Satan ih Raldo Thiamnak ( Part 1 )

Johan 8:44 ....Anih in thuphan a per tikah amah ih si daan a thlun vemi a si, ziangah tile anih cu thuphan pertu a si ih thuphan hmuahhmuah ih pa a si.

Thup.12:9; 2 Kor.11:13; Sem.3:1-7

           Satan hin hmin/sinak tampi a nei ih cumi lak ihsin Bumtu a sinak zawn ih a hnaṭua leh a tumtahmi pawl kanzoh tlang ding.

1. Satan ih hmuitinmi : Na Thinlung ( Mind )

          Satan in minung hmaisa bik Adem leh Eve sual ih hruai luh a tum tikah nunau ih thinlung kha a sual/bei hmaisa. Cumi a fengnak cu :

          Ka phan mi cu: rulpi in a depdetnak in Evi a thlem ngah bangin nan thinlung ( Mind )

ṭhat lonak in a lo thlem ding ih kimzet le thiang zetih Khrih nan thlunnak hi nan tanta

pang ding tihi a si. 2 Kor.11:13

Ziangruangah Satan hin kan ruahnak a do? Kan thluak/ruahnak hi Pathian hmuihmel kan kennak pakhat a si ih Pathian in in pawlkomnak leh a duhnak in theih ternak a si ruangah a si. Thinlung hi thupi ah kan ret lo tla a si thei men, asinan Bible cun a thupi zet ti kan hmu thei.

          Nan thinlung le nan ruahnak a zatein siamtharmi si ṭheh uhla, ²⁴Pathian ih hmuihmel

kengih tuahmi, a ding le a thianghlim in a langmi nunnak dik, nan nun thar kha hruh-

aw uh.Efs.4:23,24

Hi khawvel daanah hin kop nawn hlah uh; cuhnak in nan thinlung kha tharthawh tahratin thleng aw sawn uh. Cutiin Pathian ih duhnak cu nan thei ding ih Pathian ih hmaiah ziangso a ṭha, ziangso a lungawi mi a si tile ziangso a famkimmi a si ti nan thei ding.

            Pathian in kan thinlung tharthawhnak in kan nunnak in thar thawh ih, kan thinlung cu a thu hmangin in tharthawh ṭheu a si.

          Satan hin thuphan lung dingin a lo kai ngah a si ahcun sual ih in hruai lut dingah kan nunnak ah hna a ṭuan thok ding tinak a si. Curuangah a si Satan hin kan kan thinlung a dodal hmaisatnak ṭheu, cun zumtu khal hin kan thinlung hi ralpa Satan ih dodalnak lakih sin kilhim awk a ṭul.

         

          Thunetnak ah, ka u le ka nau pawl, a ṭhami, porhtlak a si mi,

a taktak a si mi, upat tlak a si mi, a dikmi, a thianghlimmi,

duhnungza a si mi le hminṭhatnak a petu thil pawl thawn

nan thinlung cu khatter uh. Fil. 4:8

            Minung hi kan nunnak ah hi ziang vek in  kan hmang timi ah thil thupi zetmi cu kan thinlung hi a si. Satan hin in bum theinak dingah a betmi cu kan thinlung hi a si ih Pathian duh dan in kan nun theinak dingih a thupi mi cu kan thinlung hi a si.

* Hminsin : Hi tawk ih thinlung timi hi miring in Mind an timi a si/ heart timi a si lo.

2. Satan ih hriamhrei   : Thuphan

          Satan kha Eve hnenih a rat tikah rul, hrokhrawl bumtu dinhmun in a ra. Rul, bumtu, thuphan ih pa a si zia cu:

Rulhreng tumpi, khuahlan rulpi, Khawsia a si lole Satan tiih kawh mi, leilung pumpuluk mibumtu cu van ihsin an hlon. Thup.12:9

...ziangah tile anih cu a sungah thutak a um lo. Anih in thuphan a per tikah amah ih si daan a thlun vemi a si, ziangah tile anih cu thuphan pertu a si ih thuphan hmuahhmuah ih pa a si. Johan 8:44

            Satan in Eve kha tuphan sawn kha lung ter dingin a zuam ti hi thil thuipi zet kan theih ṭulmi a si. Thuphan sawn a lung theinak dingah Satan ih hnaṭuan dan cu:

          Pathian ih ṭongkam bat in thu a sut: “Hmuan sungih thingkung pakhat khatih ran nan ei lo pei tiah  Pathian in a lo ti ngaingai maw?” tiah a ti. A um dan cu Satan in a ṭongmi kha Pathain ih  ti ngaingaimi a si  maw? Pathian ih ṭongmi kha na rak theih sual si na hlam ti duhnak a si. Cun Pathian ih ṭhatnak bat ih thusuhnak khal a si, Pathian hi a ha ngaingai a si ahcun ziangruangah ei sian lo mi a neih thei.

