Harsatnak leh Pathian Kut Cak ( God's Mighty Hands in sufferings Acts 16:16-34 )

Harsatnak leh Pathian Kut Cak

            Tirh.16:16-34

            Tirh.16 sung thu kan zoh asile Paul le Silas ih thawngtlak thu, Pathian thu ruangih harsatnak an ton thu le Pathian ih kut cak mangbangza thu pawl kan hmu thei.Pathian in a hnatuantu pawl hi harnak ton a sian zia kan hmu thei ih cui harnak cu Pathian in a lak ah a can ter dah lo ti khal kan hmu thei. Cui thu pawl cu kan hrangah thazang in petu an si zia kan zoh tlang vivo ding.

1.      Thuthangtha ih thilti theinak

            Ni khat ah Paul le Silas cu thlacam dingih an feh laiah hmailam thu a sim theitu, khawsia ih luhhnawhmi nunau in “Himi pawl hi Cungnungbik Pathian ih sal an si! Rundamnak thu nan hnenah an phuang a si!” tiah a au vivo. A au mi thu hi thudik a si ko nan a au tertu kha a sungih khawsia a si ih a net ah Paul a ai thok ih cu nui’ sung ihsin a dawi tlan. Cucun hmailam thu a simsung theinak khal a hlo cih.

            Jesui’ san lai ihsin kan  zoh asile Pathian thu a thlennak tinkim ah khawsia pawl an tlan,dawi suah in an um ti kan hmu thei. Ram huai, khawsia pawl hnakin kan Pathian thu hi a cak sawn a si. Kan lairam thuanthu khal kan zoh a si le kan pi le pu pawl san ah rirai biak an si vek ih khawsia hnatuan hi theih ding tampi a um. Thuthangtha kan don ihsin Thuthangtha a thlennak ah khawsia pawl an tlan hi tuah cun khawsia thuhla tla theih ding a mal zet thlang. Kan Pathian thu hi thu menmen a si lo,khawsia, khuavang pawl ih tihmi Thu a si.

2.      Thuthangtha leh tuarnak

            Khawsia polhmi nu ih hmialam thu a sim thei nawn lo tikah amah nei tu/ amah hmangih sumpai ngahtu pawl an thin a heng ih Pual le Silas cu an kaih hnuah Rom cozah thuthentu pawl hnenah an hruai ih buainak tuahtu an si tiah sual puh in kaih an si. Nasa te ih vuak an tuar hnuah thawnginn sungah an khum.

           

            Pathian thu phurtu kan si ruangah hin harnak, buainak hi kan tong lo ding a si lo. Pathian in a mi pawl hi thuthangtha ruangah tuar in siang nasa. A caan caan ahcun harnak kan ton tikah Pathian  rem a ti lo a si ding kan ti theu. Tluan ruangah Pathian in rem a ti tinak a si theih lo ih tluan lo ruangah Pathian in rem a ti lo tinak a si theh cuang lo. Pathian cun duhsan nei zet in kan hmaika ah tluanlonak khal a ret theu a si. Cu ruangah kan tluanlonak hi Pathian in rem a ti lo a si ding ti thluh ding a si lo.

3.      Thangthatnak le Pathian kutcak

            Paul le Silas cu thawnginn ah an thleng ko nan Pathian hi an mawhthluk lo rengreng. Cu hnak in harnak thawnginn sung ah thlacam in Pathian thangthatnak hla an sak sawn. An nun hi a va ropi lawm mam ve. Nom caan le tluan caan ih Pathian thangthat hi cu a har lem lo, hlawhtlin ruangih Pathian thangthat khal a har lo. Zumtu kan danglamnak cu harsat caan. Tluan lo caan khalih Pathian kan thangthat theinak nun hi a si. Khawvelmi pawl mangbang tertu khal a si.

            Paul le Silas thangthatnak hla an sakmi cu thawngtla dang pawl in an rak ngai a ti. Thawng tla lo hai sehla thawngtla pawl khan Pathian thangthatnak hla ngai ding an nei lo ding. Harnak khur sungih a tangmipawl in Pathian an theihtheinak dingah Pathian in a thuphurtu pawl hi harnak khur sungah kan kuat theu sawn hi a rak si. Cun rinlopi ah ling a hnin ih thawnginn tohram tiangin a hnin, cun thawngtla pawl kut khihnak thir cikcin cu a zaten a phoih aw theh . hi tumih linghnin hi linghnin pangai a si lo ti a fiang. Ling hnin pangai cun mi a siatsuah theu ih hi tumih linghnin cun mi harnak a kiang ter sawn. Ankut thir cikcin phoih in a um.

            Thangthatnak hlasaktu hi Pual le Silas lawng an sin an kut khihnak thir cikcin poihsakmi pawl cu an zate’n an si. Harsatnak sungah Pathian kan thangthat tikah Pathian a cangvai theu ih kan thangthatnak a rak theitu pawl in luatnak an co theu a si. Pathian kan thangthat hi kan maihrang le Pathian hrang lawng a si lo ih midang nunnak damtertu ah Pathian in a hmang theu.

4.      Harsatnak leh rundamnak

            Thawnginn kiltu cu a ihthahnak ihsin a thang tikah tlawngtlaw pawl an tlnn hlo theh zo tin a ruat ih amah leh mah thah awk a tum thlang. Paul in mangmah le mah thataw aw hlah hi nah kan um theh a ti tikah a mangbangin an va tlan in Paul leh Silas cu “ Ka bawipa le pawl, rundamnak co dingah ziang ka tuah ding” tiah a va ti. Thawnginn  kiltu sawn in thawngtla mi Pual le kha ka bawipa tiih a kawh thiam cu teh. Cuti cun an inn ah a hruai ih Pathian thu an ngai hnuah an innsang zaten rundamnak co in baptisma an ca ti kan hmu.

            Thawngtla dang pawl an kut khihnak thir cikcin phoih ih a um mem lawng si lo in thawnginn kiltu le a innsang rori in rundamnak an co phah a si. Thuthangtha ruangah an tuar nan an tuarnak hin man a va nei lawm mam ve. Rundam kan sinak dingah Jesuh in a tuar bangtuk in midan gin cui rundamnak an co theinak dingah zumtu kan tuar hi Pathian in in siang a si.

5.      Thuthangtha leh zohtu tha

            Thuthangtha ruangah vuak le hrem an tuar ih thawnginn cu an thleng ko nan, thawnginn kiltu kha anmah tuamhlawmtu, zohtu an a cang. Thawnginn inn kiltu kha a lungawi tuk ih an hma pawl a buah sak, an ei ding ti rawl an timlam sak. Pathian Thuthangtha sim le phuangtu kan si vekin harsatnak ton caan, donak kan ton caan khal a um theu ih asinan Pathian in hna a tuan tikah cun in huatu, in dotu pawl tla hi kan rualpi tha, in zohthatu, in tuamhlawmtu ah an cang sal theu a si.

            Zumtu kan nunnak ah kan beisei lomi harnak in in cim theu, kan sual ruang ah si lo kan tuarmi a um theu. Hi caan ah Pathian kan vuivai theu maw? Pathian cun duhsan nei zet in kan parah hivek harnak hi a rak thlen ter theu a si sawn. Thinsau in Pathian  phuanawknak hngak ding kan si. Pathian a phuanawk tukah cun hi vek harnak hi ka tong lo pang kei ti kan phang sawn ding.