Jesuh Suahnak Ihsin Zirnak 6

Jesuh Suahnak Thu Ihsin Zirnak 6

            ( Matt.1:18-2:23 )

            Matt.1:18 ihsin kan siar asile Mari leh Josef thu, Nisuahlam mifim leh Herod thu pawl kan hmu thei. Jesuh suahnak thuhla hi kan theih zetmi a si ih Christmas tikcu caan ah sermon tinkim ah kan rel mi a si vekin tu khalah Jesuh suahnak thu thawn pehpar in thu paruk zir tlang leh sehla.

1.      Mari nun  ( Matt.1:18;Luk.1:26,38 )

            Pathian duhnak hlawhtlin ter duhnak :Mari hi Josef thawn nei aw dingih hamcia mi a si tikah zo dang thawn hman kop a thiang nawn lo mi a si. Cu ti lai lak ah nau na pai ding ti thu a don

tikah thil cang thei lo a si. Josef fa si lo in midang fa pai ding cu a hrangah cun khawruah har za a si. Lung ih den thah theih, Josef thawn nei aw sal lo, mi hmai ih mualpho ding kha a hmabak pawl an si. Asinan Mari in a netnak ah Vancungmi hnen ih a simmi cu Na Thu Bangin Si Ko Seh ti a si. Hi ṭongkam hi a sau lo nan hi ṭongkam ruangih a ton dingmi cu thil na men lo a si. Mari cun Pathian duhnak kha a par ih hlawhtinter duhnak thinlung a nei. Mi in ziang tin in rel se ding, in nautat ding ti vek ah a buai duh lo. Mual pho ngam in a hnen ih thu thleng kha a pom mai.

            Zumtu kan nunnak ah hin Pathian duhnak ti pitlin ih a um theinak dingah kan mah lam mualpho , mi ih relsiat phang in kan um ṭheu caan a um ding ah ka ruat. Mari nunnak ihsin thazang kan la thar sal kei uh.

            Pathian in a harnak a cinfel sak: Cu vek ngaingai in Josef cun Mari cu nau a pai ti a theih tikah ṭhen sal a tum. A um dan cu Mari cun a duhdawtzet mi a tlangval a caan ding tinak a si.Asinan Mari, amah ih  thiamthu rel ṭul lo in Pathian sawn kha Josef mangah a phuang aw ih thu hla um dan a sim. Cu ti cun Josef khal in Mari cu a ṭhit.

            Pathian thu ruangih mualpho kan huamnak ah Pathain hi dai te’n a um men dah lo. Kanmah ih cangvaih ṭul lo in kan harsatnak hi Amah in in cinfel sak ṭheu a si.

2.      Josef  nun ( Matt.1:19,24 )

            Mi mualphoh lo : Josef cun Mari hi nau a pai ti a theih tik ah Mari hi mual pho zet ih tuah thei a si.A hamtu a si bangtuk in Mari parah tuah theimi tampi a nei. Asinan Josef cun Mari kha mualpho lam si lo in ningzak ih tuah a duh lo ruangah a thupte’n an hamawknak phelh sal a tum.

           

            Hi zawnte ah hin Josef nun a va mawi lawmmem ve. Zumtu tampi cu kan mai parih siatnak a tuahtu hman si lo, kan mah tawn pehpar lo emem khal hi siatnak thu than, rel, phorhsuah, simsiat kan paih lutuk hi cu kan nun dan ding a si hrimhrim lo mi a si. sual hi kan thup ding tilam si lo in mi dang thatlonak, tlinlonak,siatnak rel kan paih lutuk ding hi a si lo.

3.      Ran rawl einak kuang ( Luk.2:16 )

            Kan hrangah a sebik khal a huam: Pathian in leitlun mi pawl run suak ding ah a Fapa neihsun a pek tikah hi leitlun ih a rungsuahnak dingah hin siangpahrang inn leh inn ṭhaṭha hril lo in rannung rawl einak kuang a hril. Kan luatnak dingah dinhmun niam bik, se bik ih din khal a huam tinak a si.

            Pathian cun kan mai hrangah din hmun niam bik ih um a huam laiah kan nih cun Pathian hrangah hin hna te nau ih ruahmi tla ṭuan kan huam lo pang maw ti hi ruahawk a ṭul. Pathian hrang a ropi zawng lawnglawng ih lang kan tum a si ahcun kan ṭhelh lellel tinak a si.

4.      Nisuah lam mifim ( Matt.2:1-12 )

            Jesuh hmuh duhnak: Jesuh a suah tikah Amah tong dingah nisuah lam in mifim an ra ti kan hmu thei. An ratnak hi fumfe zet ih theih a si lo nan lam hla zet in a ra ti cu a fiang. Ziang tluk in an si an hmuhmi an thupit ih ziang tluk in Jesuh hmuh an duh ti a lang. An duh vek rori in Jesuh cu an hmuh ngah. Pathian hi a mah ton duhnak taktak a neitu in amah tong ngah lo in a um ter dah lo.

            Siannak: Mifim pawl cun Jesuh an hmuh ngah tikah an neihmi hlawnthil an pek. Hi mifim pawl hi Jesuh laksawng pe hmaisa biktu an si. Jesuh tong ngahtu pawl hi siannak in an thinlung a luah ṭheu. Zakia khal in Jesuh a ton ngah in peknak thinlung a nei a si kha.

5.      Izip ah an tlan ( Matt.2:13-15 )

            Thu awinak: Mifim, arsi zohthiam pawl an feh sal hnuah vancungmi cu Josef  hnenah lar aw in Izip ram ih tlan dingin a fial. Mifim pawl in Jesuh an va ton kha ran rawl peknak kuangah a umlai tikah Jesuh hi a thla a kim hrih lo ding ti a zum um. Cu tluk ih a no laimi rori cu Izip ramih tlan dingin thu an dong. Bethlehem leh Izip cu peng 429 tluk ih hla a si. Nau no cawi lai hrangah cu tiang khual tlawng ding cu ziang tluk in a har ding.Asinan Pathian thu awi ih cu tluk a harmi asinan a feh thotho.

            Pathian in lamzin nuam lawnglawng zawh ter in tum lo ih lam har zet khal in phah sak ṭheu. Pathian fialnak vek in lam  har khal hrial lo tu hi Pathian in lamzin nuam ah a hruai sal ṭheu.

6.      Herod thinhengnak ( Matt.2:3,16 )

            Mi hmuahhmuah in in lawm lo: Herod in mifim pawl hnen ihsin singpahrang thar a suah thu a theih vete’n a thin a har zo. Cu lawng si lo in mifimpawl kha a fial vek in si lo in lamzin dang in an feh ti a theih tikah a thin heng. Cui naute that ngah ding ih Bethlehem khaw kiangkap ih naute mipa pawl a that ṭheh. Mifimpawlin Jesuh suah thu an thei ih an ton ngah in an lung awiawi thawn Herod cu thinlengnak in a khat.

            Zumtu kan si cun mi hmuahhmuah in in lawm cio ding hmang ti’n kan ruah lai ah cu vek a rak si lo. Misual zet  rori zumtu kan si cun mi ṭhen in in lom zet, in lungawi pi zet laiah cu ti vek in kan um ringring lo. Huatu, dotu, mitkem tu tampi an um thotho. Curuangah mi hmuahhmuah in in duh thluh dingih kan ruah a si ahcun a rei hlanah riahsiatnak in kan nun a luah ding ti nak a si. Mi hmuahhmuah ih lom dingmi ka si lo, in huatu khal tampi an um ding ti theihfuh hi kan nun hahdamnak a si.


Cabusiar. The Preacher's outline & sermon Bible