Pathian ih thusuhnak ( Bawipa hrangah a harmi a um maw si? )

Pathian ih thusuhnak ( Bawipa hrangah a harmi a um maw si? )

Sem.18: ¹³Cule Bawipa in Abraham hnenah, “Ziangah Sarah cu hni phah in, ‘Ka tar zo hnuah hin fa ka nei thei ngaingai pei maw?’ a ti. ¹⁴ Bawipa hrangah a harmi a um maw si? Hmaikum a tikcu a kim tikah ka ra sal ding ih Sarah in fapa a nei tengteng ding,” ti ah a ti.

            A tlun ih Bible cang kan tarlanmi hi mikual pathum in Abraham hnenih an tongmi a si. Hi mikhual pathum hi leilam mikhual an si lo ih van lam mikhual sawn an si.Cun hmun dangdang khalah Pathian hrangah a cangtheilo mi a um lo zia thu kan hmuhtheimi pawl tla kan zoh khawm ding.Cun hi thupi hi Bible sungih an thuhla lam rel tam lo in a tu ih kan mai nunram hrang sawnah hi thusuhnak thawn thazang kan la tlang ding.

1.      Abraham Nun ah ( Sem.18: 13,14 )

                                

            Abraham hi Pathian in tefa pek a tiammi a si ih lei dan ih zohnak ahcun a nupi Sarah le nu cing a si fawn, a kum le 90 lai a si thlang fawn tikah anmah nupa hman in fate kan nei ding ti hi an ruat ban lo, thil cang thei in an thei lo. Curuangah sal nu Hagar thawn an ih tlannak khal a si. Van lam mikhual pathum in fa an neih ding thu an sim sal tik khalah Sarah cun a rak hnih san a si kha. Cumi thu thawn pehpar aw ciah in si vanmi pawl in Abraham hnenah “ Bawipa hrangah a harmi a um maw si?” ti thusuhnak tongkam an tong suak. Vanmi in an sim vek cekci in a hnakum ah Sarah cun fapa te a run hring.

            Zumtu kan ni khal in harsatnak,hlawhsamnak kan nei/tong cio ding.Abraham tei’ nupa in harnak an tonmi cu fa neih thei lo hi a si. Abraham in fa a neih thei lo hi nupi a neih lo ruangah a si lo,Nupi, pasal nei lo mi cu fa a nei thei lo ti vek kan ti dah lo. Nupi,pasal nei cing ih nei thei lo pawl kha si fa nei thei lo ti ih kan ti. Kan tuah lo, kan tuan lo,kan ti lo,kan cang vai lo si cuang lo in harnak/hlawhsamnak kan ton theu. Tuan cing, tuah cing, cangvai cing te’n kan hlawhsam tikah beidonnak in in nuai mai theu. Hi caan ah khawlvelmi pawl cu mah le mah siatsuah aw tiang khal an um. Abraham nun kan tarlanmi ihsin kan zir ding ummi cu minung ruahsannak a um nawnlo hnu khal ah Pathian cun a tithei tihi a si. Abraham tei' nu pa khalin fa an neih ding hi an zum ban nawn lo hnu-ah Pathian in fapa te a pek. Kan ni khal leilam zoh ahcun ti ngaihnak ding a um nawn lo kan ti caan a um theu ding. Zumtu unau hi caan ah khawlvelmi bangin beidong mai ding kan si lo.Pathian hrangah a harsa mi a um lo.

2.      Mary Nun ah ( Luk.1:37 )

            Fala him Mary hnenah van lam aw a rung thang “ Fa na vun dingih Fapa na hring ding” ti in. Cui thu a theih tikah Mary ih thusuhnak cu “ Ziang ti’n a cang thei ding, kei cu fala him ka si? ( mipa thawn kan pawl aw lo?" tiah a ti. Mary ih thusuhmi hi suh ding awm a si. Pasal/ mipa tello cun fa neih theih a si lo. Asinan vancungmi cun “Pathian ih tuah thei lo mi zianghman a um lo” ti ah a let. Vancungmi sim vek ngaingai in mipa ci tel riai lo in fapa ( Jesuh ) a hring taktak.

            A cang thei lo timi hi minung hrang lawng ah a um thei, Pathian hrangah cun a cang thei lo pakhatte hman a um lo, tuah thei lo mi khal a nei lo. Zumtu hrangah ziangtluk  hnangam thlak a si. Pathian lungkimnak/duhnak a um phot ah cun thil ziangkim hi a cangthei theh. Kan biakmi kan Pathian hi a sinak theih feng deuhdeuh hin hna a ngam deuhdeuh. Tu ah na nunnak ah ziang thil harsa a thleng? Ziang ti'n a cang thei ding? tihi na thusuhnak a si mai thei. Thulehnak cu Pathian ih tuah thei lomi zianghman a um lo tihi a si. Mizan ih thawngtla pa khal uktu bawi ih cang ter thei, Mizan ih ei ding nei lopawl ei cawk lo rawl pe thei, nelrawn, zianghman um lonak khalih kum 40 sung rori Israel pawl cawm thei, Mizan ih mithi khal nung ter theitu kan Pathian a si.

3.      Judah Mi Hotu Milian Pakhat ( Luk.18:27 )

            Judah mi hotu pakhat in Jesui’ hnenah “ Kumkhaw nunnak co dingah ziang ka tuah ding?” timi thusuhnak thawn pehpar in Jesuh thawn an biakawknak pawl kan hmu thei. A nelam  ih Jesui’ thurelmi cu “²⁴Jesuh in a riahsiat kha a hmuh tikah hiti in a sim: “Milian hrangah cun Pathian Uknak sungih luh cu ziangtluk in so a har! ²⁵Milian pakhat Pathian Uknak sungih luh hnakin kalauk pakhat ṭhim hnakua sungih luh khi a ol sawn a si,” tiah a ti. ²⁶Cumi cu mipi in an theih tikah, “Cuti a sile zoso runmi a a si thei ding?” tiah an sut. ²⁷Jesuh in, “Minung hrangih a cang thei lo timi hi Pathian hrangah cun a cang thei a si,” tiah a ti.
 
            Bible sung kan zoh tikah minung ih cang theilo ih kan ruahmi Pathian ruangih a cangmi khi tampi a um ti cu pheh ding a um lo.Curuangah kan thupi Bawipa hrangah a harmi a um maw si? timi thawn a thar in thazang kan laksal dingah ka duh. Tu-ah ziangvek harsatnak na nei? Ziangvek buainak na nei? Na parah ziang vek thil a thleng? Ti ngaihnak a um lo ee timi na nei maw? Kan Pathian hnak ih tumsawn zianghman an um lo. Na harnaknak hnakin Pathian a tum sawn ruangah a nih cun a ti thei. Sarah bangin a theicang thei ngai kei maw? kan ti caan ah Bawipa hrangah a harmi a um maw si? timi thu in thazang lo pe cio hramseh.