Jesuh leitlun a len laiah dam lo tampi
a dam ter, dam lo pawl a dam ter tikah thu a cah ṭheumi cu, “ Zo hnen hmanah va sim hlah”, ti
hi a si. Minung ruahnak ahcun: Jesuh in mi a damter thu hi mi dang hnenah sim
ter sawn sehla mi tampi in an thei dingih Pathian Fapa a si zia thei in an zum ding nan si kawh, timi ruahnak
a um. Asinan Jesuh cun a dam ter mi pawl hnenah midang hnenih sim lo dingah a
cah sawn ṭheu. Luk.8:39 lawngah Jesuh in a dam termi hnenah a damnak thu sim
dingih a fialnak thu kan hmu thei. Cu lo cu an damnak thu sim lo dingah a cah
tlangpi ( Mk.1:44; 5:43; 7:36; Matt.8:4; 9:30; Luk.5:14).
Jesuh in an damnak thu rel lo dingih a
cahnak san hi : 1) A dammi pawl in an ruahawk dan ding hnakih sang in ruat aw
in an uarawk a phang a si thei.
2)
A ratsan bik a si lo ruangah sim ṭul a ti lo tla a si thei. 3) Pathian thu
simnak ah mipi ih hnaihnokank a tam ding ti a phan ruangah leh thil dang
ruangah tla a si thei. Ziangruangah Jesuh in an damnak thu sim a khap timi, a
khamnak san lam pang hi sim tummi a si
lo ih, a khamtu Jesuh ih nunnak ihsin zir in thazang lak ding sawn hi hi ca in
a tumtahmi a si.
1. Jesuh in a thilti ṭhat
a rel/suang dah lo
Jesuh in mina tampi a dam ter ih mi
tampi ih harsatnak a ti fel sak. A thil tuah ṭhatmi hi rel ding sisehla rel
ding a nei tam nasa. Asinan Jesuh cun mi hnenah: cu mi nu ka dam ter, ka bawm,
ka tuahsak…tvp hi a rel dah lo, midang sawn in a thil tuahmi pawl an rel sawng ṭheu.
Cu hman cu a kham cingin an relmi a si.
Kan ni minung cun kan thil ti ṭhatmi
hi mi dang hnenih rel hi nuam kan ti ih a rel kan phur thei zet. Kan thil ti ṭhatmi
hi mi dangin an thei lo pang ding ti phangin a relnak ding remcang kan hawl ṭheu.
Khawvelmi pawl cun va tuah ko hai seh, kan ni zumtu, Khrih dungthluntu pawl cun
kan thil ṭha tuahmi hi kan mah in rel ciamco ding kan si lo. Jesuh cun a
dungthlun pawl thu a zirh tikah: thla nan cam ah siseh, rawl nan ulh ah siseh
lang hngan in va tuah hlah uh, a thup te’n tuah sawn uhla a thupte ih nan
tuahmi a hmu tu Pathian in ṭhat man a lo pe ding, tiah a ti. Jesuh cun mi
dangih theih ah siloin a thup te ih tuah dingin a zirh.
Zumtu kan nunnak zohsal hnik uh si,
thilṭha kan tuahmi hi midang ih theih lo ih a um ding hi pamhmai kan ti maw? Mi
dang ih theih dingih tuah men lawng siloin kan tuahcia mi khal mi dang theih
ter ih phar ciamco hi zumtui’ nundan ding a si lo, Pathian in a theih cun a
tawk timi sawn hi kan ṭhum awknak si sawn seh. Mi ih thil ṭha an tuahmi
phuanzar hi sual a si tinak lam siloin mi dang ih an theih ding beiseinak thawn
kantuah ding a si lo.
2. Jesuh in sunloih,
cawimawinak a hawl lo
Jesuh in a ti dammi pawl hnenah, an
damnak thu midang sim lo dingih a fialnakin a langtermi pakhat cu mi dang ih
sunloihnak le cawimawinak a hawl lo zia a si. Sunloihnak leh cawimawinak hawl
si bang sehla a dam termi pawl hnenah an damnak thu hi a than ter vivo mai
ding. Jesuh cun midang ih sunloih leh cawimawi ding beisei in ziang thil hman a
tuah dah lo. Minung hnen ihsin thangṭhatnak ngah ding ka hawl lo
(Johan 5:41). Keimah ih hrangah hminthannak ka hawl lo (Johan 8:50).
