CA ṬHEN KHAT

Saturday, June 10, 2017

Kain Ih Lamzin ( The Way of Cain )

Kain Ih Lamzin

Juda 11 An hmakhua a va pit so! An thlunmi cu Kain ih a rak thlunmi lamzin a si.

            Kain ih thuhla hi kan theih zetmi ah a tel ve ding. Adam ih fa hmaisa a si ih a nau Abel thawn Pathian hnenih thawinak pe hmaisabik tu a si. A thuhla hi a lang tam lo zet nan Khristian pawl thinlung sungah hmun la zettu a si ih rel hlawh zet khal a si. A tlunih Bible cang tarlanmi bangin “Kain ih a rak thlunmi lamzin” ti kan hmu thei. Hi Kain ih lamzin a thluntu pawl hi zirnak diklo a phuangtu pawl an si ih cu  pawl cu an hma khua a va pit so tiah a ti. Cui zirhnak diklo pawl a phuangtu pawl ih thlunmi Kain ih lamzin cu ziangvek a si ti pawl cun zoh tlang sehla.

A. Kain ih Lamzin

1. Mai Tha timi lamzin : Kain hin Pathian hnenah a lo sung ihsin a suakmi rawl pawl kha Pathian hnenah a pe. Asinan co hlan in a um lo ih Pathian in a hong ti kan hmu thei. Ziang ruangah Pathian in Kain ih pekmi kha a cohlang lo kan ti asile a tuahmi a that lo ruangah a si.

A thami cu tuah cila cohlan na si ko ding tiah Pathian in a ti Sem.4:7. Curuangah a fiangmi cu Kain in Pathian hnenih a pek tikah Pathian ih tha timi si lo in amah in tha a ti mi kha Pathian hnenah a pek tihi a si.

Thukam hlun kan zoh asile Pathian in thawinak ( Offering ) an pek tikah ran thisen an rak hmang theu.Thukam thar ahcun ran thisen si nawnlo in Fapa Jesuh thisen kha kan hrang raithwinak ih Pathian ih cohlanmi a si. Asinan cui Jesuh thisen thawinak ring loin mai tuah thatnak a rinsantu pawl  an um. Cucu Pathian in lamzin in tuahsakmi hnong tahrat ih mai tha timi/ mai sial copmi lamzin a thluntu pawl an si ih Pathian ih cohlan lomi  pawl an si. Kan mai thatnak rinsan ih Pathian biaktu kan si ahcun Pathian in in cohlang dahlo ding.

Rundannak ih Jesui’ thisen thawinak thu lawngah siloin Pathian kan rennak ah hin kan mai tha ti dan ih rian ding kan si lo ih Amai tha ti dan ih Amah riantu ding kan si. Zumtu kan nunnak cek aw phah sehla kanmai tha ti dan ih a hnatuantu kan si pang maw? Kan mai tha timi lamzin a zawhtu men kan si ahcun Pathian ih hnonmi kan si ding.

2. Iksiknak lamzin : Kain cun anau Abel ih pekmi kha Pathian in a cohlang ti a hmuh tikah lungawi pi lo in a iksik. A iksik ah duh tawk men loin anau ih nunnak tiang a lak sak a si kha.
Bible sung kan zoh tikah mi iksik hmangpawl ih nun ah thil tha lo a thleng ti kan hmu thei.

a. Aaron leh Miriam : Moses an iksik ih Pathian ih nunsimnak an tong. Miriam a phar phah.

b. Sual : David a iksik ih Pathian in a hma khua a pih sak.

c. Joseph u le: Joseph an iksik ih Joseph parah thil tha lo an tuah ih buaibainak tampi an tong.

            Zumtu, Pathian hnatuantu, mi tampi kan nunnak vun zoh aw sal sehla kan hnatuanpi an hlawhtlin tikah lungawi pitu maw kan si iksiktu? Kan Pathian hnatuanpi kha kan mah hnakin Pathian in a cawisan tikah a lungawi pitu maw kan si a iksiktu? Pathian in kan mah hi a sangbik dinhmun ah in ret ringring lo ih kan hnatuanpi kha kan mah hnakih a hmansawn, a cawisan sawn caan a um theu. Cu bangtuk ih kan hnatuanpi kha Pathian in sang sawn ih a ret tikah ram  lungawi pi theitu si hi Pathian ih duhmi a si. Mi thenkhat cu Pathian cawisanmi kha rak lungawipi lam si lo in iksik ih rak dirh thlak, rak phet thluk hmang kan um. Cucu Pathian ih duh lomi a si ih thilpoi tak kan nunnak ah a thleng thei a si.

3. Thuphan lamzin : Kain kha Pathian in “ Na nau Abel khui ah so a si?” a ti tikah “Ka thei lo” tikah a let. A nau thattu kha amah rori a si ih a nau umnak le a parih thil thlengmi kha a thei theh cingin ka thei lo tiah Pathian hmai rori ah thuphan a per.

            Hi thuphan lamzin hi zumtu cun kan zawh lo dingmi lam zin a si. Kan Pathian hi tui sun ni tiangah thuphar per dah lo Pathian a si vekin thuphan huatu Pathian a si. Thukan hlun ah Abraham ih nun kan zoh asile a nupi cu ka farnu a si tiah a ti. A diknak lai a um ve nan a farnu a sinak hnakih tumsawn a nupi a sinak kha a thup tikah thuphan a per kan si thei ding. Curuangah anunnak ahhin buainak nasa tak a ton phah a si kha. Thukan thar khalah Tirh.5:3  kan zoh asile Ananias leh Safira in Thlarau Thianghlim an rak bum ih an nunnak an sun phah. Thuphan rel poisa lo tuk kan si ahcun kan nunnak cu ngaihtuah um tak a si ding. Pathian hna kan tuannak siseh, lei lam hna nun tu khawsaknak hrangih hna kan tuan tik khal ah siseh thuphan hmangih hnatuan ding kan si lo. Awl sam tukih thuphan kan rel mai theu hi a poi lem lo ah kan ruat men ding asinan kan Pathian cu thuphan huatu Pathian a si. Curuangah Pathian huat zawng thuphan hmangih hna kan tuan a si ahcun kan tluang dingah beisei ding a si lem lo.

4. Pathian tihlonak lamzin : Pathian in Kain khan a nau Abel khui ah so a si a ti tikah Kain in Pathian a let dan zoh hin Pathian a tih lo nasa ti kan hmu thei. “Ka thei lo” tiih a let ah duh tawk men lo ih “ ka nau kilkhawitu ah zo in so ih tuah?” tiah a ti bet.

            Thuf.8:13 ah “Pathian tih cu sual huat hi a si” tiah a ti. Pathian a tihzah tu ngaingai cun khui tawk hmun an thlen khalah duhdah takin an nung lo, zo hman in an hmuh lo hmanah sung nun in Pathian an tih ruangah sualnak an tlan san vivo theu. Asinan Pathian tihzah lo pawl cu hmel theih pawl hmai ahcun fel tak vekin an um theu nan zohman hmel theih an lo nawn lo nak hmun an thlen tikah khawlvelmi vekin an nung leh mai. Kain khal in Pathian tihzahnak nun a neih lo ruangah anau cu midang zohman an umlonak ah a hruai ih a that a si kha. Pathian cu rak tihzah sehla a nau par ahcun hi bangtuk thil cu a tuah lo ding. Pathian kan tihzah le tihzah lo cu hmun dangih kan um caan ah a lang fiang theu.

B. Pathian ih Thuthennak

            Kain in hi bangtuk a tuah tikah hin Pathian cu dai te’n a um lo ih Kaih parah siatcamnak a thlen ter. “Na umnak hmun ihsin dawi hlo na si ih a hrangah leilung in rawl a suah lo dingih  ih umnak inn inn nei lo in mi vakvai nan si ding” a ti.

Cubang tukin Kain ih lamzin a thluntu pawl cu Pathian thuthennak an parah thleng lo in a um ve lo ding. Zumtu kan nunnak cio hi kan u luk a tul nasa. Pathian minung kan si bang tukin khawvelmi bang tukin Kain lamzin thlun thei kan si lo. Curuangah Kain ih lamzin cu hrial vivo in Pathian thu bang tukin kekartu si thei cio dingin Pathian in lo thlawsuah hram seh.

Casiarmi : THE WAY OF CAIN
                 The Way of God




No comments:

Post a Comment