Jesuh Suahkehnak ihsin zirnak ( Lessons from genealogyof Jesus )

Jesui’ Suahkehnak ihsin Zirnak

            Matt.1:1-17

            Jesui’ suahkehnak thu ( genealogy) hi Mathai sungah le Luka sungah hmuh ding a um.Bible sungah suahkehnak thu, thlah sawn awk thu hi a tam zet, a hleice in Thukam Hlun sungah a tam cuang ih siar a paih um tuk lo tikah kan siar a si len ti zualzo in kan siar deuh ṭheu dingah ka ruat. Jesui’ suahnak thuhla khalah pupa cithlah hmin pawl tarlan a si ih hi mi ah hin thil thupi zetzet zir ding a um.

    1.      Pathian rinumnak leh thutiam Messiah ( cang 1 )

            Judah mipawl lakah Jesuh hi Messiah a si ti pom lo mi tampi an um.Asinan Pathian thutiam Messiah a si zia hi hi suahkehnak/ pupa hmin

tarlangmi in a fiang ter. Pathian in Abraham cithlah, David tesinfa in a si ding ti ih an rak simcia mi vek cekci a si zia in Messiah diktak a sinak a tarlang a si. Cun Pathian hi a thutiammi ih a rinum zia a langter. Abraham hnenih thu a rak tiamcia mi kha tikcu reizet hnuah a tak rori in a run kim ter.

2.      A ṭhekdarhmi pawl thazang peknak ( cang 2)

            Jesuh suah tikcu hi Rome uknak san a si vekin Judahmi ( Jews ) pawl hi hmun dangdang ah ṭhekdarh an si. Judahmi ( Jews ) kan timi pawl cu Jacob fa 12 ih tesinfa pawl hi an si. Judah lawng hi Jesuh thlahtu pa asinan Jesuh suahkehnak thu ah hin Jacob ih fa cu Judah a si ti men lo in Judah le a unau pawl an si a ti kherkher. Cu ruangah Jesuh cu Judah ih tesinfa hrang lawng si lo in Jacob ih tesinfa ( Jews) pawl khal in hmun an co zia kha a ṭhekdarh awmi Judahmi pawl thazang a peknak a si.

            Zumtu khal in harsatnak, mangbangnak, nehsawhnak a phunphun kan tuar tikah Pathian in tlansan zo si hmang kan ti ṭheu.Sihman sehla Jesuh Khrih kan hrangih a suahnak hi kan hrangah a sunlawizia hmunkip ih thekdarhmi zumtu hrangah kan thazang si ve hramseh. Kan ṭulsammi hmuahhmuah Jesuh Khrih ah Pathian in theihsak ih a thutiam a hlen ṭheu a si.

3.      Pathian ih lainatnak ( Cang 3-6 )

            Jesui suahkehnak tarlanmi ah hin a danglam zetmi nunau pali kan hmu thei. Cu pawl cu :

1.      Tamar        : Thlemtlutu, uire a si.

2.      Rahab        : Judah pawl ih an hnonmi gentile, hlawhhlang a si.

3.      Ruth          : Judah miphun pawl ih huatzetmi Moab miphun a si.

4.      Bathsheba : David thawn a sualmi a si.

            Hi nunau pali hi Jesuh suahkehnak ih tarlan mi pawl an si ih hi hin Pathian lainatnak cu zianghman ih kham theih a si lo zia a langter. Nunau mipatnak, miphun sinak, sualnak khalin Pathian ih in lainatnak hi an kham thei lo. A va sunglawi em! Pathian lainatnak ṭang sungah cun zo vek misual, ziangvek miphun, zovek miiam khal kan tlem ṭheh a si.

4.      Pathianmi sinak hi rocun a theih lo. ( Cang 7-10 )

            Jesui’ suahkehnak ih siangpahrang tarlanmi ah hin miṭha, Pathian ṭihzahmi an um rualin mi sual, Pathian ṭih lo khal an tel ve. Curuangah nu le pa hi Pathian mi an si ruangah an fa le hi auto in pathianmi cia ih suak an um lo. Pathian mi sinak cu cithlah ah a tel  lo ih mah rori in Pathian thu theih, ṭihzah, Pathian lam hoi a ṭul zia a langter a si. Nu le pa in kan mah pathianmi kan sinak kha fale in an ring thei lo, kan fa le hi amah rori Pathian thu le hla kan fah a ṭul.

5.      Pathian cahnak huham ( Cang 12-16 )

            Cang 12 ah  hin Babylon sal an tan thu kan hmu thei. Cui sal an tannak ihsin Jesuh suah tiang cithlah a run tar lang. Himi in a lang termi cu Pathian in a mi pawl sal an tannak, harsat an ṭuarnak pawl a daithlan lo zia hi a si. Babylon kut sungah zonzai zet le nehsawh tuar ih an um tik ah hmailam luatnak hrang anmah te’n an sualsuak thei lo. Asinan cui sung ihsin Pathian cun a mi a runsuak ih Jesuh Khrih suahkehnak cithlah khal hlo lo ten a kilkhawi sak a si.

            Pathian in in hnong zo si hmang kan ti hnu khalah Pathian cun in thlahthlam lamlam lo. A caan a kim tikah a kutcak mangbangza thawn in hruai theu a si.

6.      Thlaraulam thuanthu ( Cang 17 )

            Hi cang khat te hi then thum then a theih.

1.      Abraham ihsin David tiang           : San 14

Pathian in uknak thu a tiam.

2.      David ihsin Babylon saltan tiang  : San 14

Uktu silo in sal an cang.

3.      Babylon saltan ihsin Messiah        : San 14

Uknak cem nawn lo Messiah a suak.

# Pathian in minung a sersiam tikah uktu dingah a tuah.

# Asinan Satan sal sungah kan tang theh.

# Fapa Jesuh thawn in in tung ding sal.


Ref. The Preacher's outline & sermon Bible