Mi in Zo in Ti So? ( Sermon 1 )

Mi in Zo in Ti So?

Matt.16:13-17

            “Mi in  Milai Fapa hi zo a si an ti so?” timi hi Jesuh in a dungthluntu pawl hnenih thu a suhmi a si. Jesuh hin thu mi a sut ve phah theu tikah theih lomi a neih ruangah a si lo ih duhsan pakhat khat a neih ruangah sut a si theu. Matt. 16: 13-17 sungah hin Jesuh in thusuhmi pahnih a nei ih a pahnih in kan zoh tlang ding. Hi tum ih Dungthluntu pawl hnenih a thusuhmi hi thupi ngaingai a si ih hi mi thu hmangin midang/ kankiang um  ih in hmuh dan ziang vek a si timi thupi ter in tha zang vun la tlang sehla.

A. Mi in Milai Fapa hi zo a si an ti so?

1.Kan sinak theih thei dan:

            Jesuh cu caan ziangmaw ti zat sungah khua ziang maw ti zat ah Pathian hnatuan ih a um tikah mipi tampi ih theihmi a si ih a thuhla khal a thang hla ngaingai. Cumi thluh hnuah mi in ziang vek in an hmu, zo a si ti in an thei timi kha a dungthlun pawl hnenah a suhmi a si.

            Minung hi kan mah rori in mi in ziang vekin in hmu, zo a si tiah in thei timi hi kan mah ten kan theithei thluh theu lo. Cun mi in kan kan sinak in hmuh dan hi kan hnenah ti fukfi in an rel ngam theu lo. Kan pupa tongah “zawngih hmai hman ka zah” an ti bang tuk in mah rori hmai ahcun sinak hmuhawk dan dik tak hi kan rel thluh theu lo. Asinan mi in kan sinak in hmuh dan kan mai hnenih an rel ngam lo mi kha kan rualpi hnenah cun an rel ngam theu. Curuangah mi in ziang tivekin in hmu timi theih kan duh a si ahcun kan rualpi pawl sut sehla ziang maw ti zat kan thei thei ding.

            2. Mi in Jesuh an hmuh/theih dan:

            “Mi in Milai Fapa hi zo a si an ti so?” ti ih a suh tikah sannak a hmuhmi cu: “Mi thenin Baptisma petu Johan a si an lo ti. Mi thenin Elijah a si an lo ti. A thenkhat cun Jeremiah, a si lole profet pakhatkhat a si an lo ti” ti hi a si. Mi in Jesuh an hmuh dan hi Messiah tiah an hmu lo. An hmuh dan hi a dikmi a um lo.Asinan tui tum ah mipi in an hmuh dan dik lo lam hi rel tummi si sawn lo in an hmuh dan kha zo vek minung pawl an si ti sawn kha rel tum sawnmi cu a si. Mipi in Jesuh kha cumi/khami a si ding an timi ah hin mi sual ral zohman an um lo ih Pathian mi hman hlir an si. Curuangah mipi in Jesuh hi an nautat lo ding ih an upat zet ding ti cu a fiang.

            Kan nih zumtu, Pathian hnatuantu pawl hi teh miin ziang vek in in hmu ve pei? Pathian mi, Pathian hmanmi in in hmu ve pei maw? Mi dangih in hmuh dan ah kan thum aw ding ti lam cu a si cuanglo nan mi dangih in hmuh dan hi a thupit zetnak laite a rak um theu. Kan mah leh mah kan hmu awk dan vekin mi in in rak hmu ve lo men thei. Jesuh hi Johan, Elijah, Jeremiah leh profet pakhatkhat vekih an hmuhnak san cu Jesuh Amah hrimhrim hi a nunnak ah thil tha lo hmuh ding a um lo tinak a si. Curuangah miin a tha lo lam ih hmuhnak in neih a si ahcun kan nun dan ah ralrin tul mi ziang si maw cu a um tinak a si. Mi in kan nunnak ah Khrih hmel, Pathianmi hmel an hmuh theinak dingah kan nun dan thotho hi a thupi. Khawvelmi hman dingfel leh zohmawi in an um thei a si ahcun Pathian zumtu, Thlarau thianghlim cotu pawl cun ziangruangah kan um thei lo ding?

