PA Pawlin An Innsang Hrangih An Tuahmi ( Fathers & what they had done for their families )

PA Pawlin An Innsang Hrangih An Tuahmi

            Bible sungah PA tampi an um ih cumi lak ihsin tarlangmi PA pawl in an innsang hrangah  thil an tuahthatmi kan zoh ding. Cui thil tha a tuahtu PA pawl in thatlonak zianghman an nei lo ti duhnak a si lo. Bible sungih PA pawl khal zohman mi famkim an um lo ih an tlinlonak rel ding a um ve ko. Hmansehla an tuahthatmi tete pawl kha kan zir dingah tarlang sehla.

1. Noah      : Innsang runhimtu ( Sem.6:22 )

          Noah hi amai san laiah Pathian mithmai tha co ngahtu mitha a si. Pathian in leitlun misual pawl tilik hmangih siatsuah a tum tikah Noah kha lawng tuah a fialih Amah le a innsang pawl siatsuah lo dingin Pathian in thu a kam. Pathian ih fial

bangtuk in Noah in a tuah theh, lawng a tuah sunghi kum 120 rori a rei. Cu tluk ih thil hautak a si ko nan Noah cun a tuah  theh, cucu a innsang pawl hrangah himnak hrampi a si. Noah khan Pathian ih fial vekin rak tuah lo sehla an himnak ve lo ding.

          Kan innsang ah Pa bik dinhmun in rel sehla Pathian ih thu kan thlunlonak hin kan innsang siatnak ah a thlen ter thei ih Pathian thu kan thlunnak hin kan innsang ah himnak a thlen ter a si. Kan innsang himten kan um theinak dingah Pathian ih thu kha a thupi bik ih kan ret a tul.

2. Isaak      : Innsang hrang thlacamtu ( Sem.25:21 )

          Isaak ih thuanthu hi Bible ahhin a lang sau lemlo. A nupi Rebekah in fa a neih thei lo ruangah Isaak in thla a cam sak ih a thlacamnak Pathian in theih sak in fa an nei ti kan hmu thei. Fa an neih thei lo cungcang ah Reberah in thla a cam thu Bible ah hmuh ding a um lo, Innsang pa Isaak kha thlacamtu a si.

          Kan laimi dinhmun in kan sim asile thlacam khawmnak ahhin mipa hnakin nunau hi an tam deuh ringring theu ( keimai hmuh ban cin lawngah ). Innsang pa tin hi kan bang aw lo ding nan innsang hrangih thlacam ngetngo hi PA ziangzat tak um kei maw! Curuangah innsang Papawl  kan innsang hi thlacamnak ih dinpitu ding kan si zia thei thar sal in tan kan la kei uh.

3. Josef       : Innsang tuah tha tu ( Sem.45:5; 50: 19-21 )

          Josef hi ziang tlun in a u le pawlin an tuah sia ti cu kan theih theh mi a si. Midang kut sungah  zuartu kha amai suahsempi pawl an si. Josef cun Izip ah harsatnak a phunphun a tuar ih a netnak ahcun Pathian in Izip ram uktu ah a cang. Pampi a tlun tikah a u le pawl cu a hnenah rawl  lei dingin an ra ih phuba la duh sehla phuba laknak ding remcang a nei tha nasa. Asinan phuba la lo in Izip ramih ram thatnak bik ah um thei dingin khua a khansak sawn. A pa Jacob a thih tikah a u le pawl in phuba a lak ding phangin ngaidam an dil tikah amih cun awkam thlun te thawn a rak hneem haiih hnangam ten a um ter hai.

          Pa pawl kan innsang cio cek aw sal sehla kan innsang tio/kek tertu maw kan si a tuah thatu sawn? Kan u le nau pawl thawn kan kar lakah hmasia suah tertu maw kan si deuh a name dam tertu sawn. Kan innsang hi dinhmun tha lo ih a rak din hmanah damtertu sawn kan si kei uh. Inn sungsang a nuammi hman buaitertu kan si ahcun Khristian innsang Pa ti awk ding a ngam um lo nasa. Innsang mawitertu, tha tertu, nuamtertu innsng pa si zuam cio uh si.

4. Joshua   : Pathian riantu innsang ( Joshua 24:15 )

          Joshua hmin kan sal ve te’n “ Kei leh ka innsang cun Bawipa lawng kanrian ding” tiih a tongkam hi kan thinlung ah a cuang hngal ding ka zum. Amah lawng si loin an innsang rori ih Pathian riantu dinhmun ah hruai theitu a siih uar a um nasa.

