BAWIPAI’ THATNAK/THLAWSUAH SIAR AW

BAWIPAI’ THATNAK/THLAWSUAH SIAR AW

Maw ka nunnak, Bawipa cu thangṭhat awla, A ṭhatnak hmuahhmuah hngilh hlah aw.

( Saam 103: 2)

            Bawipai’ thatnak le a tlawsuah hi mi zo cio khal in kan co,mi lian,mi farah,mi tum, mi te,mi fim,mi aa,mi sang le mi niam khal in kan co theih.Kan parih Bawipai’ thatnak le a thlawsuah hi siar cawk ding rual a si lo ih a zate’n sim zik sehla kan sim cawk lo ding.zumtu kan nunnak ah hin a caan caan ahcun Bawipai’

thatnak siar hi kan hngilh theu ih thil ziangkim kan donmi le kan comi pawl hi thil sidan pangai maimai ah kan ruat theu.
Bawipai’ thatnak hi kan siar lo theu tikah thlawsuah kan don le don lo hman kan thei aw theu lo.Saam hla ngantu cun a thatnak hmuahhmuah hngilh hlah aw in ti a si.Bawipai thlawsuah/thatnak kan co mi liangluang lak ihsin a then a zar te tarlang sehla.

1.      Nangmai’ comi siar aw.

            Saam.116:12 Ka parih a ṭhat ruangah hin Bawipa cu ziangso ka pek ve ding? Saam hla ngantu cun midang parih Bawipai’ thatnak silo in amai’ parih Bawipai’ thatnak hi a siar ti hi cu a fiang nasa.a caan caan ah cun zumtu pawl hin kan parih Pathian thatnak kan comi siar lo in kan dinhmun le midang dinhmun kan khaikhin tikah beidonnak le rualdawtnak inkan nun a luah ih mi vansia ih theihawknak tiang in kan nei.Kan hnakih a neinungmi pawl le a thangsomi pawl thawn kan khaikhin awk sungah cun lungawi hi a har zet ding.Bawipai’ thatnak cu midang comi le kan comi parah silo in kan mah in kan comi parah siarthiam sehla Bawipai’ thatnak hi siar cawk lo ih kan co zia kan hmu thei ding.Pathian in mi pakhat cio in hruai dan hi a bang aw lo tikah midang umdan hi kan thumawknak ding a lo ih kan mah bulpak nun in hruai dan ah Bawipai’ thatnak hi siar ding kan si.

2.      Mi pakhat na sinak ah Bawipai’ thatnak siar aw

            Minung hi Bawipai’ semsuahmi kan si ih nu le pa kan umtlannak ihsin sem maimai kan lo si.Curuangah tuisun ah mi pakhat ih kan sem ve hi kan mah ten ra sem kan silo ih Bawipai’ sem termi kan si tikah mi pakhat kan si ve hrimhrim hi Bawipa thatnak a si zo. Saam 139:15 Seemsuah dingah ka ruangrai na zing ih, Ka nu ih pum sungah ka thi le ka sa na pehcih laiah, …..Tu ih kan dinhmun le kan umdan ah mi vek in kan lian lo,kan nuam tla tla a si thei ih cucu a thupi bik lo mi pakhat ih kan piang ve hrimhrim hi Bawipai’ hnenah lungawi thu sim ding kan si.

3.      Tu ih na dinhmun ah Bawipai’ thatnak siar aw

            Minung kan dinhmun a bang awk theih lo ruangah tu ih keimai dinhmun ih Bawipai’ thatnak  ka lo hlawm ding.Ka nauhak lai le tu ka dinhmun ah :

·         Thuamhnawk hi pa hnihkhat te lawng ka nei.Belh cop ten kum pi liam ko ka hruh.

Tu ah cun Pathian zarah thuamhnaw thleng dingah buai ding um lo ten hruh ding I ka nei.

·         Vainim le fang hi kan rawl,tu vek in rawlhmeh tivek a um lemlo.Antam kan suan le a ha hi rawl hmen a si cih mai.

Tu ah cun kan ei ban tawk ei ding ti le rawl cabuai parah phun dangdang kan hung ve thei.

·         Tlawng ka kai tikah ka hmanmi ca lung le ca fung cu,lungphneng le lung zumte a si.

Tu ah cun pen thatha.hman nuam ti zawng ka hmang thei.

·         Video zohnak nei lo ah mi phar ong,zial ong ten ka rak bih ve theu.

Tu ah cun duh caancaan ih zoh ding ka hmaiah a um.

·         Ka hmai ceimawinak ah lungmuat ka tat ih tanakha ai ah ka rak hnih.

Tu ah cun hmai hnih khal mai ngaihzawng,duh zawng ka hmang thei,hmaiphiahnak le sahbuan phunphun ka hmang ve.