B. Nannih in teh! Zo a si in ti so?

1. Kan sinak theitu bik:

Jesuh in mi ih an hmuh dan a suh thluh hnuah “nannih in teh! Zo a si in ti so?” tiah a kiang nai bik ih a ummi pawl a sut. Jesuh cun mi dang ih an hmuhdan dungthlun pawl in an sim ah a duh tawk lo ih Amah a thluntu, a kiangnai ih a um tambik pawl ih an hmuh dan kha a sut bet.

Mi dangin hmuh dan in neih rualrual in midang hnak aiin in thei fiangtu bik cu kan kiangnai ih  um tam bik kan nupi/pasal, nu leh pa, u leh nau, thianrual pawl hi an si. A hleice in nupi pasal nei kan si ah cun kan koppi hin midang ih in theih dan hnakih fiang ih in theitu a si. Curuangah midang ih in hmuh dan a thupit zet rualin kan koppi in in theihdan hi a thupi bik. Curuangah kan mai koppi rori in  ziangvekin in hmu ti hi suh theu ding a si.

2. Piter in Jesuh sinak a phuang:

Jesuh in a dungtlun pawl ih an hmuh/theih dan a suh tikah Simon Piter hnen ihsin sannak a hmuhmi cu:”Nang cu a nungmi Pathian ih Fapa Messiah na si” ti hi a si. Jesuh hi a sinak diktak hi midang hnen ihsin si lo in amai kingih um tambik a dungthluntu hnen ihsin a thei ngah a si. Midang ih an theih dan hnakih sang sawn a sinak kha Piter in a phuang suak.

Jesuh cu midang ih an hmuh dan hi a ropi zet rual in a kiangnai ih umtu a Piter cun cu hnakih ropi sawn a sinak a hmu. Kan koppi, kan kiang nai ih um tambik in ziang vek in in hmu ve pei? Midang ih in hmuh dan hnakin niam in maw, sang sawn in ha in hmuh ding? Kan sinak dik tak cu midang ih in hmuhdan hnak aiin kan kiangnai ih a um tu kan koppi ih in hmuh dan ah a thum aw dik sawn ding. Curuangah mi pakhat si a sinak thuk sin ih kan theihnak dingah cun mipi in an hmuh dan tlunah a kiangnai ih um tambik hnen ihsin thuk sawn inkan thei thei ding.

C. Cuai thlainak

1. Jesuh cu midang ih an hmuh dan hnakin a kiangnai ih um Amah thluntu in an hmuh dan a

   ropi sinsin.

2. Mi dangih in hmuh dan maw ropi sawn, kan kiang nai ih umtu pawl ih in hmuh dan sawn?

3. Mi dangin thlacam thei zet ih in hmuh hnakih thlacam sawn in kan koppi in in hmu maw?

   Asi lole midang in thlacam zewtih in hmuh laiah kan koppi cun kan thlacam lai a thei lem  

   lo?

4. Mi dang in  zuk hmawm lamah fihlim zetih in theihnak hnakin filhlim sawn in kan koppi

   in in thei maw? Asi lole mi dang hmuh ah zuk hmawm fihlim vek si kan koppi hmai ahcun

   fihlim ti aw ngam lo ha kan si?

5. Mi dang cun mi thinsau zet, mi tha zet ih in theihnak hnakih thinsau sawn in kan koppi in

   in thei maw? Asi lole mi dang cun thin sau zet in in hmu nan kan koppi cun thin bahlak

   takin in hmu?

6. Mi dang in Pathian  tihzah zetih in hmuhnak hnakih Pathian tihzah sawn in kan koppi in in

   hmu maw? Asi lole mi dang cun Pathian tihzah zet ih in hmuh laiah kan koppi cun Pathian

   tihzahnak nei lo ih ha in hmuh?

7. Thu dangdang nangmah ten rak cek aw vivo aw

Midang ih in hmuh dan hnakin kan kiang naite ih a umtam bik pawl hin kan sinak diktak an thei fiang sawn.

Na Kiangnai ih um tamtu lakah ziangvek minung na si?

Mi in zo in ti so? Sermon 2 ra lai ding