Pathian Ih Thusuhnak ( Khui ah So Na Um? )

   

       Khui ah So Na Um ?

 

Pathian in minung pawl hnenih a thusuhnak pawl hi hmuh ding a um hnuaihni ih cumi lak ihsin a then kan la ding.Pathian hi ziangkim theitu  asinan minung pawl thu a sut theu.A theih lo ruangah a sut si lo in suh tul dinhmun ih an um ruang sawnah a sut theu sawn a si. Thu a suhmi pawl a suhnak san vekin kan ngan kher lo dingih a thusuhnak tongkam  kha kan nun cek awknak ah le thazang laktlannak ah kan hmang sawn ding.

            Khui ah so na um ti cu umnak hmun suhnak a si ih Bible ah hin umnak hmun suhnak a um ih cumi lak ihsin  mi pathum hnenih umnak hmun a suhmi pawl kan zoh tlang ding. Hi thusuhnak pathum kan zoh dingmi hi a pathum in cang 9 nak ah an um theh. ( Sem.3:9; 4:9; 18:9 )  

1.      Khui lamah so na um? Sem. 3:9

            Hi thu hi minung hmaisabik Adam hnenih a suhmi, thusuhnak hmaisabik a si.Ziangruangah a sut kan ti a si le ei lo ding timi an ei ih an um dan kha a kel a si nawn lo ruangah a si.Pathian in Adam hi Eden hmuan sungah a hmu lo lam a si lo.Pathian in hmuh lo pakhat te hman a nei lo,a hnen ihsin relh theih khal a si lo.Adam kha a um dan kel, a umnak kel ih a um nawn lo ruangah a suhnak a si. Hmuan laifang ih um theirah an ei hlan-ah Pathian ih a ret vekin um dan ding pangai te’n an um.Asinan theirah an ei ve ten an mit a vang ih Pathian ton ding kha an ngam nawn lo tikah Pathian rat thawm an theih veten an relh a si.Pathian thu ah um nawn lo in Pathian thu lengih an um ve ten Pathian thawn nel aw zetih rak um theu kha hmu ngam nawn lo in an relh san  a si.

            Zumtu kan ni khal kan nunnak cek aw sal sehla kan umnak ding hmun ( Pathian thu ) ah kan um maw? Tu ah Pathian hmaika ah kan nun daan hi pho lan ding siseh la puhrun awknak kan nei pei maw? Tha famkim kan um lo ti cu Pathian in a thei, cu mi tlun ah kan umnak ding si lo ih kan um lawng ah te Pathian a lungawi lo thei a si. 2 Cor. 13:5 Zumnak sungah kan um maw um lo ti theih fiangnakah nanmah le nanmah cek aw uh.

            Cun nitin kan tlanlennak khal ah kan umnak hmun hi a thupi nasa.Khawvelmi pawl ih umkhawmnak hmun vekih kan um tamtuk a si ahcun kan tuahlo mi parah hminsiat a awl te. Kanmah hi zuk le hmawm tham lo,zu in lo, nunau lam mitmei lo kan va si hman ah zu dawr ah kan to phot a si ahcun zu in ah mi in in neih thei. Pathian in ka in lo a thei kan ti hmanah mi relsiatnak tal cu kan tuar tikah kan thin a na thotho. Zumtu cun colh hahdam phah in lakphak, a dai, pa khatkhat  kan in ding a si hman-ah kan innak ding dawr hi hril thiam a tul. Zu in pawl khal a um ruri nak ih kan colh a si ahcun zu in ah ruah kan si thei. Zu in ih in ruattu pawl kan soisel men thei nan kan mai umnak hmun fuh lo sawna si. Khual kan tlawn caan ih dawr  dang pan ding um lo ti vek cu thu hran a si.

      Cun kan umnak hmun a fuh lo ruangah kan tuah tum lo mi khal tuah a awl. Zumtu nauhak kan si le phei ah tla cun kan kiangkap ummi pawl ih thil tuah mi hi tuah ve mai a awl te. Curuangah leitlun kan um sungah cun thil thalo cu um lo dingin kan kham thei lo ding, kan mah sawn kha thil thalo lakih um lo dingah kan umnak ding hmun kan ralrin thei tawk in kan ralrin a tul. Khui ah ka um tambik timi hi kan nunnak ah cek aw theu sehla. Zumtu ka si ti aw fawn si Pathian biak khawmnak,thlacamnak, zumtupi lakih tel dah fawn si lo kan si ahcun ruah ding a um nasa ding.

2.      Na Nau Abel khui-ah so a si? Sem.4:9

            Hi thusuhnak hi Pathian in Kain a suhmi a si.A suhnak san cu Kain in a nau Abel a that ti a theih ruangih sut a si. Tuitum ah Pathian hnenih thawinak an pek lam thuhla kan rel lo ding. Kan rel dingmi sawn cu Abel hrangah Kain hi ziang a si? Tuah tha-tu maw siatsuahtu sawn? Unau an si ih Pathian hnenah thawinak an hlan veve tikah Pathian cun Abel ih thawinak a co hlang ih Kain cun halhsiknak thinlung nei in a nau Abel cu hmun dangah hruai in a thah. Curuangah Kain cu a nau hrangah cun siatnak hmun ih thlentu a si. Cui thu cu Pathian in a thei theh ko nan Kain parih lairel a duh ruangah “ Na nau Abel khui-ah so a si?” ti ih a suhnak san a si.

            Zumtu kan nunnak vun cek aw sal sehla, kan ni teh Pathian in “ Na u/nau khui ah so a si?” in ti bang sehla ziang kan bang pei. Kan suahsempi kan unau hrangah ziang kan si. An nun siattertu maw tuahthatu so kan si ding? Mi thenkhat cu kan mai nun dik lo ruangah kan unau hi sual lamah an nun hruai lut ih siattertu tla kan si men thei. Kan u kan nau hi tu ah khui ah an um timi kan mah in teh kan cek dah maw? Pathian thu ah maw leitlun sual nomnak ah ha an um? Kain cu Pathian in thu a suh tikah “ Ka nau kilkhawitu-ah zo in i tuah” tiah a let. Hi thinlung hi zumtui’ thinlung ding a si lo nasa. Ka unau pawl cu an mah te’n an umumin um ko hai seh ti thin lung kan neih a si ahcun a poi zet ding. Hmun dang ramthim kan vei hnak in kan mai unau hi Pathian thu ah kan um kim maw tihi kan vei hmaisat ding a si sawn. Zumtu kan si ahcun kan unau kilkhawi hi kan tuanvo a si, an hrang thlacam, Pathian thu lam ih thei tawp suah ih hruaitu ding kan si. Kan u kan nau hremhmun meipi ih an tlak ding cu kan ngaingam ding maw? Pathian thu ih an um theinak dingah zumtu nang le kei tuanvo a si. Tu ah kan unau khui ah an um?

3.      Na nupi Sarah khui-ah a um? Sem.18:9

            Hi thusuhnak cu Abraham hnenih runglang mikhual pathum pawlih suhmi a si. Kan theih dingah hi mikhual pathum hi lei minung an si lo. Abraham cun an hrangah ei in ding a timlam sak ih an in an ei theh hnu ih an suhmi a si.Sem.18 nak kan vun siar vivo a si len Sarah nau a pai ding thu an tiamnak kan hmu thei. Cu mi thutiam dingah an ra ih “ Na nupi Sarah khui-ah a um?” ti in an suhnak a si.

            Hi thusuhnak hi kanmah ah vun suh aw sehla,kan nupi, kan pasal khui ah an um? Kan nupi, pasal hi lei par lawng ah um tlang ih vanram ih um tlang ngah lo kan si pang ding hi a phan um nasa. Curuangah kan nupi, pasal hi lei par lawngah si lo in vanram khal ih um tlangmi kan si theinak dingah Pathian thu ah kan um tlang maw ti hi sut aw sehla. Kan koppi hi Pathian thu ah an um hrih lo a si ahcun thinnuam ih um thei  kan si hrih lo. Leitlun kan dam sung um tlang,a nuam a har kan tuar tlanpi mi kan koppi rori hi vanram ah kan kopkim nawn lo ding hicu zo khalin kan ngaingam cio lo ding. Thihhnu ah Pathian thu ih duhsak awk man a um nawn lo. Curuangah kan nunsung rori ah kan koppi thawn Pathian thu hi nun felfai kan neih ding hi a thupi bik ah kan ret a tul. Tu-ah na nupi/pasal hi khui ah a um? Van ah kan um tlang ding kan ti ngam pei maw? Kan mah le nun koppi cio kan cek sal kei uh.

            Thu netnak ah hi Pathian ih thusuhnak pathum ka tarlan duhnak san cu kan mah le kan innsang cio kan cek awknak dingah a si. A hmaisa bik ah kan mah rori kha Pathian thu ih kan um a tul, cu theh in kan innsang, Kan nupi/pasal, kan fanau pawl Pathian thu ih kan kaih hruai ding hi kan tuanvo a si. Kain bangin a kilkhawitu ka si lo ti thinlung kan neih pangah cun a poi ti bak lo rel ding a um nawn lo. Nan innsang kim te’n vanramnuam thlengtu nan si theinak dingah Pathian in lo thlawsuah hram seh.