Friday, November 11, 2016

Babel Lungdawl Ihsin Zirnak ( 5 Lessons from Tower of Babel ) Gen.11:1-9



Babel Lungdawl ( Sem.11:1-9 )

            Babel lungdawl thuanthu hi kan theih larzetmi a si. Noah san tilik hnu ih thilthlengmi a si ih hi sanminung pawl in tuah dingih tumtahnak an neihmi hi thil nasa ngaingai a si. Pathian um men thei lo khop in tuahtummi an nei. Cui an tuahtummi cu Babel lungawl tiih kan theih lar zetmi a si. A thuanthu hi a sau vio lo ih hi thuanthu ihsin Pathian thu ah thazang la in zir tlang sehla.

1.      Tong pakhat le pumkhat awknak

            Tong hi minung kan nunnak ah thil thupi zet a si. Tong hi rak um lo sehla minung pawl hi ziang tin kan
khawsa pei ti hi ruah tikah  pol thiam a har nasa. Sersiammi dang pawl thawn kan bang awk lonak khal hi minung cu tong kan neih hi a si. Sersiammi dang pawl hi biak awk dan cu an nei ve ko nan minung vek in TONG an nei vun ti ding an si lo.Curuangah TONG timi hi Pathian in minung hnenih a pekmi laksawng sunglawi tak a si. Kan tong thei tla hi a va sunglawi ve, tong thiam lo sehla mi banglo dinhmun ih din ve mai ding kan si. Kan tong thei hi ziang tluk ih man khuang a si ti theih feng hicun Pathian hnenih lungawi thu  sim ding kan si. Minung hin tong kan rak neih hi khat le khat kan pawlkomnak le awlsam tertu a si. Sem.11:1 ih kan hmuh bangtuk in hi san laiah leitlun ah tong phunkhat lawng an rak hmang ti a si. Tui kan san ah cun leitlun ah tong phun 5000 tluk a um tihi zingzawitu pawl ih hmuh dan a si. Tong phunkhat an rak hman vek in pumkhatawknak hi an nei tha ih an lung a rual zet ti kan hmu thei. Ziangah ti a si len Babel lung dawl ding ih an sawm awk tikah lungrual takin an tuan mai. Tong timi hi pumkhat ih in tuahtu a si ih a thupi ngaingai. Tong a bangawk lo cun kan pumkhat thei lo tinak lam si lo in tong bangaw hi pumkhat awknak hrangih thupi zet a si ti sawnkha sim duhmi a si. Hmundang ih feh, kan tlawn tikah kan mai tongpi umnak kan hawl theu in kan ngai na aw zet. Curuangah hi pumkhat ih in tuahtu pakhat a si ve timi kan ti lo thei lo.

2.      Pumkhat awknak ih thazang

            “Pumkhat awknak/ Lungrualnak cu thazang a si” timi thufim kan theih theu bangtuk in hi Babel lungdawl tum khalah an pumkhat awknak hi ziang tluk in hna a tuan thei timi  hi  kan hmu thei. An tumtah vekin vandai ko in inn cu an dawl thok thlang tikah Pathian rori in “…tuah an duhmi an tuah suak thei ding” tiah a ti kan hmu thei. An tumtah mi hi thil olsam te a si lo van dai ko ih dawl a si.Asinan cu tluk thil khungkhai tuahsuak thei dingih thangzang an neih nak cu an pumkhat awknak a that ruangah a si.Amos 3:3 ah  “ Lungkim tlang loin mi pahnih khual an tlawng tlang thei ding maw? a ti bang in lungrualnak umlo cun mi pahnih te hman hna tuan tlang a theih lo. Ziang vek thil khungkhai khal lungrualnak thawn tuah theih a si zia hi Babel lungdawl thuanthu ih sin kan hmu thei.

3.      Tumtahnak leh Pathian thu

            Babel lung an dawlnak san pakhat cu “darhdai lo ih hmun khum ih um” ding kha a si( Sem.11:4 ). Hi an tumtahmi tak hi Pathian thu dokalhtu a si  kan ti thei.Ziangah ti a si len Pathian in minung a sersiam lai ah ci thlahzai ih leilung luahkhat dingin thlawsuah a pekmi a si. Leilung luahkhat dingin Pathian in thlawsuah a pek lai ah van dai ko innsak ih umkhawm,darhdai lo kha an tummi a si. Curuangah Pathian in a lungkimlo ih an tumtahmi hlen suak thei lo dingin an tong a cokrawi ter theh ih cu tic un hmun dangdang ah an thek aw sal.
            Tumtahnak kan neihmi hi kanmai hrangah cun thil tha zet tla a si men thei. Kan ruahnak in thil tha zet a si hman ah Pathian thu thawn a kaihawk lo a si ahcun Pathian in a thlawsuah dah lo. Kan tuahtummi a tha maw ti hnakin kan tuahtummi hi Pathian thu thawn a mil aw maw ti hi a thupi hmai sa. Thuf.19:21Minung cun a thinlung in khawkhannak tampi a nei ko ding; Sikhalsehla Bawipa ih khawkhannak lawng tuah a si ding.

4.      Lungto aiah phalei  ( Sem.11:3 )

            Vandai tiang khop innsaknak dingah ziang hman an tum ti asile lungto aiah phalei ( brick = ukkhe ) an hmang. Lungto hi Jesuh hmuhsaknak pakhat a si vekin lungto hmanglo in vandai tiang innsak an tum ti cu van kainak lam  hoi in kan sim a si len Jesuh tello ih van thlen tum vek khi a si. Bible kan siar a silen Jesuh locun zoman pai hnen thlen a theih lo ti cu kan theih thehmi a si. Minung lam ihsin a suakmi thil : thiamnak, fimnak, felnak, thatnak..tvp hmangin van thlen kan tum a si ahcun Lungto/ Jesuh tello in van thlen kan tum kan siih kan hlawhsam ding ti cu a fiang. Jesuh lawng Pai’ hnen thlen theinak umsun cu a si.

5.      Babel lungdawl leh Penticost ni ( Sem.11:1-9 & Tirh.2:1-47 )

            Babel lungdawl thuhla in kan hmuh theimi leh Penticost ni ih Thlarau Thianghlim a thlen tum ih zumtu pawl parih thil thleng hi mangbang za a si.

a.       – Babel lungdawl ah cun anmai hmin neihnak ding ah lung an dawl.
– Penticost ni ah cun Pathian an thangthat.

b.      - Babel lungdawl ahcun an tong cokrawi a si ih an tong an thei aw thei lo.
– Penticost ni ahcun tong dangdang in an tong nan mai tong vekin an thei theh.

c.       – Babel lungdawl ahcun minung pawl an thek darh aw.
– Penticost ni ahcun umnak hmun dang si in kawhhran ah an pumkhat aw.

d.      – Babel lungdawl ahcun minung parah thil duhumlo zet a thleng.
– Penticost ni ah cun minung parah thilthazet a thleng.

e.       - Babel lungdawl ahcun lungto aiah phalei ( brick=ukkhe ) an hmang.
- Penticost ni ahcun Jesui’ thu an phuang.

            Siartu nan zaten parah Pathian in Babel lungdawl thuhmang in a thar in lo pawl hramseh.



           

No comments:

Post a Comment