Joshua
hi kan theih lar zetmi a si ih Izip
ihsin a suakmi lak ah Kanaan ram thleng a si. A nunnak zoh tikah soisel ding a
um lo nasa, mi fel, Pathian ṭihzah leh thulung zet a si ih Moses ih ai a awh ih
Israel pawl Kanaan ramlutpi tu a si. A nunnak ihsin thil pathum zir sehla.
1.
Kum 60 sung training
Joshua
hi Izip ramah sal dinhmun in kum 20 a um
hnuah nelrawn ramcar ah Moses bawmtu dinhmun in kum 40 sung caan a hmang,
hruaitu a si hlanah kum 60 sung mi dang kut hnuai ah caan a hmang. Pathian cun
copcilh (direct) in mi a hmang rero ko nan training mi a pek hmaisat mi khal
tampi an um.
-
David hi siangpahrang a si hlan ah tuu khal in a
um.
-
Josef
hi uktu a si hlahah sal dinhmun ah a ding.
-
Samuel
khal puithiam Eli kung sungin a ṭhanglian.
-
Elisha
khal Elijah dungtlun in caan ah mang.
-
Dungthluntu
pawl khal Jesuh in a hnen in a zir ter hmaisa.
Pathian in zirh duhmi in neih ruangah midang hnuai ih in ret caan khal a
um ṭheu. Zir ṭul ti lo ih dinhmun sang ih din duh
hngal kan si ding hi a phan um nasa. Pathian in mi zir pawl hi a duhsak cuang
ih a hmang hleice ti lam a si lo, Pathian in a kawhmi pawl hi a zirter ṭheu
sawn a si.
2.
Pathian thu thleng a thupit ter
Pathian
thu thleng a thu pit ter timi in a sawh duhmi cu : a hmai ih pah ṭulmi thil hi
a thlira ciamciam ih a ngam zawng a si le a tuah, a ngam lo zawng a sile a tuah
lo, ti a si lo. Pathian thu thleng sawn hi thupi ah a ret ih a hmaiah ziang vek
thil huphurh um a thleng hmanah a pah vivo sawn. Minung cun hna kan ṭuan ding
tikah ziang vek a si ti kan zingzoi hmaisa ih kan ngam zawng leh ti thei ding
awm ih kan theih awk a si le kan tuah ṭheu.
Kanaan
ram thling thlatu ah khan Joshua hi a tel ve, Kanaan ram minung pawl tumzia le
cah zia khal a thei ko, asinan Kanaan mi pawl tum leh cah zia ah a buai ve lo
ih Pathian thu sawn a thupit ter ruangah Israel pawl Kanaan ram cu la lohli
ding in thanzang a pe. Joshua ih nunnak kan zoh tikah a lei kum siar zawng cun
a tar zet hmanah cak zet le ralṭha zet in Pathian hrangah a nun a hmang.
3.
Midang thawn ṭuantlang theimi a si.
Joshua
hi hruaitu a si hlan Moses bawmtu dinhmun ih
a din lai ihsin midang thawn ṭuan tlang ringringmi a si ih amah ten a
tal dah lo, ral donak khalah amah te’n ral a do dah lo. Midang thawn ṭuan tlang
thei mi si hi zumtui’ nun ah a thupi zetmi a si. Pathian hi ziang kim tithei a sin
an vangcungmi pawl thawn an ṭuan tlang, Jesuh khal ziangkim ti thei a si ko,
minung tello khal in tuah a duhmi a tuah thei ṭheh ko nan midang thawn a ṭuan
tlang. Midang thawn ṭuan tlangnak hin pumkhat
sinak, duhdawtnak, ngaihsak awknak lang tertu a si ih khat le khat ngainat
awknak thlentu khal a si.
Zumtu
sisi mi dang thawn ṭuan tlang thei lo kan si ahcun kan zumtu pi pawl kan ngaina
lemlo tinak a si. Midang thawn lawnglawng in kan ṭuan ding tinak lam a si lo ih
kan mah in ṭuanmi hna tampi kan neih a si khal le midang thawn ṭuan tlang
theimi, midang pawl mi si ihi zumtu nun mawi pakhat a si. Midang thawn ṭuan
tlan thei lo hi: midang rinsan lonak, mai thu duh tuknak, mi dang rinsan lonak,
mi dang ngainat lo nak ih rah a si. Pathianmi cun midang thawn an ṭuantlang
thei ṭheu.
