Jesui’ Suahnak in a Langtermi

          Jesuh suahnak thu hi sim ren thei lo mi thu a si ih zumtu pawl hrangah thu sunglawi tak a si. Tui ṭum khalah Jesuh a suahnak hin ziang thil pawl a lang ter timi hmangin tha zang kan la tlang ding. Jesuh Khrih a suahnak in a langtermi pawl cu:

1. Pathian ih duhdawtnak

a) Palung suak a si lo :Jesuh hi a mai palung suak ih rung suak a si lo ih Pathian in leilung a duhdawtnak ruangah in pekmi sawn a si. Pathian in leilung hi a duhdawt zet ruangah a Fapa neihsun a pek ih amah a zumtu hmuahhmuah cu thi loin kumkhua nunnak an co ding Johan 3:16. Thukam Hlun lam kan zoh asile Pathian in a mipawl hnenah a duhdawtnak lang terin a duhdawt thu a sim ṭheu ih thil a phunphun a tuah ṭheu. Langsar zet pakhat cu Pathian in Israel a duhdawt zia langter dingah Hosea kha hlawhhlang a neih ter. Pathian in a duhdawtnak a langtermi lakih a tumbik mi cu leilung a duhdawt ruangih a Fapa neihsun a pek hi a si.

          Tlonnak ruangah a si lo : Pathian in leilung hi a zoh ih an hnen ihsin thilṭha ngah duh ah a tlawn a si lo. Minung cun mi pakhat hnen ihsin thila pakhat khat ngah beiseimi kan neih a si le tlwn lungawinak ah ziang si maw kan pe ṭheu. Pathian hrangah cun leilung hi a tlawn ṭulnak hia um lo, ziangah ti le sualnak ih a khatmi, a ral, amah duhdawttu an um lo nak ram a si. ­Pathian cun kan hnen ih thilngah ding beisei a neih ruangah si lo in kan mah sawn in kumkhaw nunnak kan ngah theinak dingah duhdawtnak in a Fapa neih sun in pe  a si.

          Leiba ruangah a si lo : Pathian in a Fapa in pek hi a leiba a si lo. Pathian in kan hnenah ziang leiba hman a nei lo,leiba rulh nak hrangah a Fapa in pe khal a si lo. Minung cun leiba rulhnak hrangih ziang si maw kan pek awkmi a um ṭheu ih cu vek cu tuah ding hrimhrim thil a si. Pathian in a Fapa in pek  hi a tuah ding awm a si ruangah a tuahmi thil a si lo. Mi in kan parah thil ṭha an tuah tamtuk ruangih an par ih thil ṭha kan tuah ve hi cu thil awm a si. Minung in Pathian hrangah thil ṭha kan tuahtam tuk lawmmam ih cu ruangah Pathian in a Fapa hi pek ve ding awm ih a theih ruangah in pe a si lo. A duhdawtnak loiloi ruangih in pekmi a si.

Pathian in

a Fapa in pek hi

 a tuah ding awm a tuah a si lo,

a DUHDAWTNAK ruang sawn ah a si.

2. Pathian ih rinumnak

          a) A thutiam parah : Jesuh Khrih leilung ih a rung suah hi minung vekin suah dan pangai ih suak ve men a si lo. Pathian khal in leilung hrangah ka Fapa hi pe hnik keng ti in tla cop thilih in pek mi a si lo. Leilung hrangah Jesuh pek a si ding thu hi Thukm hlun lam ihsin Pathian ih kam cia mi a si ih a suah tik ih thil cang ding pawl khal a rak sim ciami tampi a um. Pathian cun a thuitam vekin a Fapa cu leilung hrangah a pe ih thil thleng ding a sim ciami pawl khal a kim ṭheh a si. Curuangah Jesuh Khrih a suak ti kan theih vete’n Pathian hi a thutiam ih a rinum zia a lang. ...A tiamkammi hmuahhmuah cu a tuah suak, A ṭong ih tuah thluh an si Mip.23:19.

          Pathian hi a thutiam ih rinum Pathian a si vekin a hnenih thu tiam si tuahsal lo tivek hi a hua. A mah ih tiammi a tuah ṭheh bang tukin a parih thutiam kan tuahmi cu tuah tengteng ding kan si. Mi pakhat in Bawipa ih hnenah thil pakhat pek dingin thu a kam-awk tikah siseh, a si lole thil pakhat tuah lo dingin thu a kam-awk tikah siseh, cuih a thukammi cu a bal sal lo pei. Ka ti ding a timi cu kimtein a tuah thluh pei Mip.30:2.

          b) Thuphan a per lo : Rinumnak in a ken telmi cu thuphan per lo hi a si. Mi rinum pawl in thuphan an per dah lemlo. Thuphah sim tampawl hi cu mi rinum lo an si tlangpi. Curuangah Jesuh Khrih a suak timi in Pathian hi thuphan a per lo zia a lang ter. Pathian cu thuphan per hmang milai vek a si lo, A thinlung a thleng leuhleuhmi milai vek khal a si lo Mip.23:19. Satan cu thuphan hmuahhmuah ih pa a si ih a sungah thutak a um lo, Pathian cu thutak a si ih a  sungah  thuphan hrimhrim a um ve lo thung

Satan sungah thutak a um lo ih

Pathian sungah thuphan a um ve lo.

