Pathian thu simtu tampi in kan sim tamzetmi, sim hlawh zetmi, asinan dik si lo hi a um ih mipi khalin a dik ah kan ruat lawk mai theumi thu pali tui tum ah kan tarlang ding. Hi pali lawng hi kan sim diklo mi a um tinak a si lo ih, hi pali hi kan zate’n kan rel sual theh tinak khal a si cuang lo. Kei mah in ka theih tambikmi a si ih a hnuai lamah vun tarlang sehla.
1. Ṭih hlah ti hi Bible ah voi 365 a um. ( Do not be afraid )
“Bible sungah ‘ṭih hlah’ ti hi voi 365 a um ih kum khat sungah ni 365 a um, curuangah Pathian in ni tin in ṭih hlah tiah in ti ringring a si” ti ih thusimtu in an sim ṭheu hi a theitu kan tam zet ding tiah ka ruat. Hi thu hi thu duh um tak leh mi tampi
thazang paknak ah kan hman ṭheumi a si. Asinan Bible ah tha ten zingzoi sehla ṭih hlah ti cafang hi voi 365 hmuh ding a um lo. 365 kim ter kan tum hrimhrim a si ah cun ‘ ṭih hlah’ ‘phang hlah’ ‘Pathian ṭih’ ‘ thanau hlah’ tivek pawl thawn kom ciamco a ṭul ding, cu ti cing khal in 365 cekci hi cu a si thiam cuang lo ding. Cun ṭih hlah timi cafang hi hawl rero sehla hmuh thei zat hi Bible version pakhat leh pakhat a bang aw cio lo ding.Ziang version khal in voi 365 cu a kim theilo a si ding, tui ni tiangah ka hawl theu nan a Bible cang thawn voi 365 kim ko tar lang thei ka hmu hrih lo. Ka sim dik lo sawn a si ah cun mi in a um an ti ti menlo in a Bible cang thawn len hmanmi Bible thawn tarlang thei sehla.
Bible ah hin ṭih hlah timi hi voi 365 rak um taktak sehla tu ih kan sim theumi “ Pathian in nitin ṭih hlah in ti” timi thawn kop ter a rem nasa. A thupi sawn kum khat sungih ni um zat voi 365 a um hnak aiin ṭih hlah timi tongfang khat in kan dam sung a daih ding kha a si. Bible sungah ṭih hlah ti hi voi khat lawng um khal sehla kan dam sung ṭihnak umlo ih Pathian rinsan ih kan nun cun a tawk. Curuangah Pathian in ṭihhlah a timi kha kan dam sung kan hnangam pi a si ahcun voi 365 a um kher kha a ṭul lem lo.
Pehpar thu siar duh hrangah.. Bible ah Hlau suh tih 365 a in ziak em?
Pehpar thu siar duh hrangah.. Bible ah Hlau suh tih 365 a in ziak em?
2. Eden Hmuanah Hnaṭuan a Um Lo.
Thusim in an simmi voi tam kan theih theimi cu “Eden hmuan ahcun hnaṭuan ti a umlo, asilole, Adam leh Evi khal ah tluse lo hai sehla hnaṭuan a ṭul lo ding nan” tihi a si. Mi phun dangin te'n ti vekin an sim dah maw cu ka thei lo ih kan nih laimi lakah cun an rel theih ding a um hnuaihni. Laimi hi kan hnaṭuan a khungkhai tuk ruangah ah leh kan harsat tuk cuang ruangah hnaṭuan lo hi kan haheuh tuk maw thei hlah. Bible kan zoh asile kan hmuh thei mi cu Eden hmuan ah khan Adam leh Evi kha rak tluse lokhal hai sehla hnaṭuan cu a um thotho ding. Sem.2:15 Cun Bawipa Pathian in a seemsuah mi pa cu loram ṭuantu le kilkhawitu dingin Eden hmuan ah cun a umter. Hi Bible cang ah hin a fiang nasa ih Pathian in Eden human ih a um ternak san cu loram ṭuan dingah leh kilkhawi dingaha si sawn.
