Ṭihhrut thu kan rel tikah pianpi sinak
ih ṭihhrut hrimhrim minung hi an um ih cuang pawl khal Thlarau Thianghlim
thawngin ralṭhatnak an nei thei ko. Tui ṭumih kan zoh tlang dingmi cu pianpi ṭihhrutnak
lam siloin kiang le kap ruangah maw mi dang vek kan si ve lo ruangih ṭihhrutnak
thu lam kan zoh dingih cui ṭihhrutnak lak ihsin ralṭhatnak kan neih theinak
dingah Pathian thu thawn thazang kan la tlang ding. Ṭihhrutnak hi a phunphun a
um ih tui ṭumih kan relmi cu mi lakih Pathian thu kan sim ding tikih ṭihhruh ih
in tuahtu lam kha a si ding.
1. Zirthiamnak niam ruangih ṭihhrutnak
:
A hmaisabik ah thusuhnak in thok
sehla, Zirnak nei mumal lo minung nan si ruangah ah mi hmai ih din ding kan ṭih
dah maw? Na kiangkap ah nangmah hnakih thiamsang an um ruangah an hmaiah dingih
thusim ding huphurhnak na nei dah maw? Kan rak tong dah tla a si thei, kan tong
dah lo tla a si thei. Hi vek dinhmun ih kan din tikah har kan ti caan a um ṭheu
ko ding. Ziang tin thazang kan la ding?
Tirh.4:13 ah kan hmuh theimi cu Piter
leh Johan cu fimnak leh thiamnak nei lo minung an si nan an theihmi Pathian thu
hi ral ṭha zetin an aupi ih khonsil upa pawl khal an mang a bang ṭheh. Fimnak,
thiamnak nei lo minung na si nak khan lo ṭhihhrut ter hlah seh. Jesuh khal in a
dungthluntu dingah fimthiamnak nei lo minung khal a hrelh lo a si kha. Pathian
in tu ih na dinhmun kha a thei, theilo pi in a lo ko lo ih na sinak niam zia
thei cing in a lo ko a si ahcun a lo ko tu Pathian ruangah ralṭha in um aw la
Pathian a cangvai mai ding. Pathian in mi sang khal a hmangih mi niamte
khal a hmang a si.
2. Mi in an thei zo ding:
Thu
na sim ding tikah “hi thu cu an theih cia bang a si awm tuk” tiah huphurhnak
nan nei dah maw? Pathian thu sim thiam tampi in thlenzonak biakinn ih thu sim ding
teh na huphurh dah maw? Pathian thu simtu pawl hin mi ih an sim hrih lo mi thu
hi sim thei vivo sehla kan duh cio dingah ka ruat. Thuthar hla thar hmangih mi
cawm theitu si hi a ṭha tuk. Cu mi tlun ih kan theih ṭulmi cu thuthar, hla thar
hi mi nuncawmtu ah Pathian in a hman ṭheu bangin thu thar lo khal Pathian in a hmang
a si. Pathian thu hi a hlun le a thar a um ti lam kha kan sim duhmi a si lo.
Jesuh khal thu a zirh/sim ciami hi voi
thum lai a sim sal ih cucu a thihnak leh thawhsalnak tu a si. Mark.8:31; 9:31; 10:33,34.
Cakuat pawl khal kan siar a sile duhdawtnak thu, zangfahnak thu, tlennak thu, thawhsalnak
thu, daan thu, nunsimnak thu, Jesuh ih thiseh thu, raithawitu ti pawl hi cakuat
tinah hmuh ding a um vivo. A thupi mi cu ziang a si ti le Pathian hnen hnen
ihsin a thu thei bet dingin zuam, siar sehla, cun Pathian thu kan sim ding
tikah Pathian hnenah ziang thu ka rel ding ti hlan sehla. Cu tawkah kan
thinlung sungih a langmi a si ahcun voi tamkan ral zomi thu a va si hmanah
Pathian in rel sal ṭul a timi tla a si thei. Pathian hnen ihsin a thu hla sim
ding mana thar nei dingin zuam aw la Pathain in sim dingih a lo theih termi cu
voi tam na sim zo mi a si khal le ralṭha in phuang aw, a ṭultu an tam tinak a
si.