Rinum Pathian a si.

3. Tlai dah lo Pathian 

            Pathian in a Fapa Jesuh Khrih in pe ih cumi cu  a tikcu te ciah ah hi leitlun ah naute dinhmun in a ruang suak Gal. 4:4. Pathian hi ziang tik hman ih tlai dah lo Pathian a si ih  minung in tlai ih kan theih hmanah Pathian cu a tlai dah lo a mah le tikcu te ah cangvai ih phuang suak aw ṭheutu Pathian a si. Kan theih lar zetmi Lazaras thuhla ah fiang zetih kan hmuh theimi cu Jesuh hi a rat ding an beisei caah ah a thleng lo ih a ra thlen tik ahcun a phunnak ni 4 lai a liam zo. Curuangah Martha leh Mari cu Jesuh an hmuh tikah  lungzui in an ṭap. Hmansehla Jesuh hi a tlai lo ih thlan sung ihsin Lazaras cu a kai tho. Thukam hlun ah Abraham nunram in kan zoh khal asile Abraham in a fapa neihsun a sun that zik zawngte ah Pathian a phuang aw. Hi thu ihsin kan zir theimi cu Pathian cu tlai ih a lang hmanah ziangtik hmanah a tlai dah lo, curuangah zumtu cun Pathian ih cangvaihnak hi thinsau in hngak ding kan si. A caan caan ahcun zumtu hi kan man hlap a ṭul caan  a um ih cu vekin a caancaan ahcun thin sau ih kan hngah ṭul caan khal a um.

 4. Phahniam awknak 

           Jesuh hi minung ih a suah hlan ah Pathian a sinak in  a um zo mi a si. Sersiam mi si lo in Amah kha sersiamtu a si. Asinan kanmah ih rangah sersiamtu cu minung dinhmun ah a rung ding. Cutiin “Nauhak pawl,” tiih a kawhmi a minung pawl cu thi le sa a neimi minung an si ruangah Jesuh khal cu anmah bangtuk in thi le sa nei-ah a cang ih milai sinak thawn a nung ve Heb.2:14. Minung kan sinak ah zo cio khal dinhmun niam lam pan hnak in dinhmun sanglam pankan duh cio. Tu kan sinak hnak ih sangsawn, sunglawi sawn, ropi sawn, lian sawn, tum sawn si kan duh ṭheh. Hna kan ṭuan khal asile tu ih kan dimhmun hnakih hna sang kaih kan duh ṭheh. Cozah leh company hnaṭuan kan ṭhim asile thil ti sual pawl khi hremnak peknak ah an hnaṭuan an ṭhum ṭheu.

          Jesuh cu minung ih a rung can hi kanmah in lainatnak ruang liolio ih a rung phahniam awknak a si. Phundangin kan sim a si le Sersiam tu cu a sersiammi minung pawl dinhmun la in a rung suak a si. Cu ai-ah, Amah ih lungtho tein, a sinak hmuahhmuah a taansan ih, hnen-um sinak la tahratin, Minung ah a cang ih minung pianzia in a piang Fil 2:7. Minung hi kan mai hlawknak ding zawnte ahcun kan phahniam aw thei zet vek a bang nan kanhlwknak ding si cuang lemlo thilah cun phahniamwkhnak in lak vung awk hi kan ti thei sawn. Zumtu cu Khrih keneh thluntu kan si bang tuk in tlinlo cin nei khal nungna thei tawk in phahniam aw ih Pathian hrang nung ding kan si.

Minung cu :

          Kan lian lo khal le lian vek ih um,

          Kan fim lo khal le fim vek ih um,

          Ziang kan si lem lo khal le thupi tak vek ih um,

          Kan thiam lo khal le thiam vek ih um

          Kan neih lo khal le nei vek ih um

          Kan cah lo khal le cak tak vek ih um

          Kan niam zetkhal le sang tak ih ret aw

 hmangmi kan si. Jesuh sawn cu:

          Sersiamtu asinan sersiam mi dinhmun ah a ding

          Ropi bik  asinan nauta  bik ah a ret aw

          A sangnak ih um asinan  a niamnak lei ah a leng

          Ti damtu asinan natnak tintian a tuar

          Ziangkim ti thei asinan minung kut sungah pek a si.

          Ziangkim neitu asinan zianghman nei lo ah a ding.

          Jesuh Khrih kan hrangah a suak ti cu thu tawite a si ko nan a suahnak hin Pathian ih sinak leh kan hrang a pekawknak a natsat zia a langter a si.