A Thihnak Lam Pan in

Hlat deuh ah a va feh ih leilung ah a bok ih, “Ka Pa, a cang thei a si ahcun hi tuarnak khuathai hin i luatter hram aw! Asinain ka duh vekin si hlahseh, na duh vekin si koseh,” tiah thla a cam.Matt.26:39

          Jesuh hi leitlun ih a tlanlen laiah kum thum lai Pathian thu au pi in caan a hmang ti kan thei. Cui kumthum sungih a hnaṭuannak pawl kan zoh tikah mangbaza tampi a tuah, mi na a dam ter, zeng a feh ter, mit caw khua a hmu ter, khawsia pawl a dawi, natnak tintian a dam ter, asinan cu tluk ih thil ti thei Jesuh cu misual pawl ih khen beh in thihnak a tuar. Mi cak cu a hnakih caklo in an kai, thiltithei cu a hnakih thil ti thei lo in an hrem, huham nei cu a hnakih huham nei lo pawl in an that, ziangruangah cu vekin thil a cang thei ti ruah tikah thil cang maimai a si thei lo ti cu a fiang.

1. Harsatnak a hrial lo

          Jesu’I nunnak hi kan zoh tikah, mi dang a dam ter, harsatnak tuarmi pawl a bawm, thihnak ihsin mi a run suak rero laiah amah sawn riangri harsatnak nasa zet a tuar. Hi bangtuk harsatnak pawl hi rin lo pi in Jesuh in a tur lo, a tur dingmi pawl hi a hlan khan pi’n a thei cia ṭheh.

          Cuih caan thokin Jesuh in a dungthluntu pawl hnenah, “Jerusalem ah ka feh ding ih hotu pawl, puithiam upa pawl le Daan zirhtu pawlih kut ah harnak ka tong ding. In that ding, a sinain ni thum hnuah thawhter sal ka si ding,” tiah fiangtein a sim.  Matt. 16:21

          Dungthluntu pawl cu an zatein Galilee ih an tonkhawm awk tikah Jesuh in an hnen ah, “Milai Fapa hi milai kutah pek a si cing ding ih an that ding. Matt.17:22

          “Ngaihnik uh! Jerusalem ah kan hung feh ding ih cutawkah Milai Fapa hi puithiam upa pawl le Daanthiam pawl kut ah an thlen ding ih that dingin an rel ding. ¹⁹Cuih hnuah Zentail mi pawl kut ah an thlen ding. Cun Zentail mi pawl in an hmuhsuam ding, an vuak ding ih thinglamtah ah an kheng ding. Matt.20:18

          Jesuh in a tuar ding le a thih ding thu hi a hlan khan ihsin a dungthlun pawl hnenah voi thum rori a sim cia. Curuangah a tuarmipawl hi a theih cia lo ih tuar a si lo ih a thei cia ṭheh ti cu a fiang. A tuar dingmi pawl hi a hlan khan ihsin a thei cia ṭheh ko nan Jesuh in cui tuarnak pawl cu hrial a tum lo lawlaw, a hanṭuannak ah harsatnak a um hi hrial a tum lo ih tuar ding a hmaika ih a um mi pawl cu a tuar vivo sawn.

          Pathian hna kan ṭuannak ah hin harsatnak hi tong lo ding kan si lo, harsatnak hi ziang vek hna khal ah siseh khui tawk hmun khalah siseh a um ringring. Harsatnak hrialtu pawl hin an ṭuannak ah hlawhsamnak an tong ṭheu ih harsatnak pahtlantu pawl in hlawhtlinnak an co ṭheu. Harsatnak a um pei maw ti hnakin harsatnak a pahtlang thei pei maw timi hi zumtui nunnak ah a thupi zetmi a si. Pahtlang ṭulmi harsatnak hi zumtu’i lam tluan ah a phah aw ve ti hi kan theih cia dingah a ṭha.

          Jesuh hi Pathian a sinak ah ziangkim a ti thei ko nan minung a sinak in a tuar dingmi hi a huphurh/hreh zet ve. Matt. 26: 39 ah hi tin thla a cam :

“Ka Pa, a cang thei a si ahcun hi tuarnak khuathai hin i luatter hram aw! Asinain ka duh vekin si hlahseh, na duh vekin si koseh,”.Jesuh hi Pathian a si ruangah a tuarmi pawl hi awlai te’n a tuar ah kan ruat ding a si hrimhrim lo, minung a sinak ihsin tuar a si vekin na a thei, har a thei, thi le sa nei a si. Curuangah a tuar dingmi pawl hi a har ding zia a theih cia ruangah Pa’i hnenah luat dingin a dil, hmansehla “na duh vekin si ko seh” tiah a ti. Jesuh hi mi dang hrangah ahcun Pa’i hnenah a dil ṭheu nan Ama’i hrangah a dil dah lemlo, hi ṭum ahcun a luattheinak dingah a dil. Ziangtluk in a huphurh ve ti langtertu a si. Ziangruangah hi tluk huphurh cing si in a pah tlang thotho ti hi zoh tlang sehla.