Zumtu cun kan thil tuahmi par lawngah
siloin ziang lutput in kan tuah?, timi hi zoh tel ringring a ṭul. Kan thiltuah
mi cu a ṭha zet tla a si thei, hmansehla mai hmin thannak hrangih kan tuah a si ahcun Pathian ih duh zawng a si
cuanglo. Pekduhnak thinlung cu Pathian hnen ihsin a rami a si, asinan mi in a
nih cu peknak ah a uar a um nasa, in ti ding beiseinak thinlung cu Pathian hnen
ihsin a rami a si lo. Cuvek in kan thlacam, kan rawl ulh, kan khawm teimak, kan ṭuan teimak nak pawl hi mi
dangin “ a nih cingcing” in ti ding beiseinak ruangih tuah kan si ahcun Pathian
hrangah cun thilṭha ten/fih um a si. Pual khalin Thesalon khuami pawl hnenih ca
a kuatmi ah hi tin a ngan : Nanmah ih hnenin siseh, midang hnen
khalin siseh, thangṭhatnak ngah kan duhmi a si lo
(1
Thes.2:6).
3. Jesuh cun midang
hnen ihsin hlawknak ngah sal ding a beisei lo.
Jesuh in mi dang hrangih thil a tuah
tikah an hnen ihsin ngah sal ding nei in thil a tuah sak dah lo. Damnak a ṭulmi pawl hnenah damnak a pe, ngaithiam ṭulmipawl a
ngaithiam, bom ṭulmi pawl a bawm,
harsatnak a neimi pawl an harsatnak a sut kian sak, hiang thil pawl a tuah
tikah an hnen ihsin hlawknak ngah sal beisei ih a tuahmi a um lo, mi dang hrang
ih hmanaw mi leh mi dang hrangah a nunnak tiang a pe sawn. Mi dang hrangih a ṭhatnak
hi ṭhatnak ih an sam sal lo hman ah vuivainak a nei dah lo. Mi dang hrangih a ṭhat
zat hi Jesuh in an hnen ihsin thil ṭha ngah sal ding siseh la a parih ṭhatnak
suah tu ding hi mi ziangzat meng an si ding, an tam zet ding.
Zumtu,
Khrih dungthluntu kan nunnak zoh fel aw cio sal sehla, mi dang parih ṭhatnak
kan suah tikah kan parah ṭhatnak ih in sam sal ding kan beisei maw? An hnen
ihsin ziang tal ngah sal ding thinlung kan nei maw? Mi dang parih ṭhatnak kan
suah mi pawlin kan parah ziang tal an tuah sal lo tikah bom tlak lo ah kan ruat
ṭheu maw? Lungawi hna khal an thiam lo tikah kan mawh thluk ṭheu maw? Khawvel
dan ih kan thlir a si ahcun cu vek minung cu an par ih ṭhatnak suah sal dingin
kan paih nawn lo tla a si men thei. Asinan zumtu cu mi in kan parih ṭhatnak an
suah sal ding beisei ih thil ṭha tuah ding kan si lo ih mi dang hrangih mi ṭangkai/
mi thlawsuak si hi kan si dan ding sawn a si. Mi dang hrangah kan hman awknak
pawl in ziangtal kan kan hnenih an tuah sal lo tikah sung zet ah tla kan ruat
aw a si men thei, asinan kan sung hrimhrim lo. Minung in kan parih ṭhatnak ih
in sam sal lo a va si hmanah Pathian, ziangkim hmutu in kan ṭuahmi hmuahhmuah a
hmuh ṭheh ih a lak pakhat hman a um cuang lo.
Jesuh
ih tlangpar thuzirhnak ih kan hmuh theimi cu:
A
lo duhtu lawng nan duh a si ahcun ziangah so Pathian in laksawng a lo pek ding?
Siahkhongtu hman in cu bangtuk cun an tuah ve a si! 47Nan rualpi ṭha
pawl lawng nan biak ṭhat a si ahcun mi dang nan hleihnak ziangso a um cuang?
Pathian bia lomi hman in cuvek cu an tuah a sisi! An hnen insin
thil ngah sal ding ṭha a um ruangih in ṭhatnak kan suah a si ahcun
khawvelmipawl thawn kan danglamnak a um lo. Zumtu pawl cun ngahsal ding
beiseinak tello in mi dang parah ṭhatnak tuahtu ding kan si.
