Phuba La Hlah Uh

Phuba La Hlah Uh ( Rom.12:17-21 )

Rom.12:19 Ka duhdawtmi pawl, ziangtik khalah phulak tum hlah uh; Pathian thinhengnak sawn in cumi cu tuahseh. Ziangah tile Ca Thianghlim sungah, “Keimah in phu ka la ding; Keimah in ka leh-rul ding, tiah Bawipa in a ti,” tiah a um.

            Minung harsatnak, buainak, siatnak a phunphun hi kan tong theu ih kan mai thil ti fuh lo le dik lo ruangih kan tuarmi hi cu a tuar zia tla thiam a awl deuh. Asinan kan mah kan dik na cing ih kan buainak, siatnak a thlen tikah cun phu lak duhnak thinlung hi kan nei theu.Kan diklo nak ih tuar cu thil awm ah kan ngai ih kan dik cingih kan tuarmi ah cun kan tuar maimai thei theu lo, kan parih a thleng tertu parah siatnak thawng thungrulh hi kan cak emem theu. Cun khawvel daan ah cun diklo zet ih in siatsuah tu pawl parih phulei sam hi thil sual emem khal ah kan ruat lo ih a awm ve ko kan ti mai theu

.

            Zumtu pawl hrangah cun khawvelmipawl bangih ti ve vivo mai thei kan si lo, kan Bible in ziang ti’n in sim “Ziangtik khalah phulak tum hlah uh..”  a ti. Phu la lo ringawt sehla cumi in thil tha a thlen cuang maw? hlawknak a um cuang maw? Phu lak lo pawl hnen ah ziangvek thil a cang theu timi hi kan vun zoh hrih ding.

1.      Joseph

            Joseph thuanthu cu kan theih theh cio mi a si ih a thu hla cu tam rel lo sehla. A suahsempi a u le pawl rori in miphung dang hnenah an zuar ih Izipt ramah sal dinhmun tiangin a ding ih thawnginn sung tiangin a thleng. Joseph hin a u le pawl parah ziang thilsual a tuahmi hi kan hmu lo, Anih hrangah cun a u le cu a par ih siatnak thlentu an si. Tikcu a hung rei ih Joseph cu Izipt ah hotu, dinhmun sang a si hnu ah a u le pawl cu a hnenah rawl lei dingin an ra thleng ih an nau Joseph cu an theithiam nawn lo. Hi tawk ah hin Joseph in phuba la duh sehla remcang tak a si. Joseph cun phuba laknak ding remcang a hawl lo ih tlunah remcang a um caan hman ah an parah phuba a la lo ih a lainat emem sawn a si. A pa Jacob a thih hnu ah Joseph in phula in la pang ding ti an phan hman kha Joseph thinlung a na, a ngaithiamnak an theihthiam lo ruangah. Joseph cun a ngaithiam men lawng hman si lo in himi thuhla an anmawh thluk awk ding khal a duh lo ih hi hmun in thleng tertu hi Pathian sawn a si tiin a nun a cawl hahdam sawn a si.

            Joseph nun ih kan hmuh theimi cu a u le parah phu a la lo lawng si lo in hi ramah mi nunnak run dingah hitawk ih i thlen ter tu ngaingai cu Pathian a si a ti. A u le pawl parah mawh a thum lo ih Pathian lam hruainak sawn a si a ti.Joseph in a u le pawl phuba a lak lo tikah cui cin in a u le pawl in Joseph parih thil thalo an tuah ti hmuh ding a um nawn lo. Rom.12:21 Ṭhat lonak in lo neh hlah seh; ṭhat lonak kha ṭhatnak in neh sawn aw. Timi hi Joseph nunnak ah a lang fiang nasa.

2.      Moses ( Mip.12:1-16 )

            Hazeroth ih an um laiah Miriam le Aaron in Moses cu mipi hnen ah a thangsiat ciamco. Moses cu kam khat te hman a sawn ve lo ih dai te’n a um. Pathian sawn in cuang thu pawl hmuahhmuah cu a rak theih sak theh. Pathian minung pawl cu kan parah ziang vek thangsiatnak, thu sia in puh caan ah hin kan kiangkap ah theihpi tu an umlo hman ah Pathian in ziang kim in rak theih sak theh, ziang tluk hnangam thlak a si.

