Khrih Thu Theihpitu ( Withnesses for Christ ) Tirh.1:8

Khrih Thu Theihpitu ( Withnesses for Christ )

                        Tirh.1:8

            Tirhthlah cabu kan siar a si le’n Jesuh in van ih a lawn soh hlan deuhte ah a dungthlawn pawl hnen ih thu a cahtami kan hmu thei. Cucu A thu theihpi tu an si ding thu a si. Jesuh ih thuhla pawl hi mi tampi in an do, thuphan thu ah an ruat ih cu vek karalak ah a dungthlun pawl in Jesuh thu le hla an hmuh an theihmipawl kha dung sip san men lo ih dinpi/ fehpi /tanpi vivo dingih a cahta mi a si. Kan thumawknak hi Tirhthlah 1:8 a si bangtuk in hi Bible cang thawn peh par aw in thusuhnak pathum tar lang in zoh tlang sehla.

1.      Ziang A Tul?

            Jesuh in a dungthluntu pawl hi leitlun hmun kip ah fehsuak in a thu theihpi tu an si ding thu a sim. Phun dang deuh in kan sim a si len leitlun hmun tin ah a thuthang tha fehsuah pi dingah a fial. Asinan a fial veten feh suak hngal dingin a ti lo. Jerusalem ihsin Thiang Thlarau hngak dingin a fial. Tirh.1:8 Sikhalsehla nan hnenih Thlarau Thianghlim a rung thlen tikah cahnak huham thawn nan khat ding ih…..A hmaisa bik ih an tulmi cu Thlarau Thianghlim,cahnak huham a si. Minung kan sinak menin Pathian hna hi a tuan theih mai lo ti hi a fiang nasa. Vanlam hna tuan ding an si bang tuk in vanlam huham/thiltitheinak an co ta a tul. Thlarau sual huham a tam/minung cahnak ih neih theih lo pawl neh theitu cu vanlam huham cahnak lawng a si. Jesuh in a sim vek ciah in Thlarau Thianghlim an co tikah thilti theinak an nei ih mangbang za tampi an tuah  ti kan hmu thei. Mina an dam, khawsia an dawi, zeng an feh, an phenthlam ah an dam, mithi an kai tho mangbangza tampi an tuah a si. Cui thiltitheinak thawn Khrih thuthangtha an aupi tikah Thuthangtha in zam rang zetin ram a la vivo hngal a si. Dotu an nei tam zet nan ram an la vivo thotho.

            Zo khal Pathian hna tuan ding a si ah cun zumtu a si tengteng a tul.Khawvelmi in Pathian hna an tuan thei lo, an tuan a va si hmanah Pathian thlahmi pawl an si lo ti a fiang. Pathian cun amah zumtu pawl, Thlarau Thianghlim cotu pawl hi a hnatuan dingah a thlah a si. Thlarau humham cahnak thawn kan feh tikah mangbangza tampi a lang theu a si.

2.      Ziang/zo Hrangah?

            A tlun ih tarlan a si zo bangin cui Thlarau thianghlim humham cahnak cu ziang hrangah a si? Cui thilti theinak cu :

-          Mai hlawknak hrangah a si lo.

-          Mai hminthannak hrangah a si lo.

-          Mai sunlawinak hrangah a si lo.

-          Mai tanghmaihainak ding a si lo.

-          Khrih theihpitu  sinak langternak hrangah a si.

-          Mi in Khrih a theihnak ding hrangah a si.

-          Pathian sunlawinak hrangah a si.

-          Thuthangtha karhzainak hrangah a si.

