Mi Tampi Thattu Pathian

Baibal  kan siar tikah Pathian in mi a thahnak thu hi hmuh ding a tam zet. Satan in mi a thah thu sawn hi hmuh ding a mal zet. Sakhaw dang pawl in Khristian pawl ih Pathian cu mi that hmang Pathian a si tiah an sim hngehnge.

Mi pakhat ih cangan dan vek a si le Baibal sungih hmuh theihmi ah Pathian in mi 2476633 lai a that, hi tlun ah mi zianghmuah an thi timi a fianglo mipawl tampi telh bet ding a um lai. Cu lai ah Satan in mi 10 hrawng fang a that ti ah a ti (Who has killed more, Satan or God?). Pathian in mi a thahnak san hi rel ding sehla a sangsang te cun rel ding a tam zet ding. Hi cahram tawite ahcun a tlangpi thu in a mi thatmi le  thahnak san pawl a thu hlawn in tarlan a si ding. Pathian ih mi thatnak  thu ih sin thinlung sungah thusuhnak a um thei mi cu:

          - Mithat hmang Pathian hi maw kan biak?

          - Mi nunnak a latu cu biak tlak Pathian a si ding maw?

          - Ziangruangah Pathian in mi a that?

          - Zo pawl/ ziangvek minung saw Pathian in a thah? ti hi a a si.

Baibal sungih Pathian ih mi thatmi pawl hi famkim cun kan tar thei lo ding nan fiangfai deuh ih kan hmuh theimi pawl tar lang sehla.  

1. Pathian in mi a thahnak san

No	Thahmi	Thahnak san	Thah zat	Baibal
1	Noah san minung	Sualnak ruangah	Fianglo	Sem. 6:5
2	Sadom le Gomorrah	Sualnak ruangah	Fianglo	Sem.18:32
3	Lot ih nupi	Thu thlun lo ruangah	1	Sem.19:26
4	Er	Mi siava a si ruangah	1	Sem 38:7
5	Onan	A mipa ci lei ah a tlakter	1	Sem.38:10
6	Izip ih fa tir pawl	Lunghaknak ruangah	Fianglo	Suah.12:29-
7	Faro ralkap pawl	Israel pawl an dawi sal	Fianglo	Suah.14:8-30
8	Sui cawlem betu pawl	Pathian an phatsan	3000	Suah.32:35
9	Isreal ni pawl	Cawzuk tuah an fial	Fianglo	Suah.32:35
10	Aaron fa le	Thawinak an pek ruangah	2	Pui.10:1-3
11	Mi pakhat	Pathian a camsiat	1	Pui.24:23
12	Israel mi pawl	An phun zai ruangah	Fianglo	Mip.11:1
13	Israel mi pawl	An phun zai ruangah	Fianglo	Mip.11:33
14	Thlingthlatu 10	Pathian an rinsan lo	10	Mip.14:35-
15	Mi pakhat	Sabbath ah hnaṭuan	1	Mip.15:32-
16	Korah le rualpi	Moses an dodal	3	Mip. 16:23-
17	Korah thluntu	Moses dodal ruangah	250	Mip.16:35
18	Mi tampi	Moses mi that an puh	14700	Mip.16:49
19	Israel mi pawl	Pathian an thangsiat	Fianglo	Mip.21:6
20	Israel mi pawl	Milem an biak	24000	Mip.25:1-9
21	Akhan le innsang	lak lo dingmi an la	Fianglo	Josh.7:10-26
22	Eli ih fa le pawl	Mi an sualpit		1 Sam.2:25-
23	Filistine pawl	Thukam kuang an lak		1 Sam.5:1-
24	Mi tampi	Thukam kuang an bih	50070	1 Sam.6:16
25	Nabal	David a hmuhsuam	1	1 Sam.25:38-
26	Uzzah	Thukam kuang a dom	1	2 Sam.6:6-
27	David fapa	Bathseba sualpit ruangah	1	2 Sam. 12:14-
28	Mi 70000	David mipum a siar	70000	2 Sam.24:15
29	Jeroboam ih innsang	Jeroboam sualnak a tuah	Fianglo	1 Siang 15:29
30	Zimri	Bawipai parah a sual	1	1 Siang16:18-
31	450 sakhaw hruaitu	zuamawknak ruangah	450	1 Siang.18:22
32	Ahaziah	Khawzing a rinsan sawn ruangah	1	2Siang 1:16-17
33	Nauhak pawl	Profet an dek cok ruangah	42	2 Siang 2:23-24
34	Mi ṭhenkhat	Bawipa an be duh lo ruangah	Fianglo	2 Siang.17:25-26
35	Assiria ralkap pawl	Siangpahrangin Pathian nautat	185000	2Siang19:10,35
36	Israel ralkap pawl	Pathian hrilmi dodal ruangah	500000	2San.6:13,9,18
37	Jeroboam	Pathian hrilmi dodal ruangah	1	2San.6:13,20
38	Ethiopia mi tampi	Pathian hnamhril an do ruangah	[1000000]	2San.14:9-14
39	Ṭangkhawm tampi	Judah ram an do ruangah	Fianglo	2San.20:1,22-25
40	Jehoram	Pathian dungtun ruangah	1	2San.21:10-19
41	Amaziah	Pathian dungtun ruangah	1	2San.25:14,27-28
42	Judahmi tampi	Pathian dungtun ruangah	120000	2San.28:5-6
43	Judah mi pawl	Pathian thlahmi an nautat	Fianglo	2San.36:16-17
44	Hananiah	Thuphan zumdingah mi a forh	1	Jer.28:15-16
45	Ezekiel ih nupi	Israel pawl nun sim duh ruangah	1	Ezk.24:15-18
46	Ananias le Safira	Thiang Thlarau an bum ruangah	2	Tirht.5:5-10
47	Herod Aggripa	Pathian upatnak peklo ruangah	1	Tirht.12:23
		Total	19,67,543

