Thukam Hlun Ih
Jesuh
Johan 8:58 Jesuh in, “Thungaite in ka lo sim: Abraham a suah hlan khalah Keimah
a si mi ka si,” *
tiah a ti.
Suah.3:14 Cutikah Pathian in,
“Keimah cu Keimah ka si. Keimah * a si
mi in nan hnenah i thlah a si, tiin Israel mi hnenah na sim pei,” tiah Moses
hnenah a ti.
Bible hi Thukam Hlun leh Thukam Thar
tiih theh a si ih an thupi veve.Thukam Thar lawng lawng lak a theih lo ih
Thukam Hlun hi hnon theih a si lo.Ziangah kan ti a si le an pahnih in
pehtlaihawknak thuktak an nei a si. Thukam Hlun hi Thukam Thar ih tham a si
bang tuk in Thukam thar ih a rung langmi pawl hi
Thukam Hlun ah a rak lang cia
ih Thukam Hlun ih phuansuah cia mi pawl tla Thukam Thar ah a tak ih ti famkim a
si tikah hlon theih lo an si. Thukam Thar kan siar tikah Jesuh thuhla hi tampi
kan hmu thei, Amah rori leipar a tlanlennak thu pawl kan hmu thei.Asinan Jesuh
hi Thukam Thar lawngih um a si lo ih Jesuh, Amah rori in Abraham hlan ah ka um
zo a ti bang tuk in Thukam Hlun sung khalah Jesuh thuhla hi a rak phum aw cia
zo a si.Fapa a sinak hi Thukam Thar in a thok lo ih minung dinhmun la in naute
ih a suah thoknak a si sawn.
1.
Jesuh ih hramthoknak Johan 1:3; Kol.1:16
Johan
1:3 Amah sung ihsin Pathian in ziang
hmuahhmuah a seemsuah; seemsuah mi thil hmuahhmuah sungah hin amah tel loih
tuahmi pakhatte hman a um lo.Hi thu ihsin fiangten kan hmuh theimi cu
Mari in Jesuh a hrin hi Jesuh ih hramthoknak a si lo ti a fiang. Jesuh cu
sersiammi a si lo ih thil ziangkim hi Amah ihsin siarsiammi an si sawn.
Curuangah Jesuh cu Pathian a si vek in lei le van a sem hlan ihsin um zo a si
tihi el theih lo a si.
2.
Bawipa ih
vancungmi
Sem.16:7-17
Bawipa
ih vancungmi timi hi Bible sungah tampi kan hmu thei ih hihi Thukam Hlun ih
Jesuh phuanawknak a si tiah Bible thiam tampi pawl ih phuansuah dan a si. Jesuh
ih pom a sinak san pawl:
a.
Sem.48:16 Siatsuahnak tinkim sung ihsin i runtu vanmi in, Nannih cu thlawsuah lo
pe hramseh. Vancungmi menmen ih runtu an si
thei lo ih thlawsuah an nei lo.Runtu,thlawsuah neitu cu Jesuh a si.
b.
Thut.13:18 Cule vancungmi cun,
“Ziangah so ka hmin theih cu na duh? Ka hmin zohman ih theih ding a si lo,” * a ti. zohman ih theih ding a si lo timi hi mangbangza hmin ti thawn a ṭonghram ah a bang aw. Isai.9:6 a hminah
cun Mangbangza ti thawn a bang aw ih ruangah Jesuh relnak a si.Hi tlun ih Bible
cang hi a tlun lam kan siar a si le Bawipa ih vancungmi ti kan hmu thei,
c.
Bawipa ih vancungmi timi hi Thukam Hlun
le Thukam Thar ah hmuh ding a um veve. Asinan Thukam Thar ah cun Bawipa ih vancungmi timi kha cangfang te a hmang
ih Thukam Hlun ah cun cafangpi a hmang.
Angel of the Lord=Bawipai
vancungmi…..OT…Angel..cangfang tum
angel of the Lord=Bawipai
vancungmi…..NT…angel..cangfang fate
Curuangah Thukam
Hlun ih Angel of the Lord a timi hi Jesuh simnak a si.
3.
Thukam Hlun ih a
langnak pawl:
a.
Hagar hnenah
Sem.16:7-14
Hagar cu
ramṭhing ah mangbang vansang ih a um laiah Bawipa
ih vancungmi ( Jesuh ) in a tong. Hagar cun Bawipa ih hmincu El-roi tiah a ko.El-roi ti cu Hmutu
Pathian tinak a si. Jesuh cu kan harsatnak, buainak, thinharnak, zonzaihnak
hmuahhmuah in hmu ṭhehtu a si ih cui kan harsatnak sung ihsin in luat tertu
khal a si.
b.
Abraham hnenah Sem.22:11-14
Abraham cun a
fapa neihsun Isak cu thawinak ih hlan dingin a thah zik tikah van ihsin Bawipa ih vancungmi ( Jesuh ) in na
fapa that hlah a ti ih Isak ai ah Tuu cang a pek thu kan hmu thei. Abraham cun
cui hmun cu Jehovah Jireh tiah a ko hngehnge.
Jesuh hi kan thih ding ai ih thitu, kan
tuar ding ai ih tuartu, Pathian hmaiah Amai thiseh rori kengih raithawinak in
tuahsaktu a si. Cun um lo lak ihta um ter theutu kan hrangah Jehovah Jire a si
ringring. Cana mopuai tum khalah sabit ti a cem ih tidai rori sabit ti ah a can
tertu a si.
c.
Jacob hnenah Sem.28:13;
33:18-23
Jakob cu a pai’ inn ihsin a pu Laban hnen
lam pan ih a feh tikah hramlak ah a mah te’n lungto lukham in a it. A mang ah
vancung sangka ong aw in a hnen ah Bawipa
( Jesuh ) in a biak. Cun Laban inn ihsin inn lam pan in a ra kir sal ah
lamah ah mi pakhat ( Jesuh ) in a
buan ih cui ṭumah Jacob cu Israel tiah a hmin thleng a si.
Mahte lawng in sihmang ka um kan ti laiah
kan hnenah Jesuh a um ih in pawl ṭheu,ziang tik hmanah in tlansan dah lo, kan
kiangkap ah in bawmtu ding zohman an um lo lai caan khal ah kan hnenah Jesuh a
um. Cun Jesuh thawngin Satan fa, rulhrin, misual tiih kawhmi pawl hi ka rualpi,
pathian fa, mi thianghlim tiah kawh kan si ve ta. Jesuh thawngin hminthar ih
kawh kan si ve hi a va sunglawi ve.
d.
Moses hnenah Suah.3:2;
33:18-23
Pathian
ih vancungmi ( Jesuh ) hrambur alh hmangin Moses hnenah a langih Izip
saltang a mipawl runsuak tu dingah a ko. Moses in a a tlinlonak pawl a rel rero
nan Pathian kawhnak cu a el thei lo.A sinak vek ih feh dingah Pathian in a duh
sawn.
Zumtu, kan ni hi sual sal sungih a tang hrihpawl runsuaktu dingah kawhmi kan si. Kan tlinlonak,
sambaunak pawl hi phuahhlam ah, hnukdawk awknak ah hmang ding kan si lo. In ko
ti in kan hnenih umpi in tiam a si.
Suah.3:14 ah
Pathian a hmin a phuahsuah awk tikah “Keimah cu Keimah ka si.” a timi hi Jesuh in Johan
8:28,58; 13:19 “Keimah cu Keimah ka si.” ti ih a phuansuah awknak
kan hmu sal.
Cun Pathian inMoses cu zohman ih an hmuh
dah lo mi kha a hmuh ter, Amah rori kha
Moses hnenah a rung phuang langaw ih Pathian ih dunglam kha a hmu. Cu tluk ih a
sunlawinak cu Moses hnenah a lang ter.
Jesuh leitluna tlanlen laiah mifim, mi
thiam pawl hnen ihsin a rak thuhmi kha kan ni vek mi menmen hnenah langter a si
ve.Ziang tluk in a sung lawi! Luk.10:21-24
e.
Joshua hnenah Josh.5:13-15
Jerikho an do ding tum ah Joshua hnenah mi
pakhat , Bawipa ih ralkap pawl hotu
dinhmun in a rung lang sal. Cuti cun Jericho,
kulh sahpi ih kulhmi cu an do neh.
f.
Gideon hnenah Thut.6:11-24
Bawipa ih vancungmi ( Jesuh ) cu Gideon hnenah a lang ih, “Nangmah cu mi ralṭha na si ih Bawipa na
hnenah a um a si,” tiah a ti. Midian pawl kutsungih an tan lai tak a si ih,
Midian mipawl do ding tih aw hlah mi pakhat tluk neh fang in awl ai ten na neh
ding tiah a rung sim.
g.
Samson nu hnenah Thut.13
Nucing a si mi Manoah ih nupi hnenah nau
na nei ding ih Nazir mi a si ding. Curuangah Sabit ti, ei thiang lole in thiang
lo pawl na ei lo ding tiah a rung sim. Manoah cu a naupai mi ( Samson ) ruangah
a nun dan fimkhur a ṭul tinak a si.
Zumtu pawl khal kan nun hi thlah dah thei
kan si lo. Paul in ka hrangah thil ziang khal a thiang ṭheh asinan thil ziangkim
hi bawmtu an si ṭheh lo, ka unau tluknak ding a si ahcun ka tuahlo a ṭha sawn a
ti bang in midang hrangah kan nun hi uluk, fimkhur a ṭul.
h.
Daniel ih rualpi pathum hnenah Dan.3:24,25
Daniel rualpi pathum pawl cu milem hmai ih
an kun ve lo ruangah meipi sungih thlak an si.Asinan cui mei lipi sungah Jesuh
a rung phuang lang aw ih an lakah a rung telve ti thu kan hmu thei.
Zumtu, Ami pawl in harsatnak kan ton tikah
Jesuh in in tuarpi ve, kan hnenah a um ve,kan harnak sungah kan hnenah a phuang
lang aw ṭheu. A va sunglawi ve.
Jesuh cu taksa in leitlun ih an
rungsuahnak cu BC 4 hrawng a si ko nan Fapa dinhmun ih a hramthoknak cu leilung
semhlan ihsin a si.Taksa ih a hnaṭuannak hi Thukam Thar lawngah hmuh ding a um
nan Minung taksa ih a suah hlan ih a hnaṭuannak cu lei leh van semsuah ah a rak
si zo. Cu vek in Thukam Hlun khal ah a tlunih kan tarlangmi pawl hi Jesuh
hnaṭuannak pawl an si ti ih Bible thiam tampi pawl khal ih an phuahsuahmi a si.
Cabu
siar>>> Willmingtons Guide To
The Bible
