Samaria Mitha

SAMARIA MITHA ( Luk.10:25-37 )

            Samaria Mitha thu Jesuh in a simmi  hi kan thei theh ding.Ziang ruangah Jesuh in hi thu hi kan sim daanthiam saya pakhat ih thusuhnak ruangih a simmi a si.Daanthiam saya pakhat in Jesuh kha a sual hawl duh ah thu a sut ih Jesuh in a let hnu ah a mah le mah thiamco terawk duh ah zoso ka innhnen tu tiin thu a sut lala.Cuticun Jesuh in hi Samaria mithathu hi a simmi a si.

1.      Thusuhnak

           

            Daanthiam saya cun Jesuh hnenah kumkhua nunnak ka ngah theinak dingah ziangso ka tuah ding?” tiah a sut.A thusuhmi hi thutha zet a si.Hi vek thu hi Jesuh in hmun dang
khalah a tong theu.Thusuhnah ding awmzet khal a si lo.A thusuhmi cu tha zet khal sehla a suhnak san cu a tha lo.Amah in kumkhawnun neih a cak ngaingai ruangih sut silo in a sual hawl duhih sut a si.Mi thu kan suh tikah thieh duh ngaingai in kan sut maw mi tibuai duh men ah kan sut timi hi a thupi nasa.Misual hawlduh le buaiter duh ruangih thusuhnak hin hawknakmi a pek tuk lemlo.

            Jesuh cun Ca Thianghlim in ziangtinso a ti? A timi cu na pomdaan ziangtinso a si?”ti in thu a suh let tikah cupa cun Bawipa na Pathian cu na thinlung hmuahhmuah, na nunnak hmuahhmuah, na cahnak hmuahhmuah le na ruahnak hmuahhmuah thawn na duhdaw pei ih na innhnen cu nangmah na duh awk vekin na duh hai ve pei, a ti, tin a let tikah Jesuh in na sim dik cu vekin tuah aw a ti hnu ah daanthiam pa cun zoso ka inn hnencu tin a sut lala.Cutin Jesuh cun hi Samaria mitha thu a sim thlang

2.      Jerusalem le Jerikho

            Mi pakhat cu Jerusalem ihsin Jerikho ah a vung feh.Jerusalem le Jerikho,khua pahnih kan  hmu thei.Jerusalem cu daihnak khawpi ti a si ih vanram lole Eden hmuan hmuan a hmuhsak,Tipi ihsin pi 2500 laiin a sang. Jericho cu camsiatmi khawpi a si ( Joshua 6:26 ) ih camsiattuar lei hi a sim duh ih tipi ihsin pi 800 ih niam ah a um.Jerusalem leh Jerikho karlak hi peng 16 tluk a hla ih hi khaw pahnih karah mi tihnungum tak a si.Misual.suamhmang an um ih lungpuk lungkua a tam tikah misual pawl hrang relhnak a remcang zet.Jerikho khua hi puithiam pawl ih an hmun poimawt zet a si.

            Jesuh in hithu a simnak tikah hi khua mihnih a langmi hin Van le lei thu a tar lang nasa.Jesuh in hithu a simnak santak cu zoso ka inn hnen cu a si,timi fiangter dingah a si.Cuithu a fiang theinak dingah a thusimmi sungah ah hi khua pahnih a telh ve.

3.      Mi pakhat khual tlawng

                        Hi tihnung zetmi lamzin ah ah mi pakhat Jerikho lam panin khua a tlawng ih misual,suamhmang pawl ih thawi a tong ngaingai ih thizik ih an thawi hnu ah an tlansan.Cu pa cu a mahten a tho thei nawn si lo bawmtu ding a tul nasa.Pathian kutsuak minung khal Satan pai siatsuahnak tuarin kan um ih kanmah ten runsuak aw thei lo dinhmun ah kan ding tikah kan tulbikmi cu runtu a si.Kan ral Satan cun ziang tik hmanah kan thatnak a tuah dah lo ih kan siatnak ah in tan theu sawn a si.Thizik te in timi hi mirang ahcun half dead ( hrekkhat thi ) ti a hman tik ah Bible thiam thenkhat cun taksa cun kan nung nan thlarau lam ahcun mithi kan si tiin an simfiang.

4.      Puithiam le Levi mi

                        Puithiam le Levi mi pawl hi Moses daan ngaina zet mi an si ih puithiam pawl in biakinn ah thawinak pe ih Levi mi pawl hi a bawmtu an si.Suamhmang pawl ih an thawimi pa hi an pahnih in an hmu veve nan bawm lo in an tlan san.Moses daan vekin mithi ruak kiangih feh in mi thianghlim lo ih can ding an phang tla a si thei.Asinan Jesuh leitlun a lenlai ih kan hmuh theimi cu mi an luatnak,an damnak ding a si ah cun sabath ni a serh lo.Damlo, runtul an um ahcun cumi runsuah kha thupi sawn ah a ret.Hi levi mi leh puithiam hi Biakinn ah buaizet in Pathian hrang tuan rero tu an sin an thil pakhat cu an hrelh riai,cucu bom tul mi an bawm ngah lo hi a si.Biakinn ah Pathian thangthat rero in le Biakinn ah Pathian rian rero si in Biakinn leng lam ih bom tul bawm ngah lo tu kan si ding a phan um zet.

                        Hiti zawngin vun zoh sal sehla,kan kiang naite ah sual ih a tawntemmi pawl hi kan ngaihthah pang ding a phan um.Kan kiangkap ih runsuah tulmi pawl hi ziang ih rel lo ih um ding kan si lo ih hi Samaria mitha bang in kan hmaiih run tul pawl runsuaktu ding kan si.

5.      Samaria Mitha

                        Samaria mitha cu cui lamzin ah khual a tlawng ve ih suamhmang pawl thawimi a hmuh tikah a zangfah zetih a hma pawl cu hrilk leh sabit ti a hnihsak ih a tuamhlawm,khualbuk ah fehpi in tuamhlawmnak hrang a tulmi pawl tla a pek ih a fehsan ding tikah ah khualbuk kiltu hnenah ngun tangka fanghnih a pek ih a daihlo mi pawl khal a ra kir sal tikih ruul sal ding in a tiam ta.

                        Samaria mitha cun Jesuh a hmuhsak,Johan 8:48 khal ah Jesuh khal Samaria mi an ti thu kan hmu thei.Jesuh cun sual ih temtawnmi pawl hi in fehsan men lo ih kan luatnak dingah a thisen thawn in rundam,a sualpawl a tlengfai lawng si lo in nitin kan nun thiangfai sinsin dingah thlarau thianghlim in pe a si.Suanhmang ih thawimi pa cu khualbuk ah fehpi in tuamhlawm a si bangtuk in kawhhran hi in tuamhlawmtu ding a si.Sual ruangih a ril a bah mi pawl tuamhlawm le damnak an co sinsin theinak dingah kawhhran in tuanvo tumpi kan nei a si.Pathian hnatuantu pawl in hihi kan daithlan ding a si lo.Kan Bawipa Jesuh a ratsal hlan tiang cucu kan tuan dingmi a si.

6.      Zo si na innhnen?

                        Himi pathum lakah khualtlawngpai innhnen cu zo bik a si ti Jesuh in a suh sal tikah daanthiam pa cun a mah a zangfahtu pa tiin a sang.Samaria mitha in a simduhmi Jesuh hi kan innhnen a si ih Jesui’ nun neitu pawl khal huam in zumtu cun kan innhnen parah hi bang tukin tuah ding kan si ti in zirh duh.a innhnen zo a si ti a theih hnu ah cu bangtuk in va tuah ve aw tiah Jesuh in a cah ta.A umzia cu kan innhnen hi zo a si ti kan theih lawngah duh tawk lo in Samaria mitha pa in a tuah bang tuk ih tuah ve ding ah in forh ta s si.Bom tul hmuahhmuah kan bom thei thluh lo ding nan kan bom thei tawk bawmtu ding kan si.