Mi In Zo In Ti So? ( Sermon 3 )

Mi In Zo In Ti So?

Matt.16:13-16

            Jesuh hi Pathian Fapa, Thu tisa ih rung cang kha a siih leitlun a tlanlen laiah hin minung tamtak in Jesuh hi Pathian Fapa an an ruat lo, cu lawnghman si lo in a caancaan ahcun an ngaisang lo nasa. Mari fapa lettama, Jeim le Josef le Judas leh Simon teih u kha a si lo maw? A farnu pawl tl ahinah an um lai a si lo maw? Tiin Jesuh cu zianghmanah an rel lo Marka 6:3. Pathian Fapa a sinak hi mi tampi in an thei thei remrem lo ih zo si maw ah an ruat men. Tui tumah Jesu’n “Mi in zo in ti so?” ti ih a thusuhnak thawn pehpar aw in minung ih theihnak leh Pathian in phuanawknak, Pathian ih theihternak lam hmuitin in kan zoh tlang ding.

A. Minung sinak men in Pathian theih a theih lo

            Jesuh in a dungthlun pawl hnenah “ Mi in Milai Fapa hi zo a si in ti so?” tiih a suh tikah an thulehnak cu ‘mi then in Baptisma petu Johan, a then in Elijah, a then in Jeremiah lole profet pakhatkhat a si ding an lo ti’ ti kha a si. Jesuh hi leitlun a lenlai ah mangbangza tampi a tuah, damlo a dam ter, Pathian lawngih ti theimi tiih an ruahmi thlisia, tisuar a dai ter ko nan Amah a hmutu leh a thuhla a theitu hmuahhmuah in Pathian Fapa a sinak cu an theithei cuanglo. Curuangah fiangzet  ih kan hmuh theimi cu minungin kanminung sinak mai cun Pathian hi a sinak akn thei ban lo a rak si. Minung cu leidip ih tuahmi, leilungmi kan si ih Jesuh cu van ihsin a rung tummi, vanlammi a si vekin vanlam thawn a pehpar aw mi kha minung cun a theithei mai lo.

            Jesuh hi za ah za minung sinak leh za ah za Pathian sinak nei a si. Lei minung pawl cun Jesuh kha Pathian a sinak an thei ban lo ih minung a sinak lawng an theithei. Minung a sinak lawng an theih thei ruangah Johan, Elijah, Jeremiah, lei minung pakhatkhat ah an ruat. Lei minung ah mi thiamsang taktak, fim taktak an tampi ko nan ziang bangtuk ih mi fim,thiam khal in a minung sinak in Pathian a hmu thei lo, Pathian a thei thei lo. Lei minung ih fimthiamnak cu leilung thawn a pehpar mi, leilam thil theitheinak a si. Van lam thil, Thlaraulam thil hi cu minung kan sinak hin a thei ban thei lo.

1. Thlarau minung a si lomi pawl cun Pathian Thlarau hnen ihsin a rami laksawng cu an co thei lo; a theih khal an thei thei lo. Ziangahtile cuih laksawng pawl ih sunlawizia cu thlarau thinlung lawngih theih theimi a si ih cumicu annih hrangah cun aat-hna a si. 1 Korin 2:14

2. Pathian in amit a van ter lo ahcun Balaam in Vancungmi a hmu thei lo. Mip.22:22-30

3. Elisha ih hnenum pa cu a mit van ter a si hlan ahcun vancung ralkap a hmu thei lo.

    2 Siang. 6:8-16

4. Ethiopia pa in Isaiah cabu a siar nan a ti can a thei thei lo. Tirht. 8:31

5. Emmaus lam tluan in a feh rero mi mi pahnih hnenah Jesuh a tel ve nan an thei thiam

   cuang lo. Luk.24:13-29

            Lei dip ih tuahmi, lei minung cun Jesuh ih minung sinak cu an thei thei nan Van lam ihsin rung, Pathian Fapa a sinak cu an thei thei lo. Minung kan sinak ih Pathian lam thil, van lam thil, thlarau lam thil hia thei thei lo.

B. Pathian thawn lawngin kan thei thei.

            Jesuh in a dungthlun pawl hnenah “nannih in teh! Kei hi zo a si in ti so?” tiih a suh tikah Piter cun “Nang cu a nungmi Pathian ih Fapa Messiah na si” tiah a ti. Cu tikah Jesuh in “ Johan fapa Simon, mi van nein a si! ziangahtile hi thu cu minung hnen ihsin na ngahmi a si lo, vancung ih a um ka pa in na hnenah a phuanmi a si” tiah a ti. Hi zawn ah kan hmuh theimi cu Piter in Jesuh sinak dikah a phuansuah theinak san cu amai lam fimthiamnak in  si lo in vanlam in a hnenih a phuannak ruangah a si sawn.Jesuh hi minung a sinak cu kan theithei mai nan Pathian a sinak kan theihtheihnak cu Pathian in kan hnenih a phuanak thawngin a si.