3. Khrih Thawngin Ziangkim Ka Ti Thei.
“Cahnak in petu Khrih thawngin ziangkim ka ti thei” timi thu hi a sual tinak lam cu a si lo, Jesuh khal in kei hnak in mangbangza na tuah thei sawn ding a ti kha. Pathian in zumtu pawl hi mangbangza tuahtheinak thawn in thuam ṭheu ko. Hi tawk ih sim duhmi sawn cu Phi.4:13 “Cahnak i petu Khrih thawngin/sungin ziangkim ka ti thei” timi hi dik lo ih kan lak/sim can a tam. Himi Bible cang tansan in “ zumtu cun khawsia a dawi thei, dam lo a ti dam thei, thil mak a tuah thei, cu vek kha vek a tuah thei” tinak ih kan hmang ṭheu hi cu a dik lo, Paul ih a sim duhmi thawn a pehpar lo lawlaw. Phi.4:11-12 siar sehla Pual in ziangkim ka ti thei a timi hi thil a tuah ih a va tuah lam si lo in tuarthei, si thiam thu lam a relnak a si sawn.Phi.4:11-13 Thungai ti ahcun ka neih zatte thawn lungkim zetih um ding ka thiam zo. 12Tlasam ih nundaan ka thiam ih neinung zetih um khal ka thiam zo. Cutiih umdaan thupte cu ka zir ngah zo ruangah khuitawk hmun hmanah le ziangtik caan khalah ka pumpuar in siseh, ka riilrawng in siseh, malte ka neih ah siseh, tampi ka neih khalah siseh, thinlung nuamte ih um ka thiam zo.13Cahnak
i petu Khrih sungin ziangkim ka ti thei.
Paul in ‘ka ti thei’ a timi hi thil va tuahlam a si lo. Tlasamih um khal a ti thei, neinung ih um khal a ti thei, pumpuar khal a ti thei ih rilrawn khal a ti thei, malte lawng neih khal a ti thei ih tampi neih khal a ti thei ti lam sawn kha a rel duhnak a si. Ziangvek dinhmun khal in a nun a neih cahnak petu Khrih thawngin cu ti vek pawl a neh/ a ti thei thu relnak sawn a si.
4. Saam Ngantu David
Saam hlabu hi mi pakhat ih ngan a silo ih David nganmi a tam bik ti men a si. Thu simtu tampi in Saam siar ding tinte’n David ih nganmi ti lawk mai hi theih ding a um phah phah. Tu san ah a titu kan tam nawn lo tla cu a si thei. Sam hi mi dangdang ih nganmi a si ih a ngantu theih lo mikhal an um. Saam ngantu leh an nganmi pawl tarlang theimi pawl tar lang sehla.
1. David : 3-9; 11-41; 51-65; 68-70; 86; 101; 103; 108-110; 122; 124; 131;
133; 138-145; 2 ; 95 ( Kom.75)
2. Asaf ( leh innsang ) : 50; 73—83 ( Kom.12 )
3. Korah leh a fa : 42; 44—49; 84—85; 87—88 ( Kom.11 )
4. Heman : 88 ( Korah fa le thawn)
5. Solomon : 72 leh 127 ( Kom.2 )
6. Moses : 90
7. Ethan , Ezrah hrin :89
8. Ngantu theihlo : 48 a um.( 48 nak si lo in 48 a um )
A tlun ih tarlang mi pawl kha kan zate ih ti sualmi si lo in simsual tam lam ih ka theihmi an si sawn. Mi dang ih ti sualmi mual phohawknak a si. Thu kan sim ding tikah kan mah in funfe ih kan theihmi hi sim uar sehla a tha. Mi ih an timi bang zet si rak diklo hi a um thei zet. Kan famkim lonak hi Pathian in in thei ih in hmangtu Pathian a si, Pathian thu theih famkim ti cu a um thei lo, asinan a cangthei tawk ih hliakhlai ding cu kan ti dingmi a si.