          A tlunih tarlangmi ih kan hmuh theimi cu Pathian cun mi a that tam zet nan tong pa that in mi a that dah lo. Pathian hi a sual ruangah mi that a si lo ih sualnak tuahtu pawl a that ṭheu sawn a si. A hleice in Thukam Hlun  ah cun Pathian in daan hmangin a mi pawl a kai hruai ih a thu lo vekih nungmi pawl hi Pathian in a hlah dah tuk lem lo. Pathian in mi a thah tikah um zia nei ih mi a that ih mi a thah hlanah ziang sualnak si maw hmuh ding a um. Cu lo tal asile a Pathian sinak langter dingah a si ṭheu. Pathian hi duhdawttu Pathian, zangfahtu Pathian a si rual in diknak ih khat Pathian a sinak a thu thlun lo le a sim vekih um lo tu pawl hi a zawi awi ringring lo.

          Zumtu khalin kan daithlan lo ding ih thil thupi zet cu Pathian hi mi dik a si ih sualnak zoh liam mentu Pathian a si lo. A duhdawtnak a sang, a zangafahnak a kauh vekin a diknak sungah thil diklo fate hman a tlem lo. Zo vek  misual khal a ṭang sungah an tlem ṭheh ih a khatlam ah thil ṭha lo tuah poisat lo hi Pathian in kan nun dan dingih in duhsakmi a si lo. Pathian in mi a that ruangah biak tlak lo ah ruat ding kan si lo ih sual hua tu, a thianghlim le diknak ih khat Pathian a sinak langfiang ter ih biaktlak a si zia a fiang sawn. Misual khal zohliam mentu a si ahcun biak tlak Pathian a si lo ding.

2. Thilti Theinak ih Khat Pathian

          Pathian hi ziangkim titheitu a si ih cui ziangkim ti theitu a sinak zawnah mi nunnak la theitu khal a si. Pathian hi misual nunnak zuah lo ih a thahnak hi ṭihzah tlak Pathian a sinak langtertu a si. Leilung tlun ahcun a cakbik hi a um ringring thei lo, mi cak kan timi khal a hnakih cak an suak sal ṭheu. Pathian hlan ihsin tui sun ni tiang a neh theitu an um lo. Leitlun ah pathian tampi an um nan kanbiakmi Kan Pathian tluk ih thil ti thei an um lo. Curuangah Pathian cu ṭih tlak Pathian diktak cu a si. Pathian hi kan nunnak neitu a si ih la sal theitu khal a si. Curuangah Baibal in cui that theitu Pathian cu ṭih dingih in fialmi a si.

Taksapum a that thei nain thlarau a that thei lotu pawl

cu va ṭih hlah uh. Takpum le thlarau a pahnih in

hell sungih a that theitu Pathian kha va ṭih sawn uh.

 (Matt.10:28)

          Sualnak a hua ih a huham le thilti theinak ih misual nunnak la theitu cu kan Pathian a si. Pathian cun a duh tiktik ah mi nunnak la theitu a si. A thilti theinak in cemti a nei dah lo.

3. Kumkhua Nunnak in Petu

          Khawvel mipawl asilole sakhaw dang ih um pawl in kan Pathian cu mithattu a sinak lawng an hmu men thei. Ziang ruangah mi a that tit la a zoh hliah lo men thei. Baibal sungah Pathian ih mi thah thu hmuh ding tamzet ih rualrual in a sunglawi zetmi a khatlam ih ummi cu ziang si ti le ‘Pathian hi kumkhua nunnak in petu a si’. Kan Pathian lawng hi nunnak la theitu le kumkhua nunnak pe theitu a si.Satan khal in Pathian ih siannak tello in mi nunnak a la theilo. Ziangah tile nunnak cu Pathian ta a si ih Pathian kut sungah a um. Leitlun ih pathian dang a ummi pawl hi kumkhua nunnak pe theitu zohman an um lo, anmah betu pawl hrangah a ti theimi cu an zawh dingmi le an thlun dingmi lamzin ṭha khih hmuh lawng a si. Kan Pathian cu kumkhua nunnak in petu a si.

          Baibal sungah Pathian ih mi thah thu hmuh ding tamzet khal sehla Pathian ih sualnak tarlang theih a si lo.Pathian a sual ti theitu khal an um lo. Pathian in kan sual zat in in thungrul siang lo sawn a si. Kan sual bangin in thungrul sehla nungtlak zohman kan um lo ding. Leitlun ih mi ṭha bik hman pathian hmaiah cun lak tlak kan um thei si lo. Mithat hmang Pathian kan biak a silo ih kan biakmi hi sualnak tuahtu pawl thianfaitu Pathian a si. Mi that a si ruangah biak tlak a sinak a hlo lo ih biaktlak a si zia a fiang sawn. Um zia nei lo in mi a that dah lo ruangah a hmaika ah kannun fimklhur a ṭul zia a langter sawn.