Ka duhdawtmi pawl,
atu cu Pathian faate kan si zo; asinain ziang bangtuk kan si lai ding ti cu a
fiang hrih lo. Sikhalsehla Khrih a rat tikah cun amah bangtuk kan si ding ti
kan thei; ziangahtile amah a si vek cekci in kan hmu ding. 1 Johan 3:2
Hi
baibal cang kan zoh tikah a dotdot rori in thil pa li a rel. Cucu a tu ih kan
sinak, a fiang hrih lo mi kan si lai dingmi, a fiang cia mi kan si lai dingmi
leh thil ra thleng ding pawl an si.
1. A tu ih kan sinak : Pathian faate
Kan
zate’n tluksiatnak ruangah Satan ih fa kan si ti cu rel ṭul lo in kan theihmi a
si. Satan fa kan sinak ihsin zohman in Pathian fa ah kan tuah aw thei lo. Amah
Pathian sawn ina Fapa Jesuh Khrih hmangin hrinsalnak in tuahsak nak thawngin a
fa si theinak kan nei. Zo ih fa kan si timi hi kan theih ṭulmi cu a si ih zo ih
fa kan si ti kan theihnak hin zo ih duhnak in kan feh ding ti in thei ter.
Jesuh in kei ih rawl thaw bik cu ka pai’ duhnak tuah hi a si a ti bangtukin kan
duhnak lawng ruatih kekar ding kan si lo ih kan Pai’ duhnak sawn zohih feh ding
kan si.
2.
A fiang hrih lomi kan sinak
A tuah
Pathian faate kan si cu kan fiang ih Jesuh Khrih a ratsal hlan ahhin ziang bangtuk
kan si ding ti hi a fiang hrih lo. Pathian fa cu sisi khawvel mi vek ih nung
mai maw kan si ding, Pathian fa rinum, Pathian fa hlathlau, Pathian fa mi ze,
Pathian fa dawngdah, Pathian fa fello ha kan si lai ding. Tu ah ziang vek in
Pathian fa na sinak na hmang ih hmailam ah ziangvek so maw na si leh ding?
Pathian fa rinum, thianglim, nun mawi, mi bawmtu, mi ṭangkai si thei vivo
sehla.
3.
A fiangciami kan si lai dingmi : Amah bangtuk
Khrih a
rat tikah amah bangtuk kan si ding ti hi thu fiang fai loa si lo ih thu
fiangfai cia a si. Hi thute hi ziangtlukin duh a nung! Tu ah hi ti kan si ih
amah bangtuk kan si ding ti hi mitthlam ih suangtuah tikah ziangtluk ih direm
thlak a si. Tu ih kan sinak ahhin kan diriam lonak a um ko ding, asinan cui ni
ah cun amah bangtuk kan si ding cu a diriam thlak tuk. Zuamnak leh hlawhnak ih
kan si thei dah lo dingmi sinak cu Jesuh Khrih a rat tikah kan co thlang ding,
Haleluiah! Jesuh Khrih leitlun ih a rungṭum hmaisa ah cun kanmah rundam dingih
rungṭum a si ruangah kan mah bangtuk in ka piang, kan mai sinak ( minung sinak)
la in a rung. Asinan voi hnihnak a rat sal tikah cun kan mah baangtuk a sin awn
lo ding ih kan mah sawn hi amah bangtuk kan si thlang ding. Hi thu hi a thleng
lai dingmi si khal sehla thufiang kan theih cia theimi a si. Amah bangtuk in:
1.
A
sunglawimi ruangpum kan nei thlang ding.
2.
Thihnak
ih tham ban nawn lo kan si thlang ding.
3.
Natnak
ih neh lo takpum kan nei thlang ding.
4.
Siatnak
phunkip ih neh theih nawn lo kan si thlang ding.
5.
Thianghlim
famkim kan si thlang ding.
6.
Amah
tluk kan silo ding nan amah vek kan si ding.
4.
Amah a si vek cekci in kan hmu ding.
Zumtu
kan zate’n in rundamtu Jesuh hi a tak rori ih hmu caak lo kan um ka zum lemlo,
hmuh kan caak cio ko ding. Tu ah cun mit thlam lawngin kan suang tuah thei ih a
sinak cekci thei fiang tu zohman kan um lo. Asinan a rat sal tikah cun amah a
si vek cekci in kan hmu thlang ding. In rundamtu a si vek cekci ih hmun ngah
ding tluk ih diriam thlak hi a um thei nawn pei maw? In runtu Jesuh Khrih a
ratsal ding thu hi mi tampi in zum lo in ziangah rel lo khal hai sehla kan ni
zumtu pawl hrangah cun hi hnakih kan beisei mi thil dang a um lo. Ni nikhat ah
a rung sal ding ti khal a fiang, a thutiam pelh dahlo a si.
“Galilee mi pawl, ziangah so van
zoh in nan din cuahco? Nan hnen ihsin vanih a kaimi Jesuh hi vanih a kai lai
nan hmuh vek cekci in a rakir sal leh ding,” tiah an ti. Tirhthlah 1:11 Van ih a kai so lai hmuh a si vek cekci in a ra kir
sal leh ding a si.
# Tu ih Pathian faa na sinak thei fiangin amai duhnak
sawn thupi ah ret aw.
# A fiang hrih lo mi na si lai dingmi ah a ṭhami si
zuam aw.
# Sinak hmuahhmuah lakih duh um bik Amah vek kan na si
lai ding.
# Jesuh a ra sal tengteng ding timi in van lamlo hoi ter seh.
