Sermon..Matt.8:1-4 "Miphaar Damnak"

Matt.8:1-4 Miphaar Damnak

            Bible sungah miphar thu hla hmuh ding a um hnuaihni ih Mathai cabu sungih miphar tidamnak thu ah Jesuh duhdawtnak thuk zia kan hmu thei.

1.Miphaar dinhmun:

            a) Thukam hlun le Thukam thar san ah pharnat hi natnak tihnung um bik a si.

            b) Phaarnat a tuar pawl hi an sual ruangah a phar a si tiih ruah a si. Sual ih rah tluk ih

   ngaimi a  si cu.

c) Phaarnat tuar pawl hi taksa leh thlarau lam ih mi thiang hlim lo ih ruah an si.

d) Feet ( pi ) 6 hnakih naih in mi an pan thei lo. Sungkhat, rualpi tha khal siseh la pi 6

    tluk ih nai lawng in an hmu thei.

e) Sinfen dum an hruh ter. Cucu zo khal in mi phar ti an theih theinak dingah a si ih

  nung cing ih mithi tluk in ruahmi an si.

f) Khaw leng ih retmi an si. Khawsung ah um theinak an nei ve nawn lo.

g) Pharnat cu Pathian lawng ih dam ter theih mi nat nak a si tiih ruahmi a si. Minung

   in ti dam theih a si lo.

2.Miphar pa ih ruahsannak:

            Hi mi phaar pa hin Jesuh parah ziang tluk in ruahsannak a nei ih ziang tluk in Jesuh a thei fiang ti hi cu a um dan le a tongkam in kan thei thei. Tlang parin Jesuh a rung tum tikah mipi tampi thluntu a nei. Cu cing in hi miphar hi Jesuh hnenah a ra. Miphaar rengreng mi lak in feh ve dan a si lo ti cu a thei ve ko ding nan Jesuh parih beiseinak a neih tuk ruangah cu vek dan le dun khal ziangah ruat nawn lo  in Jesuh a pan top a si. Cun Jesuh hnen ah “ Bawipa, na duh a si ahcun i dam ter thei a si” tiah a ti. Jesuh hi a vei khat hmunnak a si ko nan in dam ter thei tu a si ti hi fiang te in a thei. Jesuh cun a dam ter ti kan hmu thei. Jesuh in Amah beisei tuk tu pawl hi hlawhsam in a um ter dah lo.

3.Jesui’ duhdawtnak:

            Mi phaar pa in beiseinak thawn Jesuh hnen ah rat tikah Jesuh in a hei dawh ih a tham ti kan hmu thei. A hei dawh timi in Jesuh ih duhnak leh a ngaihsaknak a lang ter. Phurrit a phurtu leh zonzaih a tuartu pawl a hnen an rat tikah colh hahdamnak an ngah ding duhtu Pathian a si. A hei dawh hnuah a tham bet lai. Jesuh in mi phar a tham tikah Ziang tluk ina duhdawt, a lainat ti a lang ter. Mi phar hi an tham kel lo, natnak tihnung mi suan/kai thei a si. Thukam hlun lam khalah Miriam a phaar ih Moses in a tham  lo, Naman khal a phaarnat dam ter dingah Elijah in a tham kherkher lo. Mi hmuahhmuah ih tihmi mi phar kha Jesuh in a tham tikah Miphaar pa cu ziang tlum in a diriam in a lung a awi ding. Miphaar tham cu Judah mi hmuh ahcun thil mawi lo zet a sin an miphaar hrang ahcun a mawi bik mi  a si.

4. Miphaar damnak in a langtermi:

            Phaarnat cu minung ih damter theih a si lo Pathian lawngih dam ter theimi natnak a si tiih an ruah vekin Jesuh in mi phaar a ti dam tikah Pathian a sinak a lang ter. Hi miphaar tidamnak hi tuthangtha bu dang khal ah a lang ih cumi ahkan hmuh theimi cu Jesuh in a ti dam hmaisabik pawl a si.  A hleice in miphaar ahcun a hmai sabik in a tidammi a si. Curuangah hi tidamnak in Jesuh Pathiannak a lang ter. Cun Jesuh in a tidam tikah a tongkam kan hmuh theimi cu “thiang thlang aw” ti a si. Curuangah miphaar a tidam hin a pathian sinak lawng si lo in sual thiangtertu a sinak khal a lang ter. Phaar hi sual ruangaih tuar ih an ruah bang tuk in mi phaar a damter tikah sual ruangih a thiang lo mi, a borhhlawhmi, mi ten um a si mi  pawl thiang tertu ding a sinak kha   a tar lang a si.

            Cu tin damnak a ngah hnuah Jesuh in  puithiam hnenah feh in thawinak pek a fial. Mi phaar pa in a natnak hrangah phan ding a nein awn lo, a dam zo nan milak in a tlanlensal theinak dingah puithiam ina damzo thu a pomhnget ih mipi  in an theih a tul ih ruangah Jesuh in puithiam hnen feh a fialnak cu a si.

            Sualnak ruangih harsatnak a tuartu hmuahhmuah hnenah luatnak pe theitu cu Jesuh lawng a. A nih cun mi dinhmun niam a thlauthla lo, Amah beiseitu pawl hlawhsam in a ret dah lo, mi nauta a namniam lo tu a si.