Jesuh Dai Te'n A Um Lo

Jesuh Dai Te’n A Um Lo, Ziang zawn ah Dai Te'n a Um?

Isai.53:7

          Jesui’ thihnak leh an hremnak pawl kan rel tikah Isai.53:7 ta tansan tahratin “ an hrem rero nan Jesuh cu tuu fate a hmul met dingmi bangin dai te’n a um” tiah awl tlawng tukin kan simmai theu. A sual tinak cu a um cuang lo nan ziang sawn ah dai te’n a um timi felfai in kan rel theu lo. Jesuh hi thuthentu pawl hmai ih a din tikah a zawng a za ah dai te’n a um ngaingai maw? Thu an suh tikah ziang tal let sal lo in a um thluh ngaingai maw timi kan zoh hnik pei.

1. Puithiam sang Annas hmai ah:

          Jesuh hi kaih a si tikah a hmaisabik ah puithiam sang Annas hnenah a fehpi (Johan.18:13) ih an biak awknak pawl cu:

          Annas         : A dungthluntu pawlih thu le a thuzirhmi thu pawl a sut.Jn.18:19

Jesuh          : “Langhnganin mizapi hnenah thu ka sim ringring. Mi tampi an ra khawmnak sinakok ah le Biakinnpi ah thu ka zirh ringring. A thup in ziang thu hman ka sim dah lo. ²¹Cuti a sinain ziangah so thu i sut? Ka thusimmi i theitu pawl kha sut sawn aw. Ka simmi an thei ṭheh ko,”. Jn.18:20-21

Palik           : Puithiam sang hnenah ziangtinso cutiin na ṭong ngam?Jn.18:22

Jesuh          : Ka ṭongsual mi a um ahcun cuih ka ṭong sualmi cu hitawk ih a ummi hmuahhmuah hnenah hin simhnik! Asinain ka ṭongmi hi a dikmi a si ahcun ziangah so i beng?Jn.18:24

          Annas hmai ahcun Jesuh cu dai te’n a ummen lo nasa. Thu an suhmi a let hluahhlo mai. Annas cun Jesuh cu Puithian sang Kaiafas hnenah hnenah a kuat.

2. Puithiam sang Kaiafas hmai ah:

          Kaiafas       : Sunloih mi Pathian ih Fapa Messiah cu na si maw?Mk.14:61

            Jesuh              : Ka si! Milai Fapa hi Ziangkimtithei ih vorhlam kapah to in

vancung mero thawn a rat khal nan hmu leh ding. Mk.14:62

          Hruaitu pawl  : Cuti a sile Pathian Fapa maw na si? Luk.22:70

          Jesuh          : Ka si kha nanmah in nan sim! Luk.22:70

          An suhmi cu Jesuh in a sawn hai. Cu thehin Pilat hnenah an feh pi.

3. Pilat ( Rom acozah Mangki Bawi) Hmai ah:

          Pilat  : Judah mi pawlih Siangpahrang na si maw? Matt.27:11

          Jesuh : Nangmah in na ti si! Matt.27:11

                   Hi thu i suhmi hi nangmah ih palung a si maw, midang in ka thu an

lo sim ruangah so a si?Jn.18:34

Pilat  : Judah mi ah maw si i ruat? Ka hnen a lo thlentu hi na miphun le pui- thiam upa pawl sokhaw an si! Na tuahmi thil cu ziangso a si?Jn.18:35

Jesuh : Kei ka uknak ram cu hi leilung tlunah a si lo; hi leilung tlunah sisehla Judah mi hotu pawl kut sungih thleng lo dingin ka dungthluntu pawl in an do ding. Ka uknak ram cu hi leilungah a si lo. Jn.18:36

Pilat  : Siangpahrang cu na si ngai maw?Jn.18:37

Jesuh : Nang cun Siangpahrang na si i ti. Leilung ih ka suahsanmi le ka ratsanmi cu thu pakhat lawng a si: cumi cu thutak sim ding hi a si. Thutak sungih a ummi hmuahhmuah cun ka thu simmi an ngai a si. Jn. 18:37

Pilat  : Khuiinso na rat?” tiah a sut. Asinain Jesuh cun a sawn lo. ¹⁰Pilat

in, “I sawn lo ding maw si? Nangmah thlah theinak le thah theinak

thu ka neih hi na thei maw?Jn.19:9-10

            Jesuh : Ka tlunih thu na neih theinak hi Pathian ih a lo pek ruangah a si.

Curuangah nang hnakin na kutih i thlengtertu pa hi a sual sawn a

Si.Jn.19:11

          Pilat khalin Jesuh hi thu a sut ve nasa ih Jesuh khalin a let ve nasa. Pilat hnen ihsin Herod hnenah an hruaisal nan a hnuai lamah run tar lang leh sehla.

A tlun lam ih tarlan a si bangin Jesuh hi dai te’n a um men lo ti cu fiang te’n kan hmu thei. Cu ti asile Isai.53:7 ih tuufa hmul met ding bangin in dai te’n a um thu kha ziangti’n a si thlang pei? A hnuai lamah vun tar leng leh sal sehla.

4. Ziang zawnah Jesuh dai te’n a um?

          A tlun lam ih tarlanmi bangin Jesuh hi dai te’n a um men lo. Asinan thu Pakhat an suh tinte’n a tong dah lo. Jesuh tong lo ko ih a tuah tu thusuhnak cu ziang thusuhnak a si ti vun zoh sal sehla.

          Kaiafas       : Hitiin sual an lo puh hi a leh ngaihnak na thei lo maw?

                             Matt.26:62

          Jesuh           : Jesuh cu daitein a um. Matt.26:63

          Pilat            : Sual an lo puhmi hmuahhmuah hi na thei lo maw?Matt.27:13

            Jesuh          : Jesuh cun kam khat hman a sawn duh lo. Matt.17:14

          Hi zawnah ziang kan hmu thei kan ti asile Jesuh dai te ih a umnak zawnte a si. Thu dang an suh tikah cun a let theu nan sual an puhnak zawnte ahcun ziang tik hmanah a let sak dah lo. Luk.23:9 nakih kan hmuh theimi cu Jesuh kha Pilat in Herod hnenih a kuat tikah Herod hin thu tampi a sut nan Jesuh in kamkhat hman a let lo ti. Bible ah ziang thu a sut ti a lang lo nan an an puhnak thu a sut a si ding ti zum a um nasa. A san cu sual an puhnak lawngah Jesuh daite’n a um theu.

5. Ziangruangah sual an puh tinte’n Jesuh daite’n a um?

          Thu dang an suhmi pawl a sawn si ziangah sual an puh tinte’n dai te’n a um kan ti asile “Leilung sualnak a phurtu a si ruangah” a si Jn.1:29. Jesuh hi Amah ah sual hrimhrim bet lo asinan sual an puh tikah thiamthu a rel dah lo. A san cu leilung sualnak phurtu a sinak kha fiang te’n a theih ruangah a si.

          Zumtu kan ni khal Jesuh daitei’ a umnak zawnah dai te’n kan um ve hin a keneh thluntu kan sinak lang tertu a si. Voi tampi cu thil dangah dai te’n kan um thei nan sual in puh tikah dai te um hi hark an ti theu. Mi dangin sual in puhnak sawn hi dai te ih kan umnak ding zawn sawn a si.

Jesuh daite'i a umnak zawn kha ziang a si? ti kan theih dinghi hi cahram ih tumtahmi a si ih Jesuh daite'i a um nak zawn ah kan nih kha daitei' kan um ve ding kha duhsaknak a si.

                   Jesuh Dai tei' a Um le Dai Te'n Um Ve aw