ROLNAK KHAWPI PAWL

   Joshua 20:1-9;Mip.35:22-29;Daan.19:5
                  

                                                                                                       
 1.Rolnak khawpi Tulnak

            Rolnak khawpi hi kan theih olnak ding ah cun tulai ih Refuge kan timi kha a si mai ih hman dan lawngte a bang aw ciah lo ti men a si.Refuge ti cu kan tong
vek tluk in kan theih zo mi a si.Rolnak khawpi cu Tumhrimnak um lo ih mi that ngah pang pawl in himnak an ngah thei ih dingih tlanlutnak ding a si.Thlunhlun

san lai ahcun mit ai ah mit,ha ai ah ha,nunnak ai ah nunnak ti rori ih phuba lak awk a rak
si.Rolmak khawpi timi a rak um hlan ah thilsual tuahtu pawl cu thihnak ihsin an luat beisei in Biaktheng Ki an rak pom theu 1 Siang.1:50,51; Suah.21:14.Israel pawl Kanaan ram an luah ding thlang tikah tumhrimnak um lo ih mi a that tu pawl hrang tlanluhnak ding ah Pathian in Joshua kha Rolnak khawpi pawl ret a fial.Hi Rolnak Khawpi ih a tlanlut pawl cu zohman in phulak a thiang nawn lo ih cui khawsungmi khal in thatak ih rak zoh ding a si.Mi zo khal in awlai ten an thlentheinak ding ah Roknak Khawipi cu paruk riro ret a si.Hi Rolnak Khawpi pawl in Jesuh Khrih an rak hmuhsak.Thlunhlun minung pawl cu an himnak dingah hi Rolnak Khawpi pawl ah tlan a tul kan nih hrangah cun kan himnak Lungpi cu Jesuh Khrih a si.

2.Rolnak Khawpi leh Jesuh Khrih

            Rolnak Khawpi pawl hi kan hrangih Jesuh Khrih a sunlawizia rak lang tertu an si ih a hnuailam vek in vun zoh vivo sehla.Rolnak Khawipi pawl cu :

 

1.      Pathian ih dinmi a si.

            Rolnak Khawipi hi mipi in Pathian an dil ruangih rung um a si lo.Mipi hin Pathian an dil lo nan an tul leh ding ti a rak theitu Pathian in a hlan khan ten a rak ruahman cia mi a si.

            Tluksiatnak ruangah leitlun minung pawl cu Pathian mithmuh ah misual hril kan si ih kan covo cu hremhmun mei lipi a si.Cui hremhmun mei lipi ihsin kan luat theinak dingah Pathian a dil thiamtu khal kan um lo.Kan co ding ziang a si tihman thei lo ding tiangin sual sungah a pilral mi kan si.Asinan cui hremhmun ihsin kan luat theinak dingah  kan dil tel riai lo in Pathian cun kan luatnak ding lamzin in tuahsak a si.Curuangah A Fapa neihsun Jesuh in pekmi hi kan hrangah  hremhmun mei lipi ihsin kan luatnak Rolnak khawpi a si.

2.      Mi zo vek hrang khalah a si.

                        Rolnak Khawpi cu Israel pawl hrang lawngah a si lo,mi phun dang,khual  tlawng pawl hrang khah a si.Ramdang mi an ramih khual ra tlawng ih mithat ngah  pang pawl khal hi hmun ah an tlanlut a si ahcun an hrangah himnak thotho a si ih phulak sian a si lo.

                        Jesuh Khrih khal miphun pakhat hrang lawng ah a si lo ih miphun  hmuahhmuah hrangah a si.Judah le Gentile ti thleidan um lo in leitlunmi  hmuahhmuah  hrangah kan luatnak a si.Rolnak Khawpi thawn a bangawk lonak cu Rolnak Khawpi cu mawhneilo ti pang thilthu ih mithat pawl hrangah a si ih Jesuh Khrih cu  Misual,mawhnak ih khat pawl khal kan tlem thluh.

3.      Sangka ( Gate ) on ringring a si.

            Rolnak Khawpi sangka khar dahlo mi cu raltlan mi in thuhla a sim theinak dinghmun sangka kha si.Khawsung ahcun an lut lan hngal thei lo ih khawlutnak sangka kiltu hnen ih thuhla thlen hmaisat a tul,cui thuhla thlen hmaisatnak sangka sawn cun khar a si dah lo.
            Jesuh Khrih khal leitlun misual hrangah a khar aw dahlo.Nang le kei hrangah sangka a ong ringring lai.Zangfahnak caan a liam hlan sung cu a hnen ih ra pawl Jesuh in mi a hnong dah lo.

4.      Zapi theih ih than darh a si.

            Mi zo vek khal hin tumhrim umlo in mi that ngah thei hlir an si ruang ah hi Rolnak Khawpi thuhla cu mi zovek khalih theih dingah a thuhla cun hmun tinkim ah than darh a si.

