Ruahnak Dik Lo Pali (4) ( Job Cabu Sungin )

                                               

      Ruahnak Dik Lo Pali (4)

            Job cabu kan siar asile hi ruahnak diklo pali pawl hi kan hmu thei. Hi ruahnak diklo pali pawl hi midang parih kan ruahnak kan neih dan a si thei ih kan mah leh kan mah kan ruahawk dan tla si thei. Cui an ruahdan pawl cu a hnuailam vek in a si.

1. Satan ih ruahnak Dik Lo: Job in Pathian a biak,ren hi A thlawsuah a don ruangah a si.

            Job.1:9-11 Cutikah Satan in, “Zianghman ngah hlah sehla a lo bia duh leem pei maw? Amah siseh, a innsang siseh, a neihmi hmuahhmuah tiangin na humhim ih na kilkhawi. Thil a tuahmi hmuahhmuah parah mal na sawm ih rannung na pekmi pawl an tamtuk ih an ramah a khat ṭheh a si. A neihmi hmuahhmuah khi laksak ṭheh cila na hmaika rori ah a lo cam mai ding,” tiah a ti.Job hin Pathian thlawsuah a dongih neihmi a neih tamtuk ruangah Pathian a biak a si hi tiah Satan in a ruat. Asinan Job in Pathian a biak/ren hi a thlawsuah a don men ruangah a si lo.

            Zumtu pawl in Pathian kan biak hi a thlawsuah kan don men ruangah a si lo. Thlawsuah don duh ruangah kan biak khal a si lo. Pathian kan biak hi Pathian a sinak, Sersiamtu a sinak, Biaktlak a sinak TVP.. ruangah kan biak sawn a si. Bible sungkan zoh tikah zumtu pawl hi leiah harsa fialfi te’n an um theu ko nan Pathian biak/ren hi an thluh dah cuang lo. A Thlawsuah duhtu si lo in Thlawsuah neitu Pathian hi kan duhmi a si sawn.

2. Job Nupi ih Ruahnak Dik Lo: Hmuhtheih thil sun/hloh theih hi ziang hmuahhmuah sun/hloh a si.

            Job.2:9-10 A nupi in a hnenah, “A hlan vek thotho in rinsantlak in na um lai hrih mawsi? Ziangah so Pathian cu cam tahratin na thih sawn lo!” tiah a ti. An neihmi hmuahhmuah an cem ih Job ih taksa cu hma ina khat theh tikah cun a nupi cun ziang hmauh hmuah sung/hloh theh hina thei aw. Curuangah a pasal Job cu Pathian camsiat tiang a fial a si. An neihmi pawl hmuh ding an um nawn lo ahcun Pathian camsiat hi poi tinak a nei lo.

            Zumtu in Pathian kan biaksan hi a thlawsuah ruangah a si lo ih kan neihmi hmuh theih thli pawl hi hlo theih hman sehla Pathian kan neih a si ahcun ziang hmuahhmuah sung/hloh kan si lamlam lo. Sam.73 ngantu Asaf in Vancungah Nangmah ka lo neih hnuah cun hi lei ah ziangso haimi ka neih? a ti a si kha. Pathian kan neih a si ah cun ziang hmuahhmuah ih hram kan nei tinak a si. Kan tlasia ih kan neih ciami pawl kan hloh theh tikah Pathian camsiat duhnak neitu Job nupi bangtuk kan si pang maw? Job nupi ih a ruah sual mi cu Neihmi a cem theih ruangih ziang hmuahhmuah hloh theh ih a theiawknak tak kha a si.

            Kan theih tul sawnmi cu hi lei ah hmuh theih thli lei ri tampi nei liailiai hman nungna Jesuh, kumkhaw nunnak kan neih lo ahcun ziang hmuahhmuah hloh kan si sawn. Marka 8:36 Mi pakhat in leilung pumpuluk co hmansehla amah ih nunnak a sun ahcun ziangso a ṭhahnem? Zianghman a ṭhahnem lo!

3. Job rualpi pawl ih ruahnak Dik Lo : Job tuarnak hi Sual ih Rah a Si.

            Job. 22:5 Na ṭhatlonak a nasat ruangah le Na sualnak a tamtuk ruangah a si sawn. Tuarnak hi sual ruangah a si tihi kan ruah dan tlangpi a si theu. Mi pa khatkhat siat a ton khal a si le ziang thil tha lo a tuah a si pei? ti hi kan hawl theumi a si. Asinan Job ih tuarnak hi a sualnak ruangah a si lo ih Pathian siannak in Satan pai’ hniksaknak a tuar a si sawn. Jesuh san lai khal ah a dungthluntu pawl in mitcaw pai thu an suh tikah ziang ruangah a mit a caw, amai sual ruangah ah a nu le pai’ sual ruangah ah so? tiah an sut dah. Jesui thu letnak cu a nu leh pai’ sual ruangah khal a si lo, amai sual ruang khal ah a si lo. Pathian thil ti theinak hipa damternak ihsin a langnak dingah a si tiah a ti Johan.9:1-4.

            Kan sualnak ruangih kan tuarmi cu tampi a um ve ko nan tuarnak hmuahhmuah hi sualnak ruang ih tuar ih ruat theih ding a si lo. Pathian in duhmi/tumtah a neih ruangih kan tuar mi khal a um thei ve a si. Curuangah midang tuarnak kha an sual ruangah ti ih ruah sak mai hi a fuh lo duh nasa.

4. Job ih Ruahnak Dik Lo : Pathian in Thil a Ti Dik Lo

            Job. 27:1,2 Ziangkimtithei Pathian, dingthluk lairelnak i coter lotu le, Ninghang in i tuahtu a nungmi Pathian hmin saal in thu ka kam. Job in kha tluk a tuarnak pawl a zoh tikah Pathian cu thil ti diklo ah a ruat. Pathian in amah kha a sual ruangih a tuarter hmuh khin a hmu. Pathian hin Job hi a sual ruangih a tuar ter a si lo. Misual ah a neih pang ih a tuar lo dingmi a tuar ter khal a si lo. Job ih sinak thei fiangtu a si ih duhsan nei in Pathian in a thleng ter a si sawn.

            Zumtu kan ni teh kan parah harsatnak a thlen tikah Pathian hi thil ti diklo vek in kan ruat sual pang theu maw? Pathian hin thil a ti sual dah lo ti hi kan hngilh lo kei uh.Sam.18:20; 2 Sam.22:31. Pathian in a dikmi rori hi dik lo ah a can ter dah lo. Thil a ti sual thei lo hrimhrim a si. Lai a rel tik khal ah thlen dan nei lo, tan bul nei lo, diknak ih laireltu a si. Minung lawngin thil kan ti sual thei.

            2006 FIFA World Cup laiah Croatia leh Austrilia an do awk tum ah referee Gramham Poll in Croatia lam Josip Simunic ( No.3 ) pa cu puai khat sungah yellow card voi thum a rak pe dah(https://www.youtube.com/watch?v=caYdeTLSW-o) (https://en.wikipedia.org/wiki/List_of_2006_FIFA_World_Cup_controversies#Three_yellow_cards_issued_.28Croatia_vs._Australia.2C_group_stage.29)  . Lei tlun ahcun mi thiamsang zetzet khal in thil an ti sual theu. A thiam/dik sawn thiam lo an pek caan khal a um. Asinan Pathian cun thil a si sual dah ve lo. Curuangah kan parih thil a thlengmi hi Pathian thli ti dik lo ih ruah ding a si lo.

            Hi ruahnak dik lo 4 pawl hi midang parih thil a thlengmi parah hin kan ruah dan a si pang maw? Kanmai parah siseh, mi dang par khal ah siseh tuarnak a thlen tikah hi ruahnak pawl hmangin thu kan then a si ahcun kan ti sual theu ding. Ziangkim ah Pathian cun thil a ti sual dah lo a si.