          Tu kan sanah ti ding, tuan ding a tam sinsin ih Pathian biakinn thlen kan harsat deuhdeuh lawng siloin Pathian hnatuan lamah kan dai thlang vivo ding hi a phan um nasa. Lei tlun nuntu khawsak dan a sang vivo, nomnak phunphun a karh vivo, fimthiamnak a thang vivo ih kan kiangkap thil tampi ruangah Pathian hlat vivo tu ziangzat kan um pei? Hi leilung cu ziang bang tuk in her aw danglam vivo khal sehla kei le ka innsang cun Bawipa kan rian ding ti thei dingin Innsang PA hi kan va thupi ve. Kan innsang hi ziangmi zin ah kan fehpi?

5. David     : Innsang thlasuah petu ( 2 Sam.6:20 NKJV)

          A tlunih Bibal cang tarlanmi kha version dangah cun “a innsang thlawsuah pe dingah David khal a kir ve” ti’n kan hmu thei. Thukam hlun kan siar asile Pa pawlin an fa le hnenah thlawsuah an pek thu kan hmu thei. David khal Jerusalem ih a rami Israel pawl thlasuah a pek theh hnuah amai innsang thlasuah pe dingin a kir. Midang pawl Pathian hminin thlawsuah a pek theh ah a duh tawk men lo ih amai innsang rori thlawsuah pek ngahlo cu rem a ti thei lo.

          Innsang thlawsuah pek thu kan rel tikah minung ih thlawsuah kan nei maw si? timi thusuhnak a um men thei. Pa le pawlin thlawsuah an pek tikah Pathian ih thlawsuah tul lo in anmah in thlawsuah an pe thei ti lam khi a si lo. Pathian hminin thlawsuah an pe ih cui thlawsuah a takih thleng tertu cu Pathian a si. Curuangah Innsang thlawsuah kan pek tikah kan mah in thlawsuah kan nei, Pathian a tullo ti lam a si lo, Pathian hminin thlawsuah kan pe ih cucu an parih thleng tertu kha Pathian a si. Innsang pa pawl kan nun vun cek aw cio sehla kan innsang ah phun le hrang hmuah ngam vio si innsng Pathian hmin ih thlawsuah pe ngam hi kan mal ding ti a phan um nasa. Mi dang innsang hmuah thlawsuah pe, thlacamsak rero ah dun tawk men loin David bangin mai innsang seherh ih thlawsuah pe dingah a kirtu si kan zuam cio kei uh.

6. Job                   : Fa le in Pathian hmuhsuam phangtu ( Job 1:5 )

          Job ih fa le pawl hi misual, mi tha lo an si cuang lo, asinan tum hrimnak um lo in Pathian an hmuhsuam dingih an sual ding ti phangah zingpit ah tho in a fa le pawl thianfaiternak ah thawinak a tuah a pe theu.

          Innsang pa pawl, kan phanmi hi ziang a si? Kan fa le pawl ca an thiam lo pang kei, an farah pang kei, an harsa pang kei ti lawng a si pang maw? Cuang pawl hmuahhmuh tlunah Pathian an tihzah lo pang kei, Pathian thu an thei lo pang kei, Pathian hnen ihsin zin peng an zawh pang kei ti teh phannak kan nei tel maw? Job in a fa le hrang ah zingah tho in thianfaiternak thawinak a pek bangtuk in PA le pawl kan fa le hrangah zingah tho in an hrang thlaza cam uh si. Lei lam ah hlawhtling vio khal hai sehla Pathian kehram ih kan hruai ngahlo a si ahcun a hlawhtlingmi innsang pa cu kan si cuang lo ding.

          PA le pawl Pathian in in dinsuah sakmi kan innsang hrangah hin taksa lamin siseh thlarau lam in siseh PA kan si ding hi a va thupi em. Laiking titit an rel bangin innsang nei siih ziang hman ih siar lemlo, tawng pa um in kan um san men a si ahcun innsang PA dinhmun ah ding tlak kan si lo. Kan mah le kan tlin tawk in kan innsang hi kai hruai ih ngaihsak ding hi kan tuanvo a si. Pathian hmaika ah hihi kan innsang dinmi a si ti ih a dinpi theitu kan si theinak dingah Pathian in lamlo hruai hram seh law.