ZO SO A TUM BIK? Matt.18:1-5

1.      Tumbik Si Duhnak

            Dungthluntu pawl hin Jesuh hi voi tampi thu an sut ko nan hi tum ih an thusuhmi hi cu danglamnak te a nei.Jesuh thu an suh tikah a thusimmi,a thuzirhmi,tahthimthu a simmi pawl an theihthiam lo mipawl hi an sut tlangpi.Vancung Uknak ah ZO SO A TUM BIK? timi thu an suh lawngte an thuzirhmi pawl thawn a pehpar aw lo zet.
Hi thusuhnak hi Vancung Uknak ah zo si tumbik timi an theih duh rualrual in an thinlung ih an beisei mi cu an mah dungthluntu hleihnih sung ihsin a tumbik si ding kha an beiseimi/cuhawkmi a si.Cumi cu Marka sung ah a fiangzet.Marka 9:33,34 Kapernaum khua an thleng ih inn sungih an luh hnuah Jesuh in a dungthluntu pawl cu, “Lamzin ah ziangthu so nan el awk rero kha?” tiah a sut. A thu suhmi cu zohman in an let lo, ziangah tile lamzinih an el awkmi cu anmah lakah zoso a tum bik ti a si.Tu ih Jesuh dung an thlun laiah hin a tumbik hi zo a si ti hliah aw sehla cu midang hnakin an duh aw dingih midang dungthluntu pawl hnakih sang deuh ih tla an ruat aw thei.Jesuh in ziangtin a let?

2.      Fate Bik A Hmuh

            Jesuh in nauhakte pakhat a ko ih an hmaiah a dinter.Hi nauhakte timi hi ( Gk.Paidion) kum nga hnuailam a si a zum um.

·         An nih in a tumbik an hawl

·         Jesuh in a nautabik, a tatebik,dinhmun niambik an hmaiah a dinter.

Ziangah a si ti le Jesuh cun an thinlung ummi kha fiangten a thei.Tumbik,sibik,sangbik si an cuh aw ti a thei.Hi mizia cu Van ih Lucifer mizia ciah a si.Cun Amah Jesuh khal a sannak van ihsin a niamnak lei ah a rungtum,A ropitnak tan in dinhmun niam ten a ra.Pathian thu cun mi a thleng danglam tikah a niam in a sang lamah silo in a sanglam in a niam lam ah mi a thleng theu.Kei mah ka si bik ti lam si lo in keicu zianghmanlo ka si ti lam sawn an mi nun a thleng theu.Paul khal Jesuh thawn an tonawk hnu ahcun Dungthluntu lakah a fate bik ka si,misual lakah misual bik ka si a ti a si kha.

            Kan nunnak khalah Keimah ka sibik,thiambik,tumbik…timi in in luah lai a si ahcun Pathian thu ah thleng danglam in kan um lo a si pei maw ti ruah awk a tul nasa.Kan mah sunglawi lo in Bawipa a sunglawi vivo theinak ding ahcun kanmah kan fatet vivo a tul.

3.      VanCung Uknak ah Zo A Lut Ding?

            Dungthluntu pawl in Jesuh thu an suhmi cu Vancung Uknak ah zo a tum bik? Ti a si nan Jesuh in a let hmaisa mi cu zo a lut ding ti in a sawn hmai sa.Matt.18:3 Fiangtein ka lo sim: nan thinlung nan thleng ih hi nauhakte bangtuk nan si lo ahcun vancung Uknak sungah nan lut dah lo ding.

            Jesuh cun thlengdanglamnak thu a rel.Tu ih an thinlung hi a theih keukeu ruangah hitin kan feh cun a ngah lo ti a thei.Curuangah thlengawknak a um ta lo ah cun Vancung Uknak lut a theih lo zia a rel.Hi tawk ih “ nan thinlung nan thleng ih “ timi hi “ thleng nan si lo ah cun”( unless you are converted..NKJV) ti sawn in rel seh la.Kan mah te ih thleng aw ding si lo in kanmah hi thleng dingmi cu kan si ih in thlengtu ding a um ih in thlengtu ding cu Amah Pathian sawn a si.Curuangah Amah Pathian in thleng danglammi pawl lawng Vancung Umnak ah an lut ding tinak a si.Mi nun ti danglamtu/thleng danglamtu hi Amah Pathian a si ringring.

Kanmah ten kan danglam lo Pathian in ti danglammi kan si sawn.

4.      Vancung Uknak ah Zo A Tum Bik?

            Vancung Uknak ah zo a lut ding ti a sim ta hnu ah an thusuhmi tak cu a pahnihnak ah a sim.Matt.18:4 Mi tangah a dor ih hi nauhak bangtuk a si mi cu vancung Uknak sungah a tum bikmi a si.Vancung Uknak ih tumbik sinak cu kan sinak ah a thum aw lo ih kan nundan ah a thum aw sawn.Milian,Mifim,Mi farah ... tvp  siseh la cu kan sinak/dinhmun in a ban lo cun tumbik sinak kan nei thei lo tinak a si ding.Asinan tangdornak thu a rel veten mi zokhal in kan co theimi a si.Mifim,milian,mifarah,mi nauta ..khal tangdornak an neih lo ahcun Vancung Uknak ah a tumbik thei lo.Amah Jesuh khal tangdornak thawn hi lei ih a nun bang in Amai keneh thlun ih mi tang ih a dor ih nauhak bangtuk a simi kha Vancung Uknak ih a tumbik cu an si.

            Matt.20:26,27 Asinain nannih lakah cun cu bangtuk cu si hlah seh. Nanmah lakah pakhat khat in mi dang hnakih thupit a duh ahcun midang pawlih hnen-um a ṭuan a ṭul; nanmah lakah pakhat khat in hmaisa bik si a duh a sile nan sal a si hmaisa a ṭul, a ti bangin mahlam tumawk ter hmaisat lam a si dah lo.Tumbik sinak cu leitlun ih kan sinak ah a thum aw lo ih tangdornak ah a thum aw sawn a si.

Tumbik Sinak Cu Tangdornak ah A Um

Cabu ronmi : Hre Kio Commentary Series,Thukam Thar Simfiangnak