            Jesuh Khrih ih in rundamnak Thuthangtha khal leitlun khuazakip ah thandarh ding ih thupek kan si.CucuJwsuh Khrih ih thucah netabik a si ih Zumtu pawl ih kan tuanvo thupi bik khal a si.

5.      Hmun langsar ah a um.

            Rolnak Khawpi cu ol ai te ih hmuh le pan theih a si theinak dingah hmun langsar,hlaral khalih hmuh theih mai nak hmun ih ret a si.Cucun thil a tisual pang tu khal in hawl buai tul lo ten ol ai ten a tlan thei a si.

            Jesuh Khrih khal kan hrangih a thihnak a tuar tikah mi zovek khal in an theh- mi misual thihnak thinglamtah a hril a si.Rapthlakbik,tihnung bik,ningzahthlak bik thihnak thinglamrah cu nang leh kei in runtu Jesuh thihnak a si.

6.      A sunglawngah himnak a um.

            Mi pakhat in tumhrim silo in mi that si khal sehla hi Rolnak Khawpi ah tlan lo ih hmundang men ih a um a si len phulak theih ringring a si.Cu ruangah a hrangah cun hi Rolnak Khawpi bak lo cu himnak dang a um lo.

            Jesuh in “ Keimah cu lamzin le Thutak le Nunnak ka si “ a ti.Kumkhawnun kan neih theinak dingah hi lei ah thil dang a um lo Jesuh Khrih pakhat lawng hi kan nunnak um sun a si.

7.      Puithiam sang a thih in luatnak famkim a um.

            Mi thattu kha Rolnak Khawpi leng ih a suah laiah Phulatu in a that a si len a thiang, curuangah Khawsung ih um kha a himnak bik a si.Asinan Cui Rolnak Khawpi ih Puithiam sang a thih a si len mithattu pa cu a khua lam ah a kir sal thei.Puithiam sang thihnak in a thuhla a cemral ter theh a si.Puithiam sang a thih hnu ah cun phulatu in a that a si le phulatu kha mithat ah puh a si thlang.

            Kan ni hrangah cun kan puithiam sang a simi Jesuh Khih thihnak in kan sualmawhnak pawl hmuahhmuah a za ten a phiat fai theh zo ih Pathian hmaika ah mawhneilo le mi thianghlim, kan si zo a si.

3.Rolnak Khawpi Hmin Pawl

          Rolnak Khawpi pawl cu hmun ruk ah ret a si ih,Jordan nisuahnak lam ah pathum,Jordan nitlaknak lamah Pathum ti in ret a si.Cu pawl Cu:

1.      Kedesh

      Kedesh ti cu Thianghlimnak tinak a si.Jesuh Khrih khal nang le kei hrangah kan thianhlimnak a si.A thisen ih kholhfaimi kan si.

2.      Shechem

      Shechem ti cu Liang lole Thilrit phurtu tinak a si.Jesuh Khrih khal kan sual phurrit hmuahhmuah in phurhsak tu a si.

3.      Hebron

      Hebron ti cu pehzom lole pawlkom tinak a si.Tluksiatnak ruangah Pathian thawn thlaraulam ih pehaomnak nein awn lo,Pathian thawn a thenawmi,a hla aw zetmi kan si laiah Jesuh Khrih in thinglamtah parih a thihnak thawn in Pathian thawn pehzomawknak kan nei sal a si.

4.      Bezer

      Bezer ti cu cahnak tinak a si.Zumtu nang le kei in kan cahnak bik cu Jesuh Khrih thotho a si.Paul in “Cahnak in petu Khrih thawngin ziangkim ka ti thei” a ti.

Kanmah ah cahnak a um silo in cahnak neitu Jesuh in cahnak in pe sawn a si.

5.      Ramoth

      Ramoth ti cu Tungding lole cawisang tinak a si.Santlai lo rual pawl in cawisangtu in tungdingtu cu Jesuh a si.Kan sinak hmaisa cu Setan fa,misual,hremhmun tla ding kan si laiah cui dinhmun ihsin Pathian fa ,Mi thianghlim,van khua le ti mi ih in cawisangtu cu Jesuh a si.

6.      Golan

      Golan cu Golah timi ihsin a rami a si thei ih a sullam cu Thawn,Runsuak,Luatnak

Tinak a si.CunGolan ticu Gai timi insin a rami tla a si thei ih a sullam cu Lungawinak tinak a si.Curuangah Jesuh Khrih cu kan luatnak,in runsuaktu le kan nunnak ah Lungawiknak in thlen tu a sinak kha a lang ter.

            Thuthlung hlun hi Jesuh Khrih ih thlam langtertu a si ih Rolnak Khawpi pawl khal in kan hrangah Jesuh hi kan himnak,kan luatnak,kan thianhlimnak,kan cahnak a sizia pawl a thlam hin a rak tarlang zo a si.Curuangah zumtu nang le kei hrangah cun Jesuh Khrