Baibal sungih kan theih larzetmi pawl
hi an thuanthu kan zoh tikah ṭonṭaihnak an neih zia a lang. Kan tarlangmi hi
sinak,mizia lam ih an ṭonṭaihnak siloin thil ti fuh lonak lamih an ṭonṭaihnak sawn a si. Kan mah khal ṭonṭaihnak kan nei ve ih ziangvek in ke kan kar ding? Ṭontaihnak hi dungsipnak ih hmang ding kan si lo.
1.
Adam : Pathian thu thlun loin a nupi thu a thlun. Sem.3:17
2.
Noah : Sabit ti ri in a lawngfang
kheh hman thei lo in a um. Sem.9:21
3.
Abraham : A nupi rori ka farnu a ti. Thu
dik tumsawn a thup. Sem.12:12
4.
Lot : Mai fa hman hliah thei lo
khop in sabit ti a ri. Sem. 19: 33
5.
Isaak : A nupi cu ka farnu tiah a ti. Sem.26:7
6.
Jacob : A U le a pa a bum. Sem.27:36
7.
Moses : Mi a that. Suah. 2:12
8.
Aaron : Israel pawl cawlem a tuah
sak. Suah.32:4
9.
Samson : A thuthup a phuang ih a thih
phah. Thuṭ.16:17
10. Eli :
A fa le ṭha te’n thu a sim lo. 1 Sam.3:13
11. Sual :
Pathian thu thlun loin that dingmi pawl a zuah. 1 Sam.15:7-8
12. David : Mi
nupi a ihpi. 2 Sam.11:4
13. Solomon :
Milem bia ah a cang. 1 Siang.11:4
14. Jesuh dungthlunpawl : Jesuh an phat san ṭheh.
Marka 14:50
15. Paul :
Zumtu pawl a hrem. Tirh.8:3
16. Piter : Zentail
pawl hnenah rawl a ei duh lo. Gal.2:12
Baibal
sungah Pathian mi pawl ih an ṭonṭaihnak hi tampi a um ko ding ih hi pawl hi a
tlangpi thu ih kan tarlan mi an si. Hiang pawl in cahnak/tlinnak ( strength) an
nei ṭheh ko nan an cahlonak lawng tarlan a si. Hi ca tawi in in in zirh duhmi
cu:
1.
Mi famkim zo hman kan um lo : Zumtu tampi in Pathian hnaṭuan tu pawl hi
ziang si maw ti diklo mi an neih hin zianghman ih rel nawn lo, hnon mai duhnak
thinlung kan nei ṭheu, hi thinlung put hi a dik bik lo. Pathian hnaṭuantu an si
ruangih fel/ṭha famkim ih kan ruah a si ahcun kan mai mawh tinak a si. Zo cio
khalin ṭonṭaihnak (weakness) kan nei ṭheh timi hi kan theihpit awk a ṭul. Mi
cahlo ding kan duh tinak lam silo in cahlonak an nei ve, timi kan thiehthiam
pit tikah an hrangih thla za cam sak le thazang pek hi kan ti ve dingmi a si ti
kan thei thei ding.
2.
Tha nau lo dingah : Pathian hnaṭuantu ṭhen khat cu ziang si
maw ti dik lo a um tikah, “ kei cu ka tling lo” ti lungput an nei ih hmailam ah
ṭuan duh nawn lonak ah an hmang, hi lungput khal a dikmi lungput a si cuang lo.
Ziangkim ah dik lonak nei riai lo ih um kan zuam rualrual in dik lo thei ka si
ti kan mahlal khalin kan theih a ṭul. Pathian pakhat lawng hi sual/palh thei lo
a si. Kan ṭonṭaihnak hi thanaunak ah hmang in kan tlin tawk ih zuam sawn ding
kan si. Baibal sungih kanmi uar zet pawl khal ṭonṭaihnak an nei cio nan Pathian
hrangah an tlin tawk in an ṭuan sawn, ti hi kan thazang laknak ding ah si
hramseh.
3.
Mi nautat lo dingah : “Zawng in a mai tawk cak hmu loin a rualpi ih
tawcak a hnihsan” timi thufim bangin minung hi kan mai ṭonṭaihnak hmu aw lo in
midang ṭonṭaihnak lawng hmu ih mi nautat a awl te. Mi ṭonṭaihnak khan au tatnak
ih hmang ding kan si lo, Pathian mi taktak pawl hman hi bangtuk ih ṭonṭaihnak
an neih ve a si ahcun kan ni khal an dinhmun ah ding ve sehla ziang kan si
cuang lo men thei.
4.
Pathian rinsan dingah : Minung hi kan mai lam ṭonṭaihnak kan hmuh lo asile
Pathian rinsan lo a awl te. Hi lei kan um sung cu ṭonṭaihnak nei ringring ka si
ti thei sehla Pathian hi rinsan lo in kan um ngam lo ding. Kan ṭonṭaihnak in
Pathian lam in hawi ter tu si hramseh.
Mai Ṭonṭaihnak theih hi Cahnak a Si.