2. Pai duhnak ah a ṭhum aw

          Jesuh in a tuar dingmi pawl huphurh cingih a tuarnak hi Pa’i duhnak, khawkhan a si ruangah a si. Mi ih hmuh suam, nautat, vuak velh a tuar hi a ṭonṭaih le cah lo ruangah a si lo, duh sehla amah dodaltu pawl siatsuah dingah harsatnak a um lo.

          Ka Pa hnenah bomnak ka dil a si ahcun hmakhatte ah vancungmi ralkap bur hleihnih hnakih tam a run thlah thei ti hi na thei lo maw? Asinain cu bangtuk in sisehla Ca Thianghlim in a cang ding tiih a sim ciami cu ziangtinso a kim thei ding?” tiah a ti. Matt.26:53-54

          Jesuh in a luatnak ding hrangah thla a cam rualrual in “Asinain ka duh vekin si hlahseh, na duh vekin si koseh,” a ti tikah Pa’i duhnak ih a ṭhum awk zia a lang. Jesuh in “Zokhal keimah thlun a duhtu cu amah ih duhnak kha taan in a thinglamtah phur in i thlun seh” a ti.  Pathian hi kan duhnak ti kimtu ding lawngih kan duh a si ahcun zumtu in a lamzin a ṭhelh thlang tinak a si. Pathian cun kan duhnak cu in theihsak ih in tuahsak ṭheu ko. Thukam hlun lam ah: Lot kha tlangpar ih tlan ding ih an fial tikah ka thleng thei zik lo, a zaizet mi kan hmai ih khua ah si sawn seh ti’na dil ih Pathian in a siang (Sem.19:19). Cun Israel pawl khalin Siangpa hrang an dil tikah Pathian in in a siannak a pe ti kan hmu thei. Pathian cun a mi pawl ih duhnak hi a namnuai men lo, cumi ah zumtu in kan ralrin a ṭulmi cu kan mai duhnak lawng famkim ter dingah Pathian kan beisei pang ding ti hi a si. Kan duhnak hnakin Ama’i duhnak sawn hi thupi sawn ah ret ringring ding kan si. Jesuh khal in a hnakih mi nauta pawl ih hmuhsuam a tuar rero hi Pathian ih duhnak lamzin a si ti a theih feng ruangih tuar a si. A Pathian sinak ih a thilti theinak tiang hmuhsuamnak ih an hman khal dai te’n a tuar. Mah hnak ih cak lo, tenau sawn ih dekcok tuar hi thil harsa zet a si.

3. Zo hrang ka tuar ti a thei

          Pathian in a Fapa neih sun a pek hi leilung mi pawl hrangah a si, nun an neihnak dingah, luatnak a co theinak dingah, thiam an co theinak ding hrangah a pe a si. Cumi cu kan run san a si ti hi Jesuh in a theih keukeu ruangah a tuarnak hi har zet cingin a tuar khawsuaknak san a si. Curuangah Jesuh in Pa’i duhnak pakhat lawngih tuar a silo ih nang le kei in duhdawt ih kan zawn in ruah tuk ruangih tuar a si. Kan co dingmi hi hremhmun Hell meipi a si ti theih tuk ih cui hmun ihsin kan luatnak ding hrangah a nunnak tiang liam in a tuarnak a si. Amah a khentu pawl hrang khalah a tuar zia cu thinglamtah parih a aunak aw in kan thei thei.

Jesuh in, “Ka pa, an sualnak run ngaithiam aw. Ziang kan tuah ti an thei lo,” tiah a ti. Luk.23:34

          Nang leh kei hrangah si lo bang sehla:

          1. Jesuh hi minung ih a rung can a ṭul lo ding.

          2. Jesuh hi Mi ih hmuh suam a tuar a ṭul lo ding.

          3. Jesuh in Golgotha (Luruhhmuh) a thlen a ṭul lo ding.

          4. Jesuh in thinglamtah a put a ṭul lo ding.

          5. Jesuh in khenbeh a tuar a ṭul lo ding.

          Hiang pawl hmuahhmuah hi nang le kei ruangah a tuar a si. Curuangah kan hrang a tuarnak thuanthu hin kan nunnak ah hmual a nei lo a si ahcun riahsiat za ngaingai a si ding. Na hrang Jesu’i tuarnak thuanthu na theihmi in na nunnak ah hna a ṭuan dah maw? Pathian hnaṭuannak ih ka daithlan zik tikah, ka paih lo can le a hmin men ih ti ka tum can ah, cu vek ih um ngam lo ding ih i tuah tu cu Jesuh Khrih ih tuarnak a si.