Satan ih Ralthiamnak ( Part 2 )

Fimvarte in um uh! Ralringte in um uh! Nan ral Satan cu deh ding

hawl ah a huuk reromi kiosa bangin a tawi a vak zok rero a si. 1Pit.5:8

Curuangah Bawipa in, “Na tivek cun si koseh. Na kut sungah a um a si. Asinain amah cu na that lo pei,” tiah Satan kha a ti. Job.2:6

            Hmaisa ah Satan hi bumtu a sinak zawn ih a cangvaih dan ngan lang a si zo ih tu ah Siatsuahtu a sinak zawn ih a cangvaih dan kan zoh ding.

          1. A hmuitinmi        : Na Taksa

          2. A hriamhrei         : Harsat tuarnak

          3. A tumtah             : Thinsau lo dingih tuah

          4. Khawmawknak din   : Pathian zangfahnak

1. Satan ih Hmuitinmi  : Na Taksa

          Satan in na thinlung lo bum zawngih a lo neh thei lo a si len na taksa siatsuah  a tum ding. Rul a sinak
in mi a bum ih Kiosa a sinak vek in mi a deh. Satan ih thuphan simmi kan lung asilen kan mah le kan mah kan siat suah aw ding ih a bumnak kan pah tlang thei a si ahcun kan taksa ah a ṭuan/do  thlang ding. Job nunnak ihsin vun zoh tlang sehla. Job kha Satan in a beih tikah : Ril ih rah a fa pawl an thi ṭheh, nuntu khawsaknak a si mi an ranrual pawl an cem ṭheh ih tlunah a mai taksa hi hmahnai in a tuam ṭheh. A tuarnak ih ruangah a rualpi pawl khal a kiang ah ṭong thei  lo in zarhkhat sung an um ih a nupi khal hin Pathian cam siat ding tiangin a forh a si kha (Job 2:9).

          Thuthangṭha bu 4 kan siar khal asile Satan in mi tampi ih taksa siatsuah zawngih a cangvaih zia kan hmu thei. Ṭong thei lo in mi a tuah ( Matt.9:32,33), ngor  leh el kun in mi a tuah ( Luk.13:11-17), nauhak pakhat merai nat nei in leh tidai ah leh meisa ah mahte siatsuah aw dingin a tuah. Curuangah Satan in na taksa siatsuah a tum ti hi cu a fiang nasa.

          Ziangruangah Satan hi kan taksa siatsuah ding cu a duh? Kan taksa siatsuah a duhnak san pawl cu:

(a)  Kan taksa cu Pathian biakinn a si ruangah:

Nan ruangpum cu Thlarau Thianghlim biakinn a si ti nan thei lo maw?...Curuangah nan taksa cu Pathian sunlawinak ah hmang uh. 1 Kor.6:19-20

Ka duh bikmi le ka hngakhlap zetmi cu ṭuanvo ka neihmi hi tuahsuak hram ningla…… ka thinlung ka taksa zate thawn Khrih hi upat hmaihngalnak pe thei ningla, tihi a si.Flip.1:20

            Pathian hi hmuh theih a si lo, Jesuh Khrih khal takpum cun van ah a kai so zo ih hmuh ding a um nawn lo, hmuh theih ih a ummi cu zumtu, Khristian; taksa rori ih Pathian sunloih, cawisang tu pawl kan si.

          A hlo ral cuahco mi leiluang ih phuangsuak aw dingah Pathian in kan taksa hi hman a duh a si. Zumlo tu pawl cun an mahte ngai cun Bible an siar lem lo ding, Pathian thu zir in ca tla an siar lemlo ding, asinan zumtu pawl ih kan nunnak cu in siar a si.

Caken dang kan ṭul lo, nanmah hi kan ca nan si; mi hmuahhmuah

theih ding le siar dingin kan thinlung ih nganmi ca nan si. 2 Kor.3:2

            Satan in kan taksa a dodal timi umzia cu Pathian in leitlun a duhdawt zia  leh a zangfah zia langternak dingih a hmanrua kan taksa a dodal tinaka si. Sersiammi pawl cun Pathian ih huham, fimnak leh sunlawinak an langter, Khristian pawl cun Pathian ih duhdawt, zangfahnak kan lang ter.

