Kum Thar Sermon ( Sermon for New Year )

Thazang Peknak

Joshua 23:8 Tuihsun tiang Bawipa nan pomhnget bangin hmailam khalah pomhnget ringring uh.

            Pathian lam hruainak thawngin kum thar  hmang theitu kan si hi a sunglawi nasa. Ziang vek in kan parah thil a thleng ding ti akn thei ban lo ih tu tikcu ah mi thenkhat cu tap le mangbang in tik cu hmang tla an um ko. Cuang pawl kan va tuarpi lo lam si lo in him dam te’n kan um hi Pathian kilvennak a si. A tu kum thar sungah ke kan kar thok thlang dingih kan za te’n kan hmai lam caan hrangah thangzang la thar sal uh si.

Kum Upa Pawl Hnenah

1.      Pathian ih cangcawi mi

            Lei dan ah hin kan kum a upat vivo tikah mi ih ngaihsak leh theih tukmi kan sin awn lo. Pangpar vekin kan thima si le a vuai lam kan si tikah kan no lai tluk in mi ih sunloih le tlanmi kan si tuk nawn lo. A hleice in mino lak ah tla cun hmun ramkan co lo vivo ih san tla kan dum man nawn lo tikahkan mah te’n um har leh thanau in kan um theu. Asinan tui sun ah Pathian thu in thazang ka pek awk duhmi cu Pathian in kan kum a upat ruangah fate hman in in thlahthlam lo lawlaw. Isai.46: 4 Nan Pathian ka si ih ka lo kil ringring ding, Na ṭuakpar le na tarkuun tiang ka lo cangcawi ding a si. Ka lo tuah ih ka lo kilveng ringring ding; Bomnak ka lo pe dingih ka lo hum ding. Lei lam ah cun kan hlei vivo men thei nan Pathian lam ahcun kan sunglawi tuk a si.

2.      Fimnak leh theihthiamnak  nei tu

            Job.12:12 sungah Kum upa pawlin fimnak an nei, Sansau pawlin theihthiam- nak an nei, a ti. Hi fimnak leh theihthiamnak ih zirnak ih ngahmi a si lo ih tontehnak ihsin ngahmi a si. Cu ruagnah kum upa pawl hi zirnakihsin ngah theih lo mi fimnak leh theihthiamnak neitu kan si tikah  thil man khung zet neitu kan si. 1 Singp. 12: 6 ihsin kan siar a si le siangpahrang Rehoboam in a pa Solomon ruahnak petu patar pawl kha a ko ih an hnenah ruahnak a dil thu kan hmu thei. Curuangah kumupa pawl hi sanman lo tiih  hnon theih an si lo ih a ralai dingmi san in a liamcia ih fimnak, theihthiamnak pawl kha a tul ringring ti theih a tul.

3.      Pathian hrangah rahsuahtu

            Pathian thangthat nun :  Saam71:8,9   Sun nihlawh nangmah ka lo thangṭhat ding ih, Na sunlawinak ka than ding. A tar-aw pat tiah i hnong hram hlah; Santlai lo a si-aw pat tiah i dungtun hram hlah. Kan kum a upat tikah Pathian thangthatnak lamah hin kan thlahthlam aw theu ih ih a poi nasa. Kan thazang a mal, kan hriselnak a tha lo ti vek cu thukhat a si. Kan kum upat tik khalah kan thei tawk in Pathian thangthattu ding kan si. Saam ngantu in Pathian thangthat ngah lo ding hi a phang nasa ih hi nun te hi mawi ka ti.

            Pathian cahnak aupitu: Saam 71:18 Maw Pathian, a tar zo ih a ṭuak a par-aw, tiah I dungtun hram hlah aw. A ra dingmi santhar hnenih na huham le, Na cahnak ka aupi tikah ka hnen ah um hram aw. Kum upa pawl hi Bawipai’ thatnak, cahnak humhampawl hmu hmaisa tukan si tikah a r alai dingmi mino pawl hnenah cui thu cu sim in phuangtu ding kan si.