            Piter in Jesuh sinak a phuansuannak ruangah Jesuh in Piter cu “ Mi van nein a si” a ti. Ziangah mi van nei a si tile minung hnen ihsin si lo in Pathian hnen ihsin phuansuahnak dongtu a si tuangah a si. Curuangah Jesuh kha Messaiah a sinak  phuansuaktu a si men lawng si loin  Pathian phuansuahnak dongtu a si zia a lang fiang. Jesuh in “hi thu cu minung hnen ihsin na ngahmi a si lo” a timi hi a tongfang cun “ Thi leh sa  ihsin na theihmi a si lo” a ti. Thi le sa timi hi a thi theimi milai tinak si lo in Pathian theih theinak a nei lotu milai tinak a si sawn. Curuangah Pathian thuhla tla tlawngah kan zir thei, ca tampi tla kan siar thei. Asinan Pathian a sinak pem ko thei dingah cun Pathian kan hnenih a phuanawk a tul, Pathian cangvaihnak a um a tul. Ziangah tile Pathian cangvaihnak thawn lawngin Pathian, van lam thil, thlarau lam thil kan theithei a si. Minung in kan neihmi mit leh hna ih theihnak leh hmuhnak lawng a tawk lo.

1. Cuih a thuthup cu Pathian in kan hnenah a Thlarau in a phuang. Ziangtin a si tile Thlarau in ziang hmuahhmuah kha a hawlsuak ih Pathian ih tumtahmi thuk bik hman a pur ngah a si.

Minung hi a sungih a ummi a thlarau lawng in a thinlung sungih thu cu a thei. Cuvek thotho in Pathian Thlarau lawng in Pathian ih sung thu cu a thei a si. 1 Korin 2:10-11

2. Cule  Bawipa in Balaam ih mit cu a vangter ih vancungmi pakhat a ralnam thawn a din kha a hmuhter. Cutikah Balaam cu leilung ah a bok. Mipum Siarnak 22:31

3. Cule  Bawipa ih hnenah thla a cam. “Maw  Bawipa, a mit run vaangter awla khua run hmuhter aw,” a ti.  Bawipa in a thlacamnak cu a run thei ih Elisha ih hnen-um pa cun khua a hun thlir tikah Elisha ih kiangkap tlangtluan hmuahhmuah cu rang le meisa rangleng in an khah òhepòhep kha a hmu. 2 Siangpahrang 6:17

4. Pathian fialnak vek in Filip in Ethiopia pa cu simfiang ih Pathian thu a thei fiang thei Tirh.8:32-40.

5.Emmaus lam ih khualtlawng pawl hnenah Jesuh a tel ih sang a lak ih thla cam hnuah anmit a vang ih Jesuh a si kha an thei ngah. Luk.24:30-31

6. Cun an thinlung mit a vangter ih Ca Thianghlim ih simmi kha an thei thei. Luka 24:45

7. “Khawthim sung ihsin tleunak suak seh,” tiah a titu Pathian cu Jesuh Khrih ih mithmai parih Pathian sunlawinak kha kan theih theinak dingah kan thinlung sungah a tleunak in run petu cu Pathian amah thotho a si. 2 Korin 4:6

            Pathian phuansuahnak a um lawngah minung in Pathian, vanlam thil, thlarau lam thil kan theithei kan ti tikah “Pathian cu ka hnenah a phuan awk tiktik ah phuang aw men seh, kei cu dai ten um huahhi men keng” ti lam zawngih um ding kha sim duhmi a si lo. Pathian phuansuah awknak kha a thupi bik a si zia tarlang duhnak a si. Jesuh in piter kha “ mi vannei na si” a ti bangtuk in Jesuh hi Messiah, i Rundamtu a si ti a theih ngahtu kan si hi mi van nei

kan si.

Minung rinsan hlah,

Cabu tha rinsan hlah,

Thiamnak rinsan hlah,

Thluak thatnak rinsan hlah,

Pathian rinsan aw, a thuthup thei thei dingah a hnenah tlu lut aw, A phuanawk lawngah kan theithiam thei.

Cabu siar         : Hre Kio Commentary Series

                        : The Preacher’s Outline & Sermon Bible