(b) Kan taksa cu Pathian ih hmanrua a si ruangah :

Nan taksaṭhen ziangkhal thil ṭha lo sual tuahnak ah nan hmang

lo pei. Cuhnakin thihnak ihsin nunnak ih thawhtermi bangin nan ziangzongza Pathian hnenah pe aw sawn uhla nan nunnak

zate thawn thil ṭha tuahnak ah hmang sawn uh.Rom6:13

            Pathian in lawng tuah a duh tikah Noah leh a innsang a hmang, Puan thlam sak dingah zungthiam Bezalel leh Oholiab leh bawmtu a hmang, Mipi hnenih sang leh nga zem dingah dungthlun pawl ih kut a hmang ih thuthangṭha phuang dingah  an hmurkaa a hmang, Pathian in hi lei ih a hna ṭuan suak dingah mi kip ih taksa kha Thiang thlarau thomnak in a hmang a si.

          Satan in “Pathian ih hmanrua pawl dodalnak in Pathian ih hnaṭuan hi ka ti bahlah thei ding” ti a thei. Rom.6:13 hi a ṭonghram Greek ahcun Pathian ih hmanrua  lole hriamnam kan si zia lamthu  a lang. Fapa khalin hi lei ih a hnaṭuan hlensuak dingah lei taksa nei ih a runlang bangin Thlarau thianghlim in kan taksa a ṭul. Curuangah lei taksa ngai nep tahratin ka harhdamnak, cahnak lam kan ngaih thah asilen Satan in Pathian hnaṭuannak ih hman tlak lo dingih tuah in tummi ah kan pil tinaka si.

(c)  Kan taksa hi Pathian ih robawm a si ruangah:

Sikhalsehla hi thlarau rothil a cotu kannih cu leilung in tuahmi beel bangtuk lawng kan si;..2 Kor.4:7

            Pathian in rundam tikah kan sungah kumkhaw nunnak ro sunglawi a ret a si. Hi ro sunglawi a umnak kan taksa tak hi Satan  in siatsuah a duhmi a si. A ro sunglawi cu a siatsuah thei lo nan a ro bawm kan taksa hi cu a siatsuah thei.

2. Satan ih Hriamhrei  : Harsat tuarnak

          Satan in siatsuah a tummi cu kan taksa a si zia kan tar lang zo ih cu mi siatsuahnak ding hrangah hriamhrei ih a hmanmi cu harsat tuarnak a si. Cumi a fengnak dingah Job ih harsat tuarnak thu kan tarlam zo vekin a si. Job ih dinhmun kan zoh tikah beidon thlak tak a si. Hmansehla Job cu Pathian hmaiah rinum takin a um ih a netnak ah sunloih leh thlawsuah vur sal a si.

          Himi ah kan theih ṭulmi cu Satan hin Pathian ih siannak tello in Job kha a tham thei lo. Zumtu pawl par ih harsatnak thlen ding khalah Pathian hnen ihsin siannak a ngah lawng ah a si.

          Jesuh in, “Simon, Simon, ngaihnik! Lothlo pa in fang cu a fangngai

le a hii a thiatdan ṭheu vekin Satan in nanmah lakah thiatdang

dingah le nan zatein hniksak dingah thu a ngah zo. Luk.22:31

            Curuangah kan parah harsatnak pakhat khat a thlen tikah Pathian in  sian cin a si. Harsatnak hi Pathian in kan mah nun in simnak dingih  a thlen termi a um rual in Satan in in siatsuah duh ruangih a thlengmi a um a si.

3. Satan ih tumtah        : Pathian duhnak ruat lo ih thinsau thei lo dingah

          An tuar thei ruangah mi lungawi an si, kan ti. Job ih thinsaunak

kha nan thei zo ih Pathian in a netnak ah famkimin a pek ti khal

kan thei. Ziangah tile Pathian cu zaangfahnak le lainatnak neitu

a si.James.5:11

            Satan in Job a beih tikah thinsau loin beidong mai ding a ruat men ding; Job hi a rualpi parah leh amah le mah parah a thinsau lo nan Pathian ih a rinnak a tlauthla lo. Thinsaunak hi zum tui’nun nak a thupi zetmi a si. Thinsau te’n kan um thei lo a si ahcun Pathian in in thei ter  duhmi, in zirhduhmi pawl thei ngah lo in kan um ding.

          U le nau pawl, nan hnenah hniksak harsatnak a phunphun a thlen

tikah mi vannei kan si tiah ruat aw uh; ³ziangah tile nan zumnak in cubangtuk hniksak harsatnak nan neh tikah tuar theinak a ra,

ti nan thei. ⁴Tlaksamnak zianghman um loin a famkim le pitlingmi

nan si theinak dingah a net tiang a tuar theitu si dingah zuam uh.James.1:2-4

            Nauhak pawl hi thil pakhat a cem tiang hngak dingah thinsau in an um thei ṭheulo, Cu bangin thinsau te’n um thei lo hi zumtu pitling lo um dan a si. Kan pianpi sinak hi thinsau lo a si hmanah Pathian thu ih ruangah nunthar neitu cu thinsau mi ah in tuah a si. Zumnak leh thinsaunak hi a thlun aw mi an si ih Thlarau ih rah khalah a tel.