          Zumtu khal hi Satan in Pathian ṭongkam leh Pathian ṭhatnak ringhlel dingah in thlem ṭheu. Kan innsang leh kan bulpak nunah thlasamnak, harsatnak tete kan tonmi ruangah Pathian hi kan hrangah a ṭha ngaingai lo a si hi timi thinlung kan si thlang a si ahcun Satan in Pathian ṭhatnak ringhlel dingah in buan ngah zo tinak a si.

          Pathian ih ṭongkam a dokalh : “Pathian in nan ei a sile nan ei ni lala ah nan thi ding” a ti laiah Satan cun “ Nan thi hrimhrim lo ding” tiah a ti. Pathian simmi do kalh in Satan in a ti.

         

          Tuini tiang ah zumtu pawl nunnak Satan in Pathian ṭongkam ( A Thu ) do khalin hna a ṭuan lai. “Bible a um nan, mi teh sual an tuah ih an siat cuang sawm, an tluang thotho a sisi” tiah Pathian ih thu sawn dungtun dingin in thlem ringring lai.

          Thuphan in a airawl: “..Amah vek nan si ding” timi Satan ih ṭong thawn pehpar in, Pathian in Adam leh Eve kha amai hmuihmel keng cia ih tuahmi an si. Asinan Satan cun khami hnakih sangsawn: Pathian vek/tluk si ter a tum, cucu Lucifer a si laiih a tum mi a  si. Isai.14:12-14

Satan hi Pathian betu si loin amah kha biakmi si leh renmi si a duh. Jesuh a thlem lai khalah “ Na khuk bil tahart in i biak ahcun..” tiah a ti. Pathian vekih ruah awknak hi tui kan sanah satan hin hmanrua ah  a hmang ih, minung thiamnak, fimnak a ṭhang sinsin ih Pathian a um zum nawn lo ih mah le mah Pathian tluk ih ruahawknak a tam vivo.

Eve hin Satan a let tikah tisualmi pathum a nei. Cucu sualih a tluknak khal a si.

1. Pathian ih ṭongkam a hlon: Sem.2:26 “....na duhduh (freely)in na ei thei” (NKJV) timi kha Sem.3:2 ah Eve in “ na duhduh in” tim kha a telh nawn lo. Cucun Eve cun Satan ih thang barhmi, pathian ih ṭongkam hlon, a pawk ngah thlang a bang. Zo khal Pathian ih ṭhatnak, zangfahnak kan hngilh deuhdeuh a si ahcun ai ai te’n Pathian ih duhnak thlunlo hramkan thok mai ding tinak a si.

2. Pathian thu a bet: “ a tham khal nan tham lo pei” ti mi Pathian ih a telh lo mi kha Eve in a bet. 1 Johan 5:3 ah “ A tupekmi cu..thlun har a si lo” a ti laiah Satan cun thlun harsa tuk ih theih ding leh thil thang sawn ngah ding vekin hna a ṭuan ṭheu.

3. Pathian ṭongkam a thleng : Pathian in “ cu lo le nan thi ding ( lest you die)” ti ih a ṭong lo kha nunau ih a bet. Cucun Eve cu Pathian thu dungtun in sual ah a tlu mai a si kha.

Pathian cun thutak hmangin a duhnak a famkim ter laiah Satan cun thuphan hmangin a tumtahmi a ti hlawhtling ṭheu. Satan cun hihi thuphan a si tiah mi a ti dah lo, ziangah tile bumtu a si.

3. Satan ih tumtahmi: Pathian duhnak ziangih rel lo

          Satan cun Pathian thu a do, ziangah tile Pathain thu cu Pathian duhnak lang ter tu a si.

          Maw ka Pathian, na duhnak thlun cu ziang tlukin so ka duh!

Na thupekmi cu ka thinlung sungah ka ret,” tiah ka lo ti. Sam 40:8

          Pathian thu (Bible) tello cun hihi cu Pathian duhnak rori a si ti theinak kan nei lo. Pathian cun a duhnak kan theih ih kan tuahsuak ding a duh.

          Amah in, ‘Kan pu le kan pa pawlih Pathian in amah ih duhnak

a theitu dingah le Miding pa hmutu dingah le amah ih aw rori a

theitu dingah a lo hriil zo a si.Tirh.22:14

Mi aa si hlah uh; Bawipa in tuahter a lo duhmi kha hawl tum sawn uh.Efs.5:17

Pathian duhmi cu nan thinlung zatein ṭuan uh.Efs.6:6

Zumtui hrangah cun Pathian duhnak tuah hi hna/ ṭuan vo vekih ruah ding a si lo ih, nuam kan ti dingmi a si sawn. Satan hin Pathian ih duhnak ziang rel lo ko in in tuah thei a si ahcun Pathian in kan hrangih thil sunglawi a timlammi pawl a siatsuah cih ṭheh a si.