3. Kan nun mawilonak :
A liam cia caan ih na sualnak, ṭhatlonak
in mi hmai ah dingin Pathian thu sim dingah ṭihhrutnak a lo pe dah maw? Thuanthu
mawi lo kan rak neihmi tete pawl hi Pathian thu sim dingah ralhrut ko ih in
tuah ṭheu tu a si. Bible sungah kan hmuh theimi cu:
a) Samaria
nunau, pasal panga nei in khawsungih Jesuh thu a thannak thawngin khawsungmi
pawl in Jesuh hi Runtu a si ti an theih phah Johan 4:28-30,42
b) Thukam
Thar ih ca kuat ngan tam bik Pual hman kha zumtupawl hrem rero tu a si.
c) Piter
khal kum thum sung a thunmi Jesuh, a Bawipa phatsan tu a si.
Pathian
in a liamcia caan ih kan thuanthu mawilo pawl ruangah in iai lo, cu hnakin
misual pawl hrangih a ṭhatnak tlang au pi sawn ding kan si. Pathian
hmai ka ah a cang thei tawk in thuanthu mawi neih ding zuam vivo aw la, a
liamcia caan ih na thuanthu mawi lo in lo ṭawnṭem hlah seh.
4. Kan Piansualnak :
Na piansualnak (kut,ke kimlonak)
ruangah mi lakih tel hi harsa na ti in kut ke suah ngam lo, kaa ang ngam lo in
nan um dah maw? Midang taksa vek na put ve lo ruangah na tha nau dah maw?
Pathian ten na vui vai dah maw? A caan ahcun Pathian thangṭhatnak
hmunih kan tel paih ṭheu lonak san cu kan taksa kim lonak
ruangah a si thei.
Aw le a tuar ve lo tu hrangah cun rel
men hi cu thil awlte a si men thei. Pathian thu ih thazang kan lak dingah ka
duhmi cu kutke kim mi pangai siseh kutke, taksa pangai lo khal siseh in
sersiamtu cu Pathian a si. Pathian kei bul ziangah hi vek in i sersiam na ti
men thei. Unau Pathian cun insersiam dan a bang aw lo nan in duhdawtdan cu a
bang aw so khaw, nang kutke pangai lo hnakin mi pangai pawlhi a duh hleicetnak
a um cuang lo. Ziang vek pian zia na si khal le a lo sersiamtu Pathian cun fate
hman a lo iai lo lawlaw a si. Curuangah na pianzia lamah si lo in a lo
sersiamtu in midang vek thotho in a lo duh a si tilam sawn kha thlir in Pathian
thangṭhat aw. Pathian lam na thlir a si ahcun na taksa mi bang lonak parah
Pathian na parih a ṭhat hleice zia kha na hmu ding.
Pathian cun sualnak ruangah kha vekin
a lo tuah a si lo, a sunlawinak langsuahnak ding sawn ah a si Jn.9:3. Taksa pangai ṭhepṭhep si Pathian thangṭhat
theimi minung pawlin thazang la ih Pathian an thangṭhat theinak dingah Pathian
in hman a lo duh tla si thei. Curuangah midang thazang petu dingah tu ih na
taksa pianzia te khan zingzak lo in Pathian hrangah dinpi aw, Pathian sunlawinak
a lang ding. Na dinhmun se lam kha tha naunak ah si lo in a lo sersiamtu in a
sersiammi nangmah kha tu ih na sinak vekciah khan a lo duh zia/a lo hnonlo zia thlirin Amah thangṭhat aw.
Ṭihhrutnak ihsin ralṭhatnak nun thawn
Pathian hrang nung vivo thei dingah Pathian in lo thlawsuah hram seh.