            Moses cu dai te’n a um tikah Pathian sawn dai te’n a um men lo ih an pathiam in a ko khawm theh ih Moses an thangsiat thu ah Aaron le Miriam kha nasa takin a mawh thluk ih Moses hi ziang tluk in a tan ti a lang ter. Kan parih thangsiatnak a thlen tikah dai te’n kan um ciah hin Pathian sawn kan lamtang in a rung phuang aw sawn theu. Kan mah rori kan cangvai ciamco a si ahcun Pathian sawn kha dai te’n a rak um theu. Kan mah in phuba laknak thawn kan thungrul a si ahcun kan karlak ah rem awknak a um lo ih laicin awknak hman a siat theh thei. Pathian sawn a rung cangvaih a si len huatawknak a um lo ih remawknak thawn kan kom aw sal thei.

            Pathian in  thinhengnak thawn a fehsan tikah Miriam taksa parah pharnat a rung tla. Cu tikah an thangsiatmi Moses sawn cun direm men lo in a dam theinak dingah Pathian hnenah a dil sak riangri. . Rom.12:21 Ṭhat lonak in lo neh hlah seh; ṭhat lonak kha ṭhatnak in neh sawn aw timi hi Pathian minung pawl nunnak ah hmuh ding a um vivo a si.

3.      David

            David thuhla khal kan theih lar zetmi a si. Siangpahrang dingih Pathian in hriak a thih thluh hnuah Saul in a dodal, thah a tum, fei in a khawh, David hnenih pekding a fanu midang a neih ter tivek in siatnak a phunphun thawn David parah a cang vai. David in Saul hi thah duh sehla thahnak ding remcang a nei nasa. Asinan Sual parih phuba lak hi a tum lo lawlaw. A netnak ahcun a mah ih that tul lo ten ral kut sungah Saul cu a thi ih David cu Siangpahrang ah a hung cang. Bawipai’ ih a caan a kim a ti ahcun amah dodal cu pawl cu an hloral mai.

            David thuhla hi mi tampi ih rel a hlawh zet ih, cui a thuhla ah ziangbik ha rel hlah bik kan ti a si len Sual in a tuah siat zia le anih in a thungrulh lo thu hi rel hlawh bik a si. A tuar lai ah a har zet nan a thuantu ti mawi tu le ropi tertu sawn ah an cang a si.

            Zumtu, kan ni khal kan nunnak ahhin midang in dik lo zet in kan parah thuhla a phunphun an thleng ter theu ding. Cui caan ah ziang ti’n kan um. Kan parih dik lo zet ih siatnak thlen tertu pawl parah ziang vek in kan cang vai? An mah sawn hi silawm dik lo ti in an parah phuba kan la mai maw? Bible cun daite’n um dingah in duh a si. Kan ni kan dik si lawm ti tahratin an dikonak parah kan thurul vivo a si ahcun ngaidamnak timi hi ziangtik ah ah kan nunnak ah a rah hmuh ding a um ding? Phuba latu ding hi kan ni kan si lo Pathian sawn a si. Keimah in phuba ka la ding a ti hin kan nunnak in ciah sehla, dai te’n kan um ciah hin amah Pathian sawn a rung cangvai ding a si.

            A tlun ih mi pathum nunnak kan zoh tikah thungrul lo tu’n nunnnak ah thil tha sawn a thleng ringring. Kan thurul lo ruangah ziang so hlawknak a um kan ti men thei. Pathian in a thei ih Pathian cun thudik hi a tan ringring ruangah kan hmailam hrangah thil thasawn a thlen ter ding.

Rom.12:17-21

 ¹⁷Mi pakhat khat in nan parah ṭhat lonak an tuah tikah

an parah ṭhat lonak thawn leh-rul hlah uh. Zozo khalih a ṭha a mawi an timi kha

 tuah zuam uh.

 ¹⁸Mi hmuahhmuah thawn remte ih um ding kha

a cangthei tawkin zuam uh.

 ¹⁹Ka duhdawtmi pawl, ziangtik khalah phulak tum hlah uh;

Pathian thinhengnak sawn in cumi cu tuahseh. Ziangah tile Ca Thianghlim sungah

, “Keimah in phu ka la ding; Keimah in ka leh-rul ding,

 tiah Bawipa in a ti,” tiah a um.

 20Cule Ca Thianghlim in, “Na ral a riil a rawng a sile rawl pe aw;

 a ti a haal a sile tidai pe aw; cutiih na tuah a sile

a lu-thlungah meiling na ret a si ding,” a ti.

 21Ṭhat lonak in lo neh hlah seh; ṭhat lonak kha ṭhatnak in neh sawn aw.