          …..Cui innkil lungpi parah cun, ‘A hngetmi zumnak cu a thin a sau

fawn a si,’ ti in ka ngan. Isai.28:16

Mi zaangzel nan si ding cu kan duh lo; sikhalsehla Pathian ih in kam

ciami a cotu si dingah zumnak a neitu le thinsaunak neitu pawl

bangtuk ih cang dingah kan lo duhsak a si. Heb.6:12

Sikhalsehla Thlarau ih a rahsuahmi cu duhdawtnak, lungawinak, hnangamnak, lungsaunak,...Gal.5:22

            Thinsau lo nak cun cangsualnak ah mi a hruai ṭheu. Abraham kha thinsau in Pathian thutiam hngak thei hlawh khaw Hagar ihpi in Isamuel an nei in  buainak suak tertu a si.

          Siangpahrang Sual in thinsau in Puithiam Samuel hnak thei lo in thawinak rak pe khaw a siangpahrang tohkhawm a sung lual li.

          Gethsemane hmuanah Piter kha thinsau thei lo in nam in mi hna rak sat khaw Jesuh ih kawk a tong ih a nunnak humsaknak hrangah Jesuh in a satmi pa a dam ter a si kha.

          Curuangah Satan in thinsau lo ko ih ka tuah thei hai a si ahcun atthlak za ih nunnak ah le mahte harsatnak ih tlenawknak ah ka hruai thei ding ti a thei ih harsatnak hmangin in dodal ṭheu a si.

          Thinsaunak timi hi ca siar leh mi dang thu sim ngainak in ngah theih a si lo ih Pathian hniksaknak ihsin kan zir theimi a si. Thinsau leh zumnak lamih mi pitling si ter in duh ruangah Pathian in harsatnak kan parah a thlen ter ṭheu.

          Thinsau thei lo ih kan um a si ahcun Satan cu kan mah ah hna a ṭuan ih dinhmun derthawng tak, thutluknak dik lo tuah mai ding dinhmun ah kan ding a si. Hi vek dinhmun ih kan din caan ah kan humhim awknak ding Pathian in in pe a si.

4. Kan humhim awknak ding : Pathian ih zangfahnak

          2 Kor,12:7-10 ih kan hmuh bang tukin Job bangin Paul khal in natnak a tuar ve nasa ti kan hmu thei, damnak hrangah thla voi thum a cam nan damnak a ngah cuang lo, Pathian hnen ihsin a donmi cu damnak si loin ka zangfahnak na hrangah a tawk ti hi a si. Kan taksa parih harsat tuarnak a thlen tikah Pathian ih zangfahnak lawng hi Satan kan neh theinak um mi a si. Thihnak tiang kan tuar caan khal ah Pathain zangfahnak thawn lawngin thinsau te’n kan um thei ṭheu.

          Cule caan malte sung nan tuar hnuah zaangfahnak in a khatmi

Khrih thawn nan pehzom awk ruangah amah thawn kumkhua sunlawinak hlawm aw dingih a lo kotu Pathian Amah rori in a lo famkimter ding ih hngetkhohnak le thazaang cahnak a lo pe ding.

1 Pit. 5:10

            Kan Pathian hi zangfahnak ih khat Pathian a si. Kan sungih in cencilhtu Thlarau hi zangfahnak Thlarau a si ih ( Heb.10:29), Pathian ih tokham khal zangfahnak tohkham a si( Heb.4:16), cun a thu khal zangfahnak thu a si (Tirh.20:32). A thok ihsin a cemnet tiang zangfahnak a si.

          Thinsau thei lo ih in tuah ṭheutu harsatnak hi kan par ih a thlen tikah

          Pathian hnenah tuk lutaw aw la,

          Patahin thu thawn tikcu hmang tam aw la,

          Pathian sunloihnak ding hawl aw

Cuti cun Satan ih a lo siatsuah tumnak thang ihsin na luat thei ding.

Khristian nan si ruangih nan tuar a si ahcun nan ningzak hlah uh;

Khrih hmin a kengtu nan si ruangah Pathian hnenah nan lung awi

sawn uh.1Pit.4:16

 Nangmah ti lungawi awk ih nun na tum  a si le Satan in a loneh dingih Pathian sunloih ih nun na tum a sile Satan a sung ding. Pathain zangfahnak lawng hi Satan kan doneh theinak ummi hriamhrei a si.

Hminsin :Warren w. Wiersbe ih nganmi The Atrategy of SATAN timi cabu ta a tawi zawng leh a remdan in let phat leh nganbet phahmi a si.