Zumtu hin kan nunnak ah hin Pathian ih duhnak maw kan mahih duhnak sawn kan thupit ter tit la hi kan cek aw a ṭul. Kan duhnak hi Pathian hnenah kan dil lo ding ti lam a si lo ih kan duhnak hnakin a duhnak kha a tum nawn ih kan ret tengteng a ṭul. Kan duhnak kim ter dingah Pathian kan dil ṭheu bangin a duhnak kan mah ih kim ter dingah kan dil dah maw?

4. Kan kilhim awknak : Thawkkhum Pathian thu

          Bumtu  Satan ih siatsuahnak ihsin kan kil him awknak ding cu Pathian thu a si. Jesuh khal satan in nelrawn ih a thlem tikah a kilhim awknak bik leh a donak bik cu Pathian ṭongkam a  si. Pathian thu ih kan kilhim awknak ih kan hman dingmi a si vek in thil ṭulmi a um.

1. Pathian thu kan theih a ṭul : Tulai ahcun Bible ka nei thei lo ti vek rel ding khal a um lo, mah le ṭong in leh kan thiammi ṭong in Bible siar ding kan nei tam vivo zo. Pathian thutak zirhtu Thlarau thianghlim kan sungah ( Johan 16:13-15)a um  ih Pathian thu zirnak hrangah cabu ṭhaṭha siar ding a tam fawn, radio leh TV ihsin khalin Pathian thu ṭhaṭha ngai ding a tam ih Kawhhran ah Pastor leh hmun dangdang ihsin zirhtu ṭhaṭha pawl ih zirhnak ngai thei dinhmun ah kan ding fawn ih cu lo ah Pathian thu tehih theinak ding lam zin dangdang a um hrih lai. Curuangah Pathian thu kan thei lo tuk lawmmam a si ahcun kan mai mawh a si.

          A um zi a cu, Pathian thu siar/ study nak hrangah tikcu nei ding kan si. Pathian thu thei famkim ti a um thei lo nan kan thei tawk ih theih zuam ding kan si. Pathian thu siarnak ding hrangah can lawng um can bwn ding kan si lo ih cawn pe ih siar, ngai sawn ding kan si.

2. Pathian thu byheart a ṭul.: Jesuh hi ramcar ah Satan in a thlem laiah cabu a keng lo “ cathianghlim in a ti” a ti tikah a byheart mi a sim a si. Bible cang byheart tla hi Sunday school nauhak pawl ti ding ih ruah ding a si lo ih zumtu kan z ate hrangah a si. Cucu Bumtu lak ihisn kan kilhim wknak ding hrangah thil ṭul a si.

3. Ngunngaih ih hliakhlai a ṭul: Rawl kan ei  mi pumpi in a rial cip ih kan taksa hrangah thazang a si bang tukin Pathian thu kan hliakhlai hi kan thlarau lam thazang cahnak a si. Pathian thu hi a hmin men in ka siar ih a thu in kan duh men ha? A si lole manhlap ti zualzo vek in kan siar men? Ziang vek in Pathian thu kan nunpi zoh aw cio seh la,  Man hlap tuk ih raw lei hluathlo hnak in ciamciam ih rawl kan ei hi di a riam in  a man hla cuang bangin Pathian thu khal ciamciam le ngunngaih ih hliakhlai pawl hin an thatnak leh manhlat nak rel ding an nei ṭheu.

Na thupekmi pawl an thlum zia cu! Khuaitizu hnakin an thlum sawn. Sam.119:103

I pekmi na daan cu leilung pumpi ih sui le ngun hmuahhmuah hnakin ka hrangah a sunglawi sawn. Sam.119:72

          Pathian thu hliakhlai lemlo zumtu cu Satan pa in awlai deuh in a neh thei ṭheu.

4. Pathian thu kan hman a ṭul : Minung fimnak leh thiamnak a ṭhan hmanah cumi in Satan hi do neh theih a si lo. Minung ih fimthiamnak hin Satan a hleih thei lo ti hi kan theih a ṭul. Curuangah Satan kan donak dingah kan hman dingmi cu kan mai fimnak, thiamnak si loin Pathian thu hi a si. Satan, bumtu kan neh theinak umsun cu Pathian thu hi a si.

          Satan hin zumtu pawl in do tikah Pathian thu hi a si lo zawngin a hmang ve, curuangah Pathian thu lo cun kan do neh thei lo ding. Kan mai fimthiamnak hmangin kan do ih a satan, bumtu sawn in Pathian thu a hman ah cun kan cem a si ko.

          Satan, Bumtu lak ihsinna him theinak ding ah hi ca hmangin Pathian in lo bawm hramseh.

Hminsin :Warren w. Wiersbe ih nganmi The Atrategy of SATAN timi cabu ta a tawi zawng leh a remdan in let phat leh nganbet phahmi a si.