Jesuh in hnen-um pawl
hnenah cun, “Hi beel pawl hi tidai khat tein than uh,” a ti. Liam thluahthlo in
an than ih, 8an hnenah cun, “Beel sung tidai cu vun suak uhla puaituahnak a
tawlreltu pa hnenah hei pek uh,” tiah a ti. Tidai cu an hei pek. 9Cuih tidai cu
Sabitti ah a cang ih cumi cu a tep. Johan 2:7-9
Jesuh
ih thuhla hi Thuthangṭha ngantu mi pali in an ngan cio nan hi Kana khua ih nupi
ṭhihnak puai thuhla in Johan lawngin a ngan. Hi mopuai ah hin Jesuh le a
dungthluntu pawl hi sawm an si ve ih hi puai ah Jesuh in mangbangza a tuah
tikah a hmaisabik mangbangza thilmak a tuahmi a si hnehne. Hi mopuai ah a fehtu
pawl lakah Jesuh ih pa Josef hi a lang ve lo tikah a thi a si ding tiah zum a
um. Cun Jesuh ih nu Mari a telve tikah a ṭhi aw dingmi hi an sungkhat naivai si
awm tak cu a si. Cun Jesuh in hmun dangah mopuai a hman thu khal hmuh ding a um
nawn lo, hi ṭum lawng hi a mopuai hman um sun a si ih hi thuhla in sim le rel
tla a hlawh zet.
1.
Kana khawte ih thil ropi
Kana
khua hi khaw fate a si ih Galili peng ih um a si. Hi khua fate ah mi ropi Jesuh
a lut ticu a sunglawi nasa, cu lawng siloin hi khuate ah Jesuh in thilmak pa
hnih a tuah. A voi khatnak cu Kana mopuai ah tidaicu sabitti ah a can ter ih a
voi hniknak cu cozah ralbwai ih fapa a dam ter ( Johan 4:46-54 ). Jesuh cu
minung cangin hi leipar a run umnak thuanthu ih amawi zet mi cu a fate zetmi
ihsin hrom a thok hi a si. Bethlehem
khawte ah a suak ih Kana khawte ah mangbangza a tuah hmaisa bik. Cun a
dungthlun tu dingah zirthiamnak nei lo mi tenau Piter le a hnaṭuanpi a ko ih
Kana khawte mi Nathanel khal a ko.
Van sunlawinak hmuahhmuah tanin
a dinhmun niamte ah a phah aw ih minung hmuhnak ih thil fate tak te ihsin hram
a thoknak hi thuanthu mawi zet a si. Pathian in a sunlawinak, a ropitnak cotu
dingah mi tenau a iai lo zia kan hmu thei. Pathian in khawpi, mi ropi pawl a
hnong tinak lam si lo khawpi khalah mangbangza cu a tuah rero ko, mi fate pawl
khal a hrel lo, a fate in hram a thok tonak sawn a si. Lei dan ahcun mi in thil
pipa zet an tuah (show) ding tikah hmun ropi, minung tamnak an hril ṭheu, khaw
te le minung malnak ih thil pipa tuah cu hmuh ding a khaat zet.
2.
Jesuh in sawmnak a ngai poimawh (2:2)
Jesuh
cu mopuai ih tel dingih an sawm tikah an sawmnak vekin a dungthlun pawl thawn
an feh. Hi mi in Jesuh insawmnak a ngai thupit zia a lang ter. Hmun dang khalah
Jesuh hi an sawmnak ih a fehnak kan hmu thei. Luk. 7:36 ah Farasi pakhat in zanriah
ei a sawm ih a sawnak vekin a feh. Luk.11:37 khalah Farasi thotho in Jesuh rawl
ei a sawm ih cunah khalah Jesuh a feh.
Mi ṭhenkhat
in kan hman zetmi cu mi in lungawinak lam ih puai an tuahnak ih tel ve dingih
in sawm tikah lungawi lam, ṭhat lam a si pam tiah feh lo kan awl sam zet ṭheu.
Hihi thil ṭha a si lem lo, kanmai puai ah mi an rat lo tikah kan thinlung in
kan hlam, kan vu ihram vekin mi khalin in hlam zet ve. Sawmnak hi a a cang thei
tawk ih ngai poimawh a ṭha.
Hi Kana
nupi ṭhatnak puai ih thil theng kan zoh tikah Jesuh an sawm man hlat zia kan
hmu thei. An puai cem tiang sabitti thaw zet zem a si tikah an puai mawi tertu a
si ih puai neitu in hmin ṭhatnak a ngah phah lawng silo in an mual pho ding
khal mual pho lo tein an um.
