Pathian Hnatuan

Pathian Hnatuan

1 Cor.15:58 Curuangah ka duhdawtmi u le nau pawl, tlu lo dingin hnget zetin ding uh. Pathian hna cu taima zetin ṭuan ringring uh; Bawipa ih hnaṭuan cu a lak a si dah lo, ti nan thei.

            Zumtu’i hrangah hi lei kan dam san pakhat cu Pathian hnatuan ding hi a si.Pathian hnatuan dan cu lamzin a phunphun a um ih Pathian in a hnatuannak ih in hman duh dan khal a bang aw cio lo. Pathian hnatuan ah tum deuh le tanau deuh tivek khal Pathian hmaika ahcun a um lo, in fialmi cio rinum takih tuan ding kha Pathian duhmi a si.

1.      Kan Tlem Theh

Leitlun ahhin hnatuan ding tampi a um ih kan mah le kan sinak ih a tlin dan ih zir in tuan theih a si. Asinan kan duh zawng hna pohpoh kan tuan thei lo. Cozah, company hnatuan ding khal ah an mah lamin tlinnak tahfung an neihmi pawl ih kan tlin lawngah tuan theih a si. Hnasang, hnatuan tha tuan dingah tla cun mi maimai ih tuan theih mai a si lo, sinak sang neih a tul ve. Leitlun hna ahcun zo hmuahhmuah kan tlem theh thei lo. Asinan Pathian hnatuannak ahcun kan mah le kan sinak vek in kan tlem theh. Kei cu ziang hman ka si lo, Pathian hnatuannak ah tel tlak ka si lo ti vek a um thei lo. Lei leh van sersiamtu Pathian ih hnatuannak ah kan tel thei ve tla hi cu ziang tluk in a sunglawi. Pathian hnatuannak ahcun mi fim, mi nauta, mi sang ,mi niam, mi cak, tawntai, milian, farah, kan tel thei theh. Pathian hin tu oh kan sinak vekin a hnatuannak loram sung ah tel in siang theh a si.

2.      Thuthangtha phuan ( Matt.28:19,20 )

Jesuh in kumthum sung a rak kaihhruai rero mi a dungthlun pawl kha van ih a soh san ding tikah thu cah ta mi a nei. Minung in thu kan cah awk tikah kan hmu aw nawn lo ding khop ih kan then awk ding a si ahcun kan thinlung sungih thupi bik ih kan ruahmi kha kan cah ta aw theu. Jesuh khalin netabik ih thu a cah ta mi cu hmunkip ih Thuthangtha phuan ding hi a si. Thuthangtha phuandarh lam ih kan dai thlang a si ahcun Jesuh in “Bawipa,Bawipa in ti rero si thu k alo cahtami le ziangah nan siar fawn lo” in ti ding hi a phan um nasa. Hi thu cah hi Dungthlun pawl hnen lawngah a cah ti’n kan ruah ahcun kan ti sual zet ding. Tuisan zumtu pawl kan zate hnenih in cah ta mi thu a si. Kan mah rori a phuangtu kan va si lo hmanah Thuthangtha hmun kip ih a zai thei nak dingah kan tel thei dan ih trel ding kan si.

3.      Tlintawk ih Tuan ah Pathian a Lungawi

Pathian in a hnatuan hi kan tlin lo tiangtiang ih kan tuan ding hi a beiseimi a si lo. Midang pawl ih tuan thei tluk ih tuan ding khal in phut lo. Midang pawl an pek awk thei tluk ih kan pek awk thei lawngah Pathian cahlan tlak kan si tinak a si lo. Pathian cun kanmah le tlin tawk te’i a hna kan tuan ding a duh. Tlin tawk ih hnatuan hi lei dan khalah kan nun nomnak pakhat a si ve. Hnatuan lo ih um huahhi ringring men hi mi pangai hrangah cun thil nuam a rak si lo lawlaw. Kan innsang khalah u le nau pawl hna an tuan rero lai ih rak um huahhi tu si hi a nuam lo duh nasa.Cu hnakin kan tuan thei mi kan tuan ve hin innsang ih tlan len khal a nuam ih kanmai nun hrimhrim nuam tertu a si. Pathian hnatuannak lam khalah telnak nei lo , um daithlang men kan si ahcun kan tlarau lam nun cu nomnak a um lo ding. Kan tlin tawk te ih Pathian hna kan tuan hi a tuantu kan mai nun lungawinak in thlen tu khal a si.

Kan Pathian khal in mi pakhat hi mi dang in tuan tluk in a tuan maw ti a zoh lo ih kan thei tawk te ih kan tuannak par ih lungawi tu Pathian a si. Jesuh leitlun ih a tlanlen laiah nuhmei nute ih thlawhhlawm thlakmi kha pia sen phahnih te si khal sehla Jeusuh in nuhmei nu kha a pe tam bik a ti. Kan pekmi tla hi midang pekmi thawn thim cun ti tham lo a si thei, asinan Pathian cunkan pekmi a punglam lawng a zoh lo ih a petu’i dinhmun zoh in in siar sak sawn. Mi fim, thiam zet tuan tha duh lo hnak in tlin tawk tei’ rinum tak ih tuan hi Bawipai’ hrangah a sunglawi sawn.

4.      Bawipa in Hman In Duh

Pathian hin a hnatuannak ah hin nang le kei tello khal in a tuan thei tuk. Kei in tuan lo khal sehla Pathian in a hnatuannak ah fate hman a bahlah phah cuang lo ding. Hman ding mi fim, mi tha an tam lutuk. Kan tello in a tuan thei nan kan mah hmangin tuan a tum sawn a si. Pathian hnatuan kan thei tawk ih tuan hi phur rit ti cingih tuan maw kan si lole lungawi te ih tuan ha kan si? Kan nunnak cio cek aw sal sehla. Pathian hna kan tuan hi Pathian hrangih tuan ti lawnghin kan ruah ding a si lo ih a tuantu pawl tlawsuah donnak lam zin sawn a si. Kanmah lo hman ding an tam teh thawi’ kan ni in hmang duh tla hi cu Pathian hnenah lungawi thu sim ding kan si sawn lo sawm?

Elisha nun ram in kan zoh a si len Pathian in Elisha hi tlangak hmang in a cawm thei lutuk ko nan tlangak hmangih cawm ringring a tum lo. Zerafath nuhmei nui’ neih sun sang hmangih cawm a duh. A va mak lawmmam ve, milian deuh tla an um ding nan si khawh. Ziangah tlangak hmangin cawm thei rori cu nuhmei nui’ neihsun cu hman a duh? Pampi sungih ei le in ding a neihnak ding sawn ah a si. Mi nei deuh tampi um na lakah Pathian in kan neihsunte hman a duh theu hi a mak kan ti maw? Tlawsuah tha sawn kan donnak ding sawn ah a rak si theu. Pathian hin kan neihsunte in dil theu ko nan neihmi nei lo, mualpho ih kan um ding phang sawntu cu Amah Pathian thotho a si.

            Zumtu pawl kan nunnak zoh sal sehla, Pathian hnatuannak ah kan tello tuk lawmmam maw? Kan thei tawkin tuan cio uh si, tuan caan tam kan nei nawnlo ding. Pathian hnatuannak ih kan pekawknak hi a lakmi pakhat hman a um lo. Pathian ram hrangih kan cemliam pawl hmuahhmuah kha hi van ah ro kan khawl a rak si. Leitlun ah ziang vek ro ka khawl ngah tihnakin Van ah ro khawlmi ka nei ve maw tihi a thupi sawn.

Na tuan lo khal le Pathian cu a hnatuannak ah a bahlah cuang lo ding. A sungtu cu nangmah thotho na si.