fa le hrangah zirhtu ṭha si aw (Thuf.22:6)

          Zo cio khalin kan fa le hi lamzin ṭha an zawh ih an pitlin ding cu kan duh ṭheh. Ka fa pawl hi ‘sual hai seh’ ti a duhtu nu le pa kan um ding cu a zum um lo. Kan fa le pawl lam zin ṭha an zawh ding cu kan duh cio ko nan lamzin ṭha zawh dingih zirh paihtu pa cu kan si thluh lo men thei. Minung hi zirh awk lo ahcun mahte ṭhat ih ṭhat cu thil har tak a si. Nu le pa ih zirh lemlo nan mi ṭha rel ding cu an um ko ding nan a tamlo ding, zirh rero hmanah sisual kan tampi. Ahleice in Pathian thuhla kan zirh ih sim hrimhrim ding kan si. Kan fa le pawl Patihan thu kan sim in kan zirh lo asile kan innsang, kan khawtlang, kan ram in a hmabak cu tluk/siat a si ko. Pathian ih in pekmi kan fa le pawl ṭha te’n zirh ih kaih hruai hi in petu Pathian lungawinak a si. Ṭhate ih thil a finkhawi theitu hnenih thilpek hi kanmah khalinkan duhmi a si. Thilmi kan pekmi kha ṭha teih an finkhawi paih hnai lo tikah a petu ka thinna ṭheu.

3. Zohṭhim ding nun ṭha kan neih a ṭul (2Kor.3:2-3)

          Hi Baibal cangih kan hmuh theimi cu, nitin kan um dan le kan nung dan hi nganmi ca vek kan si. Kan fa le pawl hin kan nun dan, kan um dan hi nitin te’n in siar. An siar tambik mi cu an kiangih um tambikmi kan mai nun le um dan hi a si. Zohman mi famkim kan um lo nan kan fa  le pawlih tuah lo dingih kan duhmi hi kanmah in tuah lo thei sehla  cucu zirh dan ṭha bik a si. Baibal kan siar lai, thla kan camlai, Pathian thangṭhatnak hla kan sak lai hi kan fa le in hmuh ding an nei maw? Kan innsang ah ziang ti kan um lai ha an hmuh tam bik?

4. Mai innsang ngaihsak (1Tim.5:8)

          Mai innsang ngaihsak lo hi ziang ti’n a rel tile zumnak dungtuntu le zum lotu pawl hnakih sual sawn in a rel. Kan innsang kan ngaihsak lo a si ahcun zum lotu pawl hnakih bese sawn kan si. Innsang cu Pathian ih dinmi a si vekin kan innsang hi ngaihsak ding kan si.

5. Pa ṭha in a fa le nun a sim (Thuf.13:24)

          “A fungfek a uitu cun a fapa a hua ih a duhdawtu cun a tikcu te ah nun a sim” tiah a ti. Fungfek a uitu ti cu nun a sim lotu ti tluk a si ih kan fa le nunsimtu ding kan si ih nunsim ṭulnak ih nun kan sim lo a si ahcun kan fate a duhdaw lotu kan si. Duhdawtnak cun nun a sim sawn.

6. Fa le thawn caan hman tlang (Daan.6:6-9)

          Innsang hi ṭuan ṭul thil a tamtuk tikah  ka fa le thawn  tikcu caan hmang tlang lo hi um caan hi a tam duh zet. Fa le pawl an pitlin hnu ahcun zo cio khal ti ding nei kan si thluh thei ih curuangah an nauhak laiah caan kan pek hi a ṭul hleice cuang. Kan fa le hin nu le pa thawn um tlang caan hi an ṭulmi a si. Kan mai hna ih kan buai tuknak ah kan fa le kan ngaihsak man lo ih an ngamnak dingah ziang si maw kan hman ih kan daithlan caan hi a tam zet ding ah zum a um. Ka fa le thawn pawlawk caan hi kan nei thei ringring lo ding nan neih caan cu kan tuah hrimhrim a ṭul. Kan fa le in ziang an tuah ti hman thei lo khop ih caan kan pe thei lo a si ahcun kan mitthli tla tam tertu ah a cang leh thei. Kan fa le kiangih um si in kan fa le thawn  pawlkom aw ngah lomi kan si pang maw ti khal phan um tak a si.

