Zianghman Ka Si Lo Tiah Na Ruat Aw Maw?

Zianghman Ka Si Lo Tiah Na Ruat Aw Maw?

1 Sam.15:17 Cutikah Samuel in, “Nangmah cun zianghman ka si lo tiah na ruat-aw ding nain Israel miphun pawl hotu na si. Bawipa in Israel siangpahrang ah hriak a lo culh a si.

            Israel siangpahrang hmaisabik hi Sual a si ih cumi hlan sung hmuahhmuah cu Pathian in hruaitu pakhat khat hmangin Israel pawl a hruai. Siangpahrang an neih ding hi Pathian ih duhmi khal a si lo.  Israel mi pawl in an kiangkap ih  miphun pawl bangin siangpahrang neih a duh ve ih Samuel hnenih an diltuk hrat ih ruangah  Pathian siannak ih siangpahrang nei an si.

1.      Saul ih dinhmun leh Pathian ih hrilnak

            Sual hi taksa ahcun mi piang zet a si ko nan dinhmun lam ah cun mi nauta a si thu kan hmu thei. 1 Sam. 9:21 Saul in, “Kei cu Benjamin phun ka si; Israel miphun lakah phun fate bikmi ka si. Cun kan phunkhat sungah kannih sung cu santlai lo bik sung kan si fawn. Curuangah ziangtinso hiti in ka hnenah na ṭong?” tiah a ti. Lei mithmuh ah santlai lo bik sungkua ihsin thanglianmi a si. Pathian cun  Israel siang pahrang dingah a hril thotho. Pathian in Sual ih dinhmun siatnak hi a thei lo a si lo a thei tuk ko nan Pathian  cun a iai cuang lo.

            Pathian in mi a hril tikah lenglam mawinak, mawilonak, tlinnak, tlinlonak ah a buai ve lo. Pathian in mi a hril tikah a hrilmi pawl ih dinhmun hi an siat, an that, ziangkim hi a thei theh. Curuangah Pathian in mi a hril cungcang ah hin  kan ni buai ding hi a um lo nasa. Kan  ni khal kan mah lam zoh awk tikah cun voi tampi cu tling lo, si thei lo, tlak lo ih theihawknak hi kan nei theu. Pathian cu cu vek ah a buai ve lo. A hrilduhmi cu a hril a si ko. Pathian hin kan sambaunak a theih ngahlo ruangah ah in hril sual pang a si lo ih kan sinak thei depdep theh ih a hrilmi kan si sawn. Hi thu hi ziang tluk in a sunglawi.

2.      Dinhmun niam ihsin dinhmun sang

            Sual cu hril a si vekin siangpahrang dinhmun ah a ding ih amah hmangin ral an do tikah nehnak an co vivo. Voikhat cu Amalek mi pawl an do tikah Pathian ih fial vekin tuah lo in thah theh ding a timi sungih sin an siangpahrang Agag le ramnung thauthau pawl a zuah. Cucun Pathian a parah a lungawi nawn lo. Ral nehnak thawmvang thawn a rat lung nan a siangpahrang tohkham a hloh ni ah a cang ta riai. Puithiam Samuel a ra thlen tikah nasa zetin a kawk. A tlun ih Bible cang kan tarlan bangin  “Nangmah cun zianghman ka si lo tiah na ruat-aw ding nain Israel miphun pawl hotu na si”  a ti. Samuel tongkam ih kan hmuh bangin Sual hi ziang hman lo te, dinhmun niam emem ih rak um a sin an Pathian ruangah ziang tluk mi thupi a si tihi kan hmu thei.

            Zumtu kan nunnak ah Pathian in in retnak hi zianghman lo vek men ih kan thlahdah awk theu hi thil poitak a si. Pathian in kan liang parih tuanvo in pekmi hi a bang aw cio lo. A bang awk lo hmanah Pathian ih in siter vek ih tha ten kan tuan ding hi thil thupi bik a si. Pathian in kan liang parih a thummi tuanvo hi a caancaan ahcun a hmin men in kan tuah theu, thupi ah kan ruat lo theu, cu lole cumi tuah dingah thupi ah kan ret aw lo theu kan ti pei. Pathian ih hrilmi kan si ruangah luang maw lang men ih um ding kan si lo ih mi thupi ngaingai kan si timi kan theih awk a tha. “Kei men hi ee” ti aw tahrat ih daithlang ih kan um a si ahcun kan parah thil poi zet a thleng ding.

3.      Siangpahrang dinhmun in zianghman lo ah

            Siangpahrang Saul cu Pathian in a hnong ih a ai ih Israelsingpahrang dingah David hril a si thu kan thei theh. Asinan vei leh khat ah David kha siangpahrang tohkham ah a to hngal lo, Sual in ziang maw ti zat tiang a run luah lai. Sual hi Pathian in a hnon hnu khalah siangpahrang a si vekin ralkap tampi a nei, ral thuam thatha tampi a nei lai, hriamhrei khal a nei kel te in a nei theh ko,hmansehla Sual in ral a neh thu hi hmuh ding a um nawn lo. Zianghman lo dinhmun in siangpahrang ah a cangih tu ahcun siangpahrang si cing si in zianghman lo dinhmun ah a cang. Pathian  a lamih a tan nawn lo ahcun a neihmi ralthuam, hriamhri, ralkap pawl hi ral nehnak ah an tlak nawn lo.

            Pathian in kan tlin, kan tlak ruangah in hril a si lo, hman in duh men sawn a si, hmansehla Pathian ruangah mi thupi tak kan si tihi hngilh lo a tul. Daithlang in mah le mah zianghman lo vekmen ih kan ruat awka si ahcun hnon kan tong thei. Pathian in in dungtun a si ahcun minung zuamnak, thiamnak, fimnak, thilti theinak pawl hi san tlai lo ah an cang theh men. A netnak hrangah:

Pathian tello cun zianghman lo ka si, Pathian ruangah mi thupitak ka si