Tirh.1:8 …cahnak huham thawn nan khat ding ih …… keimah ih theihpitu nan si ding,…

            Zumtu in kan tisual theumi cu Thiang Tlarau thiltitheinak ruangah damlo an dam, khawsia an tlan, mangbangza a thlen tikah Pathian sunlawinak ruk sak in kan mah kan theh lar aw ciamco theu ih, sunlawinak an pe aw ciamco ih, midang kan ngai nep ih, sibik ih kan ruah awk tikah Pathian a lungawi lo in cui thilti theinak cu in thuhsak theu a si.Thil ziangkim hi a hman lo nak dingih hman a tih nung um.Hi Thlarau huhamcahnak khal kan mai hrangih kan hman cun thil thlalo sawn thlentu a si. Kan mai thiltithei a si lo Thiangthlarau thawngin a si timi hi kan theih hngolh lo a va tul em. Dungthluntu pawl mangbangza tampi an tuah nan anmah le anmah an sunlawih aw dah lo Pathian sawn a sunloih theu. Pathian cu Amah sunloihtu pawl sunloihtu Pathian a si.

3.      Khuihmun ah?

            A hmaisa bikah Huham cahnak a tul ih cui huham cahnak cu Amah theihpitu kan sinak langternak hrangah a si ih theihpitu kan sinak cu khuihmun ah kan lang ter ding kan ti a si le  Tirh.1:8…. Jerusalem le Judea ram le Samaria ram hmuahhmuah le leilung tlun a deng tiang keimah ih theihpitu nan si ding,” ti’n kan hmu thei. Tirhthlah cabu kan siar tikah bung 2 nakin Thlarau Thianghlim a thlen thu kan hmu ih cucun Jeui’ thu an sim ih mitampi Khrih hnenah hruai luh an si. Bung 7 nak kan siar a sile Jerusalem ah an um thu kan hmu lai. Jesuh cun Jerusalem lawngih um ding kha  fialmi a si lo ih Judea ram le Samaria ram le leitlun hmunkip ih feh ding kha a si. Cu tikah bung 8 nakah ziang kan hmu thei ti a si len Zumtu hremnak kha nasa zetin a um ih cuti cun zumtu pawl kha an tlan, an thekdarh aw theh ih Judea le Samaria khaw tin ah an tlan theh. An thlennak hmun tinah Jesui’ thu an sim ih cutincun Thuthangtha cu a darh zai vivo.

           

            Zumtu kan nunnak hrangah hitin thazang la tlang sehla. Khrih thu theihpitu kan sinak hi kan mai innsang/khua  rori in thok ding a si. Mi lakah hmuah Thlarau ih khat bang si mai innsang ah hmuah a piangthar a si kei maw ti ding khop ih kan um cun a ngah lo. Kan innsang le kan khawpi pawl in Khrih thu theipi tu ( tet-ti ) kan si zia hi an palh ding a si lo Tirh.4:13. Kan fa le hmuah Pathian thu ih um dingah kan nor rero si ih kan mah hmuah thlahdah aw vio kan si ah cun ziang tin saw Khrih thutheih pitu kan si zia cu an hmuh thei ding? Jerusalem lawnglawng ih um a tawk lo bang in kan mai innsang lawng ah si lo in kan thlennak hmun tinkim ah mi in Jesuh tet-ti kan si zia hi kan hmu ding a si. Mai khua le ram ah hmuah felfai vio si hmun dang thlen vete in zum lo tu thawn bang aw thotho kan si cun a ngah lo. Kan thlennak tinkim ah hin “Zumtu a si” tiih mihmai ih simngam tlak kan si maw? asilole miin Zumtu kan si in thei pang ding ti phangtu ha kan si? Khrih thu theihpitu kan sinak hi kan innsang,kan khua le ram, ram leng/kan thlennak hmun tinkim ah a lang ding a si.
Tuisun ni tiang lungawi um emem cu kan Chin/Lai mi pawl hi kam thlennak ram tinah Thuthangtha kai hngettu ah kan tang vivo hi Khrih thu theipitu ( Tet-ti ) kan si zia a langnak pakhat a si. Pathian in bulpak kan nunnak cio ah hi lei caan a cem hlan tiang a Tet-ti tha kan si theinak dingah thlaw in suah hram seh. Amen