          Voi khat cu nauhak pakhat hi a pa thawn um tlang ding hi a duh zet, a pa hi hnaṭuan a si tikah a fa thawn an um tlang thiam dah lo.  Apa cun a fa ih hman ding thil ṭhatha cu a leih ko. Voi khat cu a hnaṭuannak ihsin a pa a rung tlun tikah:

          Fa :  Ka pa nazi pakhat ah ziangzat na ngah?

          Pa : I hnok sak aw hlah ka bang lutuk.

          Fa  : Zangfah te’n in sim aw?

          Pa  : Nazi pakhat tin ah dollor 20 ka ngah.

          Fa  : Papa dollor 10 in coih thei kei maw?

          Pa  : Cumi duh ah aw ka ngah zat in suh? Va it that men aw i hnoksak hlah.

( a fa cu a it, tawk fangah a pa cun ‘ka fa hin ziang si maw lei duh a nei a si ding’ ti’n ruatin a fa hnenah a va feg sal ih..)

          Pa  : Pa te na it that zo maw?

          Fa  : Ih that lo ee

          Pa  : “Kha i dilmi poisa ka rak keng hokhaw”

          Fa  : Lungawi papa

         

          A fapa cun lukham hnuai ih a pai poisa retmi cu a la ih dollor 20 kha hmuh tikah a lungawi tukih “ Yea.. ka hai daih poisa ka nei zo, ka pa nazi pakhat sung ka lo lei thei pei maw?” tiah a pa thawn um tlang a duh ruangah a au.

7. Zangfah lainattu Pa ( Sam.103:13)

          Pa in fate parih zangfahnak a neih zia hi ti’n a tar lang. “Pa in a faa le pawl a zangfah bangin. Bawipa in a Amah a ṭihzahtu pawl a zangfah hai” tiah a ngan.

8. Theihmi  tuahsuaktu (Jeim 1:22)

          A thu kan theih takah a tawk tiih um men mi siloin kan theihmi thu hi a tuahsuaktu pa si ding hi a thupi zet. Thil ṭha kan theihmi kan tuahsuakmi hi kan innsang hrangih hlawhtlinnak  a si.

9. Pa cu a fa parah a bei a dong dah lo (Luk.15:20-24)

          Fapa tlanhlo hi a pa a nun lai  rori ah ro thil dil ih tlan hlomi a si. Asinan ziangtikah ka fa hi a ra kir sal ding timi cu a pa in a thlir ringring. A fa a ra kir kha hmuh tikah a va hmuakih a ṭang sungah a pom. Amai duhhrilnak rori in a hnen ihisn a tlan mi a fa cu lungawi te’n a rak pom.

          Pathian khalin a fa le pawl hi kan sual tikah nun in sim. A hnen ihsin kan tlan tikah siatnak thawn in dawi ṭheu nan a duh bikmi cu Amah Pathian hnenih kan kir sal ding hi a si.

10. Fa le hrangih thlacam (1San.29:19)

          David Siangpahrangin  a ai awhtu ding Solomon hrangah nasa zet in thla a cam. “ Na daan pawl a thlun theinak dingah… thilri ka khawl thluh zomi biakinn cu a sak suak theinak ding ah …ruahnak ṭha le thinlung famkim run pe hram aw” tiah thla a cam sak. Mi ṭhen cun Pastor maw, Pathian hnaṭuantu pakhatkhat hnen ah “ ka fa le hrangah thla in camsak aw” tiah kan ti ih a ṭha zet ko. Asinan kan mah rori in camsak lo ih midang kan ring men a si ahcun thil dik lo a si. A pakhatnak ih thlacamsaktu ding cu kanmah rori kan si.

Ca siarmi : Best and Worst Fathers of the Bible

                   10 Things Scripture Says about Being a Father