Tluknak Hrampi 5

Tluknak Hrampi

Isai. 14:12-14( NKJV )

            1. Mah leh Mah khaisan awk duhnak

            2. Renmi si duhnak

            3. Uktu si duhnak

            4. Sunloihmi si duhnak

            5. Sangbik si duhnak

            Hi duhnak 5 pawl hi kan hrangah tluknak hrampi an si.

            Isai. 14:13-14 hi Lucifer ih tluknak thua si. Hi tawk ah Lucifer ih duhnak panga kan hmu thei. Kan duhnak hi Pathian duhnak hnakih tumsawn ih kan ruah a si ah cun cucu sual tumpi a si.Hi Lucifer ih tluknak thu hi tuisun ih zumtu pawl kan tluknak hram a si ve maw ti in mai’ nun zoh aw sal hnik sehla.

1.Van ah ka kai ding = Mah leh mah Khaisan awk duhnak

            Lucifer hi Pathian in mawi zet ih a thuammi a si. Asinan Pathian ih a si ter tawk ah lungkim lo in van ah kai a tum. Pathian ih khaisannak si lo in amah ten khaisan awk a tum. Zumtu khal voi tampi  cu hi dinhmun ah kan ding theu hi kan tluknak a rak si theu. Pathian in kan mah le dinhmun te

cio in pek ih Pathian ih in si ter tawk ah lungkim lo in mah le mah khaisanawk ( Self promotion) kan tum theu a si. Sinak sang zuan in kan phar ciamco theu ih hotu kan si theinak ding lamzin hawl in kua kan virh theu a si lo maw? 1Pit.5:6 Curuangah a cakmi Pathian ih kut hnuai ah tangdorte in um uhla amah in caan a kim a ti tikah a lo khaisaang leh ding. Zumtu hrangah sinak sang hi kan dum (zuan) dingmi a si lo ih kan hngah dingmi a si sawn. Pathian ih khaisannak hngak lo in kan mah te’n khaisan awk kan tum a si ahcun kan hmaiih kan ton dingmi cu tluknak/tlaknak a si.

            Sinak sang hi kan dum dingmi si lo in kan hngah dingmi a si.

2. A sangbik arsi tlunah kan tohkham ka ret ding = Riantu si lo in renmi si duhnak

            Arsi ih a sawh duh theumi cu vancungmi pawl an si. Van cungmi hmuahhmuah tlun ih um duhnak thinlung a nei. Vancungmi pawl hi Lucifer telin Pathian in Amah riantu dingih a sersiammi pawl an si. Asinan Lucifer cun riantu sin awn lo in renmi si dunnak a nei thleng. Zumtu pawl khal hi Pathian leh midang riantu ding kan si ih mi dang va rian tu sin awn lo in mi ih renmi si kan duh a si ahcun kan dinhmun kan thelh lellel tinak a si. Jesuh leitlun ih a run tikah renmi si lo in riantu si dingah a ra Matt. 20:28. Zumtu khal in Jesuh ih keneh thlun ding kan si. Pathian hna kan tuannak ah sinak kan neihmi: Pastor, Evanelist, Missionary, Upa, Deacon....tvp hi mi dang tlunih umnak ding sinak si lo in Pathian RIANTU kan sinak pawl an si sawn.

3. Khuavang pawl tonkhawm awknak saklam tlangah ka tonkham ka ret ding =

    A dangten uktu si duhnak

            Lucifer cun Pathian uknak hnuai ih um sin awn lo in uknak dang te neih a mah kha uktu ih ret awk a duh. Zumtu khal hi kan nunnak ah ralrin ding tampi a um. Mah hotu tuan lo cun mi lak ih va tel duh lo, mah hotu si lawngah teima ciamco kan si pang maw? Hotu lu ban lam ih tello veten pawlkom dang din ciamco kan si pang maw? Ziangkim kan tuahmi ah kan tuahduhnak thinlung put kha Pathian in in hmu theh a si.

4. Khawdur tlunah ka kai ding = Sunlawinak co duhnak

Mero hin Pathian ih umpitnak leh Pathian ih sunlawinak a sim theu. Suah.16:10; 1 Siang. 8:10-11. Pathian in Israel pawl hnenah a sunlawinak hi mero hmangin a lang ter theu. Sunlawinak hi Pathian ih ta a si. Isai. 48: 11Curuangah thil ka tuah mi hi ka hmin hrang lawngah ka tuah; Ka hmin cu thangsia in ka umter thei lo; Sunlawinak khal keimai ta lawng a si ih Zohman in an co lo ding,” tiah a ti. Zumtu khal hin sunlawinak hi Pathian ih in pek lawngah zo ding fang kan si. Kan  ni cun Pathian sunloihtu ding kan si, Pathian kan sunloih tikah Pathian cun Amah a sunloihtu pawl kha a sunloih ve theu a si. Curuangah sunlawinak co duhtu cun Pathian sunloihnak pe ding kan si.

5. Cungnungbik bang tuk ka si ding = A sangbik bik si duhnak

            Lucifer ih thinlung tek cu hihi a si, Pathian hnon ih amah kha Pathian ih ret awk ih lei leh van kha amai  kut ding ih um ter  ( 2 Thes.2:3-4 ). Hi thinlung ciah hi dungthlun pawl in an rak nei ve ih ruangah Jesuh cun nauhak te cu an hmaiah ding ter tahratin thu a zirh hai. ( Matt. 18:1-5 )

            Hi a tlunih kan simmi pawl hi Lucifer ih tluknak hrampi  pawl an si ih tuisun ih zumtu  pawl khal Satan hi hiang pawl hmangin tluk ter in duh theu hi in thlem theu a si. Ziangkimah kan duhnak hnakin Pathian duhnak kan mah ah a tum sawn ringring theinak dingah Pathian in lo thlawsuah hramseh.

Cabu siar  : SYSTEMATIC THEOLOGY ( Henry Syn )