Leibel sungih thlarau rothil ( 2 Kor.4:7)

Sikhalsehla hi thlarau rothil a cotu kannih cu leilung in tuahmi beel bangtuk lawng kan si; ziangtin tile a saang bik thuneihnak cu kannih ta si loin Pathian ih ta a si, ti langternak ah a si. 2 Kor.4:7 ( TEV )

Asinan huham nasazet cu kanmah ihsi suak siloin , Pathian hnen ihsi suak a si sawn ti lang ter dingin cui hlawn thil cu leibel sungah sungah kan nei a si.

2 Kor. 4:7 (KJV)

          Leibel sungih thlarau rothil timi thu kan zoh tlang dingih, Bible version dang dang ih a lang dan a bang awk lo vekin hi thupi hrangah version  pahnih kan hmang ding.

1. Leibel leh thlarau Rothil

          Leibel hi a hmin bangtuk in leilung ih tuahmi a si ih leivut ih tuahmi kan mah minung pawl in sim duhnak a si Sem.2:7; Sam. 103:14. In tuahtu cu Pathian a si.

Leibel tuahtu pawl in bel an tuah tikah a tuahtu ih duhdan pianghmang ih tuah a si. A tuahtu in a thinlung ihsin pianghmang a suai mi kha a tak in leibel ah a tuah. Kan nih minung pawl hi in tuahtu Pathian in Amai duh dan, ṭha a ti dan ih tuahmi kan si. Thil tuahtu hmuahhmuah lak ih thiam bik, pianhmang suai thiam bik Pathian ih tauh mi kan si Isai.45:9; 64:8; Rom.9:21, Haleluiah. Kan taksa pian hmang, kan sunglam um dan, kan taksa peng pawl ih an hnaṭuan dan hi zingzoi sehla beel tuahtu ( in tuahtu ) Pathian ih thiam zia a lng tam deuhdeuh. Nang mah te sem men na si lo, lei leh van tuahtu Pathian ih semsuahmi, tuahmi na si.

          Rothil a timi ih sim duhmi cu kanmah minung siloin Khrih sunlawinak lang tertu Thuthangṭha tleu lole Sersiamtu Pathian, amah kan theinak kha rel duhmi a si. A awl zawngin kan sim asile Pathian hin Khrih Thuthangṭha theihtheinak in pe, cui Thuthangṭha theihtheinak ih pekmi kha rothil a si. Mi tampi, mi fim ,mi thiam pawl in hi thu hi an thei thei lo. Thuthangṭha kan timi hi minung fimnak theihnak men ih theih a si lo. Pathian in theihtheinak, hmuhtheinak, fengthainak in pek lawng lawng ah theih theimi a si 2 Kor.4:6; Luk 24:45. Cumi a fengnak cu cui rothil kha lei rothil a ti lo ih thlarau rothil a ti ruangah thlarau rothil cu Pathian lawngih pek theimi a si. Minung sinak in a theih theimi cu lei lam thil lawng a si, tlarau lam thil theihtheinak cu minung piangpi theihnak ah a um lo. Curuangah Khrih ih Thuthangṭha thei ngahtu, co ngahtu na si ahcun Pathian in theihtheinak ro sunglawi a lo pek ruangah a si. Pathian hnenah lungawi thu sim aw.

          Thlarau rothil a ti tikah a sunlawinak hi lei rothil vek men a si lo zia a fiang hngal.

# Lei rothil cu a siat thei, Pathian ih in pekmi thlarau rothil cu a sit thei lo.

# Lei rothil cu ruk a theih, thlarau rothil cu ruk theih lo.

# Lei rothil cun thlaphannak mi a pe ṭheu, thlarau rothil cun hnangamnak

  mi a pe.

# Lei rothil cu sumpai in lei a theih, thlarau ro thil cu Pathian hnen lawngin

   ngah a theih. Lei sum le saw in lei a theih lo.

# Lei rothil cu an hlo thei, thlarau rothil cu a hlo thei lo.

Hi tluk a sunglawimi ro cotu kan si ahcun ziang ruangah Pathian hnenah lungawi thu sim lo in kan um thei ding. Lei sum le saw in petu hnenih lungawi thusim ngah lo hman kan phang a si ahcun thlarau rothil in petu Pathian hnenih lungawi thusim ngahlo ding hi phan a um sinsin lo maw?

2. Leibel cu:

a) Thil man khung a si lo : Khua hlan san lai khal ah bel hi a phunphun a um ko ih lei bel cu mi zo poh khalin an neih theimi thil man awl a si. Kan ni hi leibel vak fang kan mah ah uanawknak ding um lo, mi dang vek thotho kan si.

b) Thil retṭhatnak ah an hmang : Leibel hi a hmannak phunphun a um hnuaihni ko ding, cumi lakih an hmannak pakhat cu casual, ca thuppi leh thil ṭha pawl thuh ṭhatnak ah an hmang ṭheu. Cui mi zulh in Pathian in Pual hnenih a phuanmi thu cu “thlarau rothil a cotu kannih cu leilung in tuahmi beel bangtuk lawng kan si” tihi a si. Kan mah cu leibel fang kan si, Pathian in kan ṭhat hleicet ruangah, midang hnakih kan cuanghmuar ruangah a rothil retnak ah in hmang a si lo, midang vek men thotho kan si ko. Cucu kan mah lamah uarawknak ding, uanthuannak ding kan neih lo zia lang tertu a si. Khat lam ah kan sim asile Pathian in a rothil hi mi hleice, a cuanghmuar, mi thiamsang, milian, mi cak pawl lawngih co dingah a ret lo. Thlarau ro thil cu hleicetnak neih ruangih co a si lo ih Pathian zangfahnak ruangih co a si. Phu ruangah leh co awm kan si ruangih co kan si lo timi kha a cin a ṭul. Paul in leibel thu a rel tikah khalai san ih an hmanmi a si ruangih run hmang men a si lo ih thlarau rothil a sotu kan mah hi leibel vek fang kan si ruangah a hmanmi a si sawn.

# Kum rei lo te daih kan sin an kan sungah kumkhaw daih a ret.

# A ṭoih theimi ah a  ṭoih theilo mi a ret.

# A siattheimi ah a siat theilomi a ret.

Pathian hmin thangṭhat si ko seh. Minung cun kan roṭha pawl hi thil holam te men ah kan ret siang ṭheu lo, asinan Pathian cun leibel fang a simi pawl hnenah rosunglawi a ret.

c) A kuai awlzetmi a si : Leibel cu leilung ih tuahmi a si bang tukin amah te um menah cun a kuai mai lo nan thil dang thawn an khawn awk tikah cun a kuai awl zetmi a si. Kan ni khal leibel bangin a derdai mi, a kuai awl mi kan si, cumi cu ziang a langnak ding hrangah a si ti len huham, thilti theinak cu Pathian hnen ihsin a suakmi a si zia a langnak dingah a si. Ziang ruangah cumi, khami pa cu a cak a si kan ti? ti sile kan cahnak kan suah khalih kan tuah thei lo mi an tuah thei ruangah a si. Kan tuah mi cin tuah thei pawl khi mi cak kan ti dah lo. Asinan huham nasazet cu kanmah ihsi suak siloin , Pathian hnen ihsi suak a si sawn ti lang ter dingin cui hlawn thil cu leibel sungah sungah kan nei a si.

2 Kor. 4:7 (KJV).

          A kuai awl zetmi leibel kan sinak hin kan mah ah huham cahnak, thilti theinak a um lo cu pawl cu Pathian hnenih a um zia a lang ter. Curuangah leibel a si mi kan ni ih thilti theinak a nei mi Pathian hi kan ṭul ringringmi mi a si.

Asinain Bawipa cun, “Hreitlung in a hmangtu hnakin ka tum sawn, a ti thei pei maw? Hluah in thing attu hnakin ka thupi sawn, a ti pei maw? Talhtum in minung a keng lo; minung in talhtum a keng a si,” a ti. Isai.10:15

          A netnak ah hi thu hi kan hngilh lo dingmi a si. Kan thlacamnak hmangin mi an dam, khawsia an tlan, mangbangza a thleng a si ahcun Pathian ih thil ti theinak ih  thleng a si.