            Rel vivo ding a tam nan kha hmuah si hrih sehla,Mi tampi cu hi vek kan si ve ko ding ti’n ka ruat.Curuangah hlan deuh ih kan dinhmun le tu ih kan dinhmun ah hin Pathian thatnak/thlawsuah siar ding kan nei tam nasa.Tu ih dinhmun nuamzet ih kan um hi leitlun thansohnak in a fehpi mi hrimhrim a si si ti’n kan ruat men thei.A si lo,tu khalah mi tampi ei ding neilo,sin ding nei lo an um lai.Leitlun thansohnak mil ten kan rak feh vivo thei hi Bawipai’ thatnak/thlawsuah kan donmi sawn a si.

4.      Na tonmi parah Bawipai’ thatnak siar aw

            Tu ah harhdam le tirawl ei in thei ih kan um a si ahcun Pathian hnenah lungawi thu sim ding kan si.Damnak in petu le ei in thei ih in tuahtu hi Pathian a si.Kan hmai ih hunmi ti le rawl thaw tak ih kan ei thei hi a  sunglawi tuk lawm mam.Thli thiang te kan hip vervo thei hi man khung ngaingai a si.Kan duhzetmi thuamhnaw mawite Kan hruh thei tla hi Bawipai thatnak a si.Dam lo besiat a thlen cun thuamhnawi mawi kan hru paih cuanglo.

            Tu ah damlonak nei, leiba nei, Accident tong, hlawhtling lo tla kan si men thei.Hi dinhmun khal ah Bawipai’ thatnak siar ding a um thotho.A caancaan ahcun Bawipa in a thatnak siar ding ropi tak kan neih theinak dingah vanduainak, siatnak, sunnak in ton ter caan khal a um ve a si.

Isai.30:20 Bawipa cun harnak le tuarnak sungah a lo thlenter hai ding, a sinan nan tuarnak hmunah cun a um ve dingih a lo zirhtu a si ding; cuticun amah nan hawl rero a ṭul lo ding.

Johan 9:3 Jesuh in, “A mit a cawtnak hi amah ih sualnak ruangah a si lo, a nu le a pa ih sualnak ruang khalah a si lo. Pathian thil ti theinak hi hi pa damternak ihsin a langnak ding ah a si.

            Tu ah natnak phun ziangzat kan nei? Kum 2005 ih WHO pawl ih tarlan vek a si len natnak hi leitlun ah phun 30,000 lai a um ti a si. (http://answers.google.com/answers/threadview?id=492472) Natnak hi a hmin kan theih zat hman kan tuar hrih lo.Cu khal cu Bawipai’ thatnak a si.Van duainak hi tutiang ah hin voi ziangzat kan tong dah?Kan  ni cun kan vanduai lo liangluang hnak ai in voi hnih khat vanduai kan ton mi parah Pathian vuihram kan hmang theu.A tu ah harsatnak kan tuar kan ti hmanah Bawipa in ziang simaw theihter in duh,hmun ter in duh ruang khal ah a si theu.Curuangah tu ih kan tonmi harnak ah hin Pathian vuihram hngal mai ding kan si lo ih Bawipa’n kan hrang duhsan a neihmi sawn theih tum sawn ding kan si.

          Kum 1870, Feb. 6 ah George Mueller ih nupi a thi ih a thlahnak sermon ah Saam 119: 68 " Nang cu na tha, thiltha na tuah " timi thu hi a hril. Hiti'n a sim:

1. Bawipa cu a tha. thiltha khal a tuah, asan cu nupi in pe.
2. Bawipa cu a tha, thlitha khal a tuah, a san cu kum reipi ka nupi thawn in um tlang ter.
3. Bawipa cu a tha, thiltha khal a tuah, a san cu ka hnen ihsin a la leh sal. 

Thu Netnak

            Zumtu u le nau pawl Bible ah hin Hngilh hlah aw a timi tampi lakah hin kan par ih a thatnak hngilh lo ding hi a tel ve a si.Mi dang parih thatnak malte kan tuahmi hman an hngilh men ah cun kan thin a na a si lo sawm?Bawipai’ thatnak hi tluk tam kan donmi hi hngilh men dingah in siang lo.Bawipai’ thatnak/ thlawsuah siar thiam uh si u le nau pawl tla lungawinak in na khat ding.

Thazang i pe zettu tongkam pawl :

1.      Bawipa hi a that tuk aw kan fapa upa bik hi sizung ah sumpai tampi cemliam tul lo ten in lak sak. 

      By. Rev. Hlawn Nei Sawn

2.      Maw Bawipa leiba nei thei dingih i tuah ruangah lungawi thu ka lo sim.

By. Upa Sen Ro Sum ( Mi in an dawr ta a bak ih thil lak in siang lo sehla kan har zet ding  )

3.      Vanduainak hi mai thuthu ih ton a theih lo hokhaw,kum khat ah voikhat hman kan ton lo caan a tam. 

      By Evan. Tum Thelh Thang