Rundamnak
leh Tuahnak
Ziangah
tile nannih cu Pathian zaangfahnak zaarah
zumnak
in rundam nan si. Hi rundamnak cu
nan
ṭuannak ruangih nan ngahmi a si lo,
Pathian ih laksawng a si.
Cuhrangah zo hman porh awk ding a
si lo.
Pathian in kan ṭuan ding hrangih
a rak timtuah ciami
hnaṭuan
ṭha ṭuantu dingah
Khrih
Jesuh sungin kannih cu siamtharmi kan si.
Efs.2:8-10
Efesa
2:8-10 hi kan siar asile a tawite nan rundamnak thu leh hnaṭuan thu hla felfai
zet in a lang. Cun Rundamnak hi ziangvek in kan ngah ti leh ziang hrangah
rundam kan si ti khal hi fiang zetin kan hmu thei. Hi thil pahnih hi a kop ih
kan theih lo a si len rundamnak hrangah mai’ tuah ṭuannak ih ngah zuam a awl te
ih khat lamah zumtu kan nunnak ah hnaṭuan ṭha ṭuan ding khal daithlan a awl te
lala. Curuangah hi thu pahnih hi fiang zetih kan theih kop a ṭul a si.
1. Ṭuannak ruangih rundam kan si
lo:
Ṭuannak ti tikah hnaṭuan lam lawng
silo in minung lamih zuamnak pawl hmuahhmuah a huam ṭheh. Kan mai tuah ṭhatnak
thawngin rundam kan si tihi cu kan ramah a fehpi tu kan um hmanah kan tam tuk
lemlo dingah ka ruat. A hleice in
protestant lakah tla cun kan um lo ti sehla a
sual lem lo ding ah zum a um. Amahlawngte ṭuannak ruangah rundam kan si lo ti na
cingin sakhaw mitha siruang ih van kai dingih ruat aw cu kan tam vio men thei.
Pathian ih in rundamnak thu fiang cuang si lo ih zuri sabah ih umlo ruangah
hell tla dingah a ruat aw lo mi hi ziangzat tak um kei maw!
Pathian ih rundamnak, ngaidamnak co
ding khopih thil ṭha a tuah theitu minung ah zohman an um lo. Pathian in Amai
minung ih in cohlang ding tiangtiang ih thilṭha tuah thei khal kan um lo. Jesuh
san lai ih biaknak hruai tu Farasi leh
sadusi pawl khal that le fel lamah cun an tawk zet nan cui an ṭhatnak leh felnak
in a rundam thei cuang lo. Curuangah rundamnak hi a hlawh ih hlawh a si lo. Kan
fel ruangah, kan ṭhat ruangah, kan fim ruangah, kan thiam ruangah, kan mawi
ruangah, thil ṭha kan tuah ruangah, kan tlin ruangah leh thil pakhat khat kan
tuah ruangah rundam kan si lo. Kan thatnak, felnak pawl hmuahhmuah cu rundamnak
hrangah cun santlai lo zianghman lo men an si.
Rundamnak hi minung lamih kan
tuahṭuannak parih ṭhum aw a si ahcun rundamnak co tlak leh co tlak lo kan um
ding. Rundamnak kan timi cu co tlak an um lo ih co tlak lo khal an um lo,
ziangah ti a si le’n Pathian zangfahnak zarah zumnak in rundammi kan si. Van ah
kan thlen tikah mai ṭhatnak ruangih van thleng zohman kan hmu lo ding, Pathian
zangfah cop hlir kan si ding.
Kan
fel ruangah mi fel in ti lo ih Jesuh ruangah mifel nan si in ti.
Kan ṭhat ruangah mi ṭha in ti a si lo Jesuh ruangah mi ṭha tin in ko.
Kan
thianhlim ruangah mi thianghlim in ti a si lo ih Jesuih ruangah mi thiang tin
in ko.
Cuti
a si ruangah Pathian hmai leh minung hmaiah a porh aw thei kan um lo, Pathian
ih laksawng a si. Rundamnak hi Pathian ih laksawng a sinak cu:
In
rundam hi a leiba a si lo.
A
duhtling in kan um thei lo.
Sum
leh saw ih lei theih a si lo.
Tuahtuannak
ih hlawh theih a si lo.
Pathian
hmai ah famkim thei kan um lo.
Rundamnak
cu minung in cu ti ih kan tuah ruangah kan ngahmi a si ti thei kan um lo ih
Pathian ih lawngsawng a si. Curuangah porh aw thei, uang aw thei zohman kan um
lo ih rundamnak lawngsawng in petu Pathian lawng uan/suan ding kan nei.
2. Ṭuan dingih rundam kan si
Ṭuannak ruangih rundam kan si lo nan ṭuan dingih rundam kan si ti hi kan theih tengteng a tul. Ṭuannak ruangih
rundam kan si lo timi hi nasa ngaingai ih kan aupi bangtukin tuan dingih tundam
kan si thu khal nasa ngaingai ih kan aupi
dingmi a si. Rundam ka si zo vanram cu ka ta ti ih cawl huahhi thei ding
kan si lo. Cu vek zumtu pawl cu Pathian ih in rundam san thei lo tu pawl an si.
Thil ṭha tuah ih van kai tum hi
cawl/bansan ding kan si ih Pathian in kan hrangih a timtuah ciami hnaṭuan ṭha ṭuan dingah tan la ding kan si.
Cumi hrangih siamtharmi kan si. Rundamnak hrangah cun kan tuah ṭuanmi pawl
hmuahhmuah hi Pathian co hlan tlak pakhat hman an um lo nan rundam fa/zumtu
pawlih thilṭha kan tuahmi cu Pathian ih cohlan mi a si, ziang tluk in a
sunglawi. Thilṭha ti tikah kan mah ih tha ih kan ruahmi silo in Pathian in in
timtuahsak ciami sawn kha thilṭha a si. Curuangah zumtu cun kan mai duhdan ih
feh thei kan si lo ruangah Pathian hnenah thlacamnak thawn Bawipa ka hrangih na
timtuah ciami cu ziang a si, tuah dingih in duhsakmi ziang a si ti kha Pathian
hnenah kan suh ron a ṭul. Pathian cun kan hrangih a timtuah ciami hnaṭuan cu
kan hmaika ah kan tuah ding remcang zetin in hun sak theu a si.
Tuihlan ahcun thilṭha kan tuahmi pawl
hmuahhmuah hi Pathian cohlan tlak pakhat hman a um lo nan zumtu kan si hnu
ahcun Pathian hrangih hna kan ṭuannak ah co hlan tlak lo pakhat hman a um nawn
lo, a tenau em mai ti ding a um nawn lo, Pathian hrangah thil sunglawi an si ṭheh. Curuangah zumtu cun kan thei a
tawp suahin Pathian in kan hrangih a timtuah ciami hnaṭuan ṭha a ṭuan ding kan
si. Hi leitlun hi nasa zetih Pathian hna kan ṭuannak ding hmun a si, hi lei ih
Pathian hrang kan ṭuan lo a si ahcun khui tawk ah kan ṭuan nawn ding. Cui
hnaṭuan ṭuan thei dingah cahnak pekmi kan si Kol.1:29.
* Ṭuannak ih rundam kan si lo Ṭuan
dingih rundam kan si.
* Tuahmi in rundamnak ah in hruai
thleng lo ih rundamnak cun tuahnak ah in hruai sawn.
* Rah ṭha a suah lomi zumnak cu
zumnak dik a si lo.