Puai
kan tuah tikah sawm tengteng dingmi sawm hrelh kan nei ṭheu, kan buai tuk nak
ah le hnahnok ah hrelh awk hi a awl zet. Sawm dingmi lakah sawm hrelh ui um bik
cu Jesuh sawm hrelh a si. Kan nunnak hi zoh aw cio sehla thilkantuah dingah
Jesuh bik hi kan hngilh pang ṭheu maw? Jesuh hi taksa in kan hnenah um lo khal
sehla mit hmuh lo in kan hnenah a um. Mi dang
hmuahhmuah hnak ih sawm hngilh poi bik cu Jesuh sawm hi a si. Jesuh hi
kan tuahmi mawi tertu, hmin ṭhatnak le mualphonak ihsin in hupphentu ṭha bik a
si.
3.
Harsatnak lakih Jesuh Rinsannak
Kana
khua ih ṭhatawknak puai ih an sabitti a cem tikah Mari in Jesuh hnenah a
sabitti a cem thu Jesuh a ra sim. Ziangruangah Jesuh a ra sim tile pakhatkhat
tuahsak ding a beisei ruangah a si. Jesuh in mangbangza hi a tuah hrih lo nan
Mari cun Jesuh rinsannak a nei, Jesuh in a tuah thei ding ti a zum. Ziang tin
Jesuh in a tuahsak thei ding ti a rinsan thei ti asile Jesuh a pai hlan ah
vancungmi in a pai dingmi hi mi maksak, ropi a si ding thu vancungmi in a sim
mi kha a thei ringring lai ih cun Jesuh kum 12 a si ah biakinn ih thil thlengmi
kha a thinlung te ah a cing ṭha ringring. Cui thu pawl cu a thieh men lawng si
lo in a tak rori in a rinsan zia hi ṭum ah a lang suak. Mari in Jesuh a rinsan
ti a fengnak cu hnaṭuantu pawl hnenah “ a lo fialmi poh tuah uh” ti ah a sim
hai.
Zumtu
pawlin Pathian hi ziangkim ti thei ti cu kan thei ko nan harsatnak kan ton
tikah kan rinsan ngaingai lo ṭheu. Kan harsatnak a hnenah thlen lo in kan mah
te’n ti fel kan tum ṭheu. Bawipa cun a mah rinsannak thinlung a neitu hnenah thazang
cak pe dingin leilung pumpi hi a zoh ringring ( 2 San. 16:9 ). Kan harsatnak a
hnenih kan thlen tikah Amah kan rinsan zia ti langtu a si.
4. Jesuh a Tum sawn
Judah
daan in ṭhitawknak puai an tuah tikah ni sarih sung an tuah ṭheu ih cui sung
hmuahhmuah a ṭhi aw te pahnih in ṭhitawknak hnipuan an hru. An puai a cem
hlanah a sabitti a cem tariai ih a dang ngaihtuah dingah tikcu caan a um nawn
lo, tlasam in an um thleng, puai neitu te’i hrangih an hma bak cu mual pho ding
lawng a si. Minung lam cun ti ngaihnak a um nawn lo, Jesuh hrang lawngah a
tingaihnak a rak um. Hna ṭuantu pawl hnenah an beel pawl sungah tidai liam
thluahthlo in a thun terih an zem tikah sabitti ti thaw zetah a cang. Cucu an
san laiih puai tuahmi lakah thil danglam zet ah a cang. Ziangahtile sabitti
thawthaw kha hmaisa lam ah an zem ih ni ne lamah cun a thaw lo deuh pawl zem a
si ṭheu. Asinan hi puai ahcun hmaisa lamta a thaw lo tinak si lo in a neta ih
zemmi kha a thaw sinsin tikah an mang a bang.
Harsatnak
kan ton ih tlasam ih kan um tikah kan thla a vai ṭheu, asinan kan tonmi hatnak
hnakin Jesuh a tum sawn. A ti ngaihngak a um nawn lo tikah Jesuh hrangah ti
ngaihnak a um lai. Cu lawng si lo in minung ih tuahmi sabitti hnakin Jesuh ih a
zem termi kha a thaw sawn. Minung kut suak hnakin Bawipa’i kut suak hi a thaw
sawn, a mawi sawn, a ṭha sawn ringring. Bawipa a cangvaih tikah cun minung in
kan rak ti ṭheumi hnak ih nasa sawn, ṭha sawn in thil a thleng ṭheu. Bawipa’i hmin
sunglawi sin ko seh. Jesuh in hi mangbangza hi a tuah hmaisa bikmi a si ih
Nathanael a kawh ṭum ah “ Hi hnakih thil maksak tampi nah mu lai ding” a rak ti
cia bang tukin a tak in a thleng ( Johan 1:50 ).
Ca siar mi : The Beginning of signs
