Na Diriam Maw?

Na Diriam / Lungkim Maw?

Fili.4:11-13; 2 Tim.4:6-8

1.      Bawipai’ in hruai dan ah

           

            Zumtu kan nun lam tluan hi thlir sehla kan tonmi hi pakhat le pakhat hi kan bang aw cio lo. Hlan zumtu pawl ih nun khal kan zoh a si le Pathian in a hruai dan cio hi a bang aw lo. A caan caan ahcun midang nun hi kan zoh theu ih mi dang nun dawt caan tla kan nei, cu vek in um ve sehla ti caan kan nei theu. A thupi mi cu Pathian in midang a hruai dan zoh rero hnak in kan mai nun in hruai dank ha a thupi sawn. Bawipa in mi dang a hruai dan ah na lungawi maw ti hnak in Bawipa in ka nun i hruai dan ah ka lungawi maw ti thei a tul. Mi in Pathian hnenah lungawi thu an simnak ah tel ve theu si kan mah hmuah in lungawi thukan sim dah lo a si ahcun Pathian ih in hruai dan hi kan siar lo theu ruangah a si.

            Voi tampi ancunmi dang thawn kan tah aw ih Pathian thlawsuah dong lo cuang ah tla kan neih aw theu. Mi neih vek kan neih lo ruang khalah Pathian kan vui theu. Pual cun Fil.4:11-13 ah Thungai ti ahcun ka neih zatte thawn lungkim zetih um ding ka thiam zo. ¹²Tlasam ih nundaan ka thiam ih neinung zetih um khal ka thiam zo. Cutiih umdaan thupte cu ka zir ngah zo ruangah khuitawk hmun hmanah le ziangtik caan khalah ka pumpuar in siseh, ka riilrawng in siseh, malte ka neih ah siseh, tampi ka neih khalah siseh, thinlung nuamte ih um ka thiam zo. ¹³Cahnak i petu Khrih sungin ziangkim ka ti thei. a ti. Len le len lo ah a nun a buai lo ih Bawipa in a retnak tawk ah  hin a lungkim tawk emem tihi kan hmu thei.

            Zumtu kan nunnak cio zoh aw sal sehla, kan ni teh Pathian in in ret tawk ah kan lung a kim tawk maw? Bawipai in in pek tawk, retnak, siternak parah kan lung a awi tawk maw? Tu ih kan din hmun ihsin hmailam kan pan nawnlo ding ti lam cu a si lo nan tu dimhmun ih in retnak zawn ah diriam nun nei ding kan si.

Pastor…Bawipa ziang ruangah  Pastor khimi pa vek in I tuah lo?

Evan….Bawipa ziang ruangah Evan. Khimipa vek ih sawmtu ka neih ve lo?

Sumdawng…Bawipa ziang ruangah khimi pa vek in in len ter lo?

Singer…Bawipa ziang ruangah ka singer pi hmuah inn tha na pek?

Lothlo… Bawipa ziang ruangah khi te hmuah an patha cuang? Tvp

            Zo vek minung kan si khal le kan mai hnatuan pi pawl zoh tahrat ih an mah vek kan si lo le Pathian vuihram kan hmang theu. Paul cun midang nun a zoh ve lo, amah le Pathian lawng a zoh ih Pathian hruainak parah a lungkim ti kan hmu thei. Pathian in in ret tawk ih diriamnak kan nei lo a si ahcun kan nun cu a cawl hahdam thei lo ding tinak a si.

Nun colh hahdamnak a neitu pawl cu Pathian ih ret tawk ih diriam nun a neitu pawl an si.

2.      Pathian hrang  kan hmanawk dan ah

            Ahmaisa ah Pathian ih in hruai dan ah kan lungkim tawk maw ti kan cek awk a thupit rual in kan mah in Pathian hrangih kan hman awknak ah teh kan lung a kim tawk maw ti cek awk a tul. A caancaan ah cun Pathian hna kan tuan kan ti tikah a hmin men ih tuan hi a awl nasa. Thinlung tak ih tuan si lo in ti lo cun a mawi lo aw ti vek hrawng ih tuan a theih. Paul cun 2 Tim.4:7-8 ah “Tlan zuamnak ah ka ti thei patawp in ka tlan zo; tlan zuamnak a netnak tiang ka tlan zo ih ka zumnak khal thlauthla lo tein ka pom hnget zo.  ⁸Atu cu ka Bawipa, a dingmi thuṭhentu Bawi in cuih Ni ih i pek dingmi nehnak laksawng ka hrangih in ret sakmi in i hngak.” a ti. Paul cun Pathian hrangih a hmanawknak ah hin a diriam tawk tihi kan hmu thei. Pathian in a hna tuannak ah kan tithei tlun lam tiang kan ti ding hi in phut hran lo,a sinan kan ti thei awm khal ti lo ih thlah dah awk a theih, cu mi cu zumtu kan nunnak ih thil poi zet a si. Hi ti in vun cek aw hnik sehla

·         Pathian si bang aw la tu ih Biakinn ih na khawm awk dan in mi pakhat hi um sehla na lungkim kem?

·         Pathian si bang aw la tu ih na pek dan ah na kim tawk kem? ( Mi then in a hlu kan thlak tikah hman theih lo ding paisa setuk ti vek kan thlak tla hi cu Pathian hi a um ti kan zum  lo hmang ha ti ding khop a si.)

·         Pathian si bang aw la tu ih nan nun dan hi na diriam tawk kem?

·         Pathian si bang aw la tu ih Pathian na pehtlaih dan vekin mi pakhat in lo pehtlaih seh la awm ang tawk in na thei kem?

·         Pathian si bang aw la tu ih Pathian biaknak ih na hruh theumi sinfen vek hruk in mi pakhat in lo biak sehla  tha na ti kem?

·         Pathian si bang aw la tu ih na thlacam dan tluk in mi pakhat in na hnenah thlacam sehla na lungkim kem?

            Aw le rel vivo ding cun tampi a um ding.  Minung kan si sung le hi leiram ih kan um sung ahcun mi famkim cu si a theih lo, cak ringring khal a theih lo, mi derdai kan si ti cu Pathian in in theih pi tuk. Cu mi ah tan la tlang thei sehla ti duhthusam cu Pathian kan peh tlaihnak ah hin duhthu sam vek rori ih kan tlin thei lo hman ah kan mah a tuahtu tal in hi tluk cun a awm ang ko ti ih kan lungkim thei ding hrawng talc un zuam thei sehla. Mi tuahzat/ mi tuah vek ih tam kan tuah thei lo a si hman ah kan tuah sun tete ah kanmaha tuahtu ih lungkim ding tal cun tuah thei sehla.

Nangmah khalih lungkim tlak in Pathian hrangah Tuah zuam aw.