            Tum kung bangin :  Pathian minung pawl hi tum kung bangtuk kan si ih tum kung cu a tar hnu khal ah rah a rah bangin kan thih laihlan lo cu rah rah ding kan si. Kan lenglam minung cu a tumsuk hmanah sunglam ah minung tharthawhmi kan si ih kan rah suah hi kum upa in a dal ve lo.Saam 92:12-14 …..An tar hnu khalah rah an rah; A kumkhua in an hring ih an khohzet a si. Moses ih nunnak khal kan zoh asile kum 120 tiang a nungih kum 80 a kim ah Pathian in a ko ih Isreal pawl a hruai. Curuangah a kum then 2/3 a hman zo hnuah naza takin hna a tuan lai ti kan hmu thei. Joshua nunnak khalah kan hmuh theimi cu Joshua14:10,11 Cule vun ruat ve hnik! Cutiih Bawipa in Moses hnenih a sim cu kum sawmli le kum nga a si zo. A cuih caan ahcun Israel mi cu nelrawn sungih an feh lai caan a si ih, cuih sungah hin Bawipa in harhdam zetin i kilkhawi ringring a si. Atu-ah i zohhnik aw! Kum sawmriat le kum nga ka si zo. ¹¹Asinain tuih ni tiang Moses ih i rak thlah lai vek thotho in ka cak lai hrih. Raldo dingah siseh, a dang hnaṭuan ding vo ka neihmi ah siseh, ka cakzet lai hrih a si.

Mino Pawl Hnenah

            Ka No tuk lai ti hlahJer.1:7  : Mino pawl thinlung ruahnak ih a um  theumi cu no lai ah sumpai, fimthiamnak hawl ding lawng a umih Pathian hrang cu leh hnu ah ti a um theu. Kan no lai fimthiamnak, sum pai kan hawl ding a dik, a sinan lehhnu ih Pathian hrang kan timi hi cu a dik lo. Kan nolai, kan that laiah Pathian hrang tam sawn, cak sawn, diriam sawn ihkan tuan thei lai a si tikah hi caan tha hi  hmang ngah lo in kan lan pang ding ti a phan um. Kan tikcu nelam, a nenawilawng Pathian hrang kan tia si ahcunkan duh nawnlo mi lawng pathian  kan pe ti tluk a si ding.

            Taksa hiarnak tlansan 2 Tim.2:22: Kan no hi kan taksa cakhiarnak cak lai tak a si vekin a tlansan tikcu lai tak khal a si. Kum upat hnu ah cun taksa caknak pawl tla do rero tul lo in an hlo vivo mai. No lai ih taksa cak hiarnak tha lo lakih hmang aw tukpawl hi sirawknak a nei tlangpi. Curuangah kan taksa ih cak hiarmi ih piang tuah thluh lo in tu hi kan tlansan ding tikcu tak a si.

            At thlak thu elawknak ih tello2 Tim.2:22: Thu el awknak hawl thlak zetzet a um rual in hlawknak ziang hman suahpi lo in thinhengnak leh tawhawknak lawng a suahpi tu thu elawknak a um ih cucu Pual in at thlakza thu elawknak a ti. Mi then khat cu a ziang thukhal va siseh la mi el paih ve hrimhrim, a dik sawn thlun ti khal um cuang lo, el awknak ih ne khortu sic uh tengteng an um. Cu vek ih hlawhnak umlo atthlakza ih tello hi a tha sawn.

Nu Pawl Hnenah

            Hanah nun 1 Sam.1:9-17 : Kan ram dinhmun kan zoh tikah mipa hnakin nunau hi thlacamnak lamah kan tha hnen tlangpi in a lang. Hanah hi fa nei theilo a si ih a thlacamnak thawngin Pathian in fa a pekmi a si ih a fa Samuel khal Pathian hnen a tiam cia bangtuk in puithiam kan theihzetmi ah a rung cang vivo. Kan thlacamnak in thil a ti danglam thei, rah tha a suah ti thei in thlacam kan dai thlang lo kei uh. Hannah kha puithiam Eli in zu ri ih neih ding tiang in reipi tiang thlacamtu a si.

            Esther 4:4       : Judah mipawl thah theh ding thu rapthlak a um laiah dan lo in siangpahrang ton dingin ral thatnak a nei. Pathian hnen khalah thlacamnak in an tang ti kan hmu thei.Esther nunnak ihsin kan hmuh thei mi cu a mi pawl luatnak ding hrangah ti in amai nunnak tiang derthawng in ralthatnak thawn siangpahrang a tongih luatnak an hmu ti kan hmu. Pathian ram kauhnak dingah kan hmaisa ih harsatnakpawl raltha zet in kanpah vivo ngam kei uh.Pathian kan a tang ih hlawhtlinnak in pe ding a si.

            Zumnak lamah 2 Tim.1:5     : Timothy ih zumnak a neihmikhal a pi Lois leh a nu Zunis ih neihmi a si ti kan hmu thei. Cu vekin nu pawl leh hnu kan tesinfa hrangah zumnak lamah pa cang takin thuanthu tha kan ngan ding hi ka thupi. Lei hlawnthil tha leh lei lam dinhmun ah rel ding kan neih lo hmanah zumnak thu ahcunkan fa leh ih zohthim ding ih nun neih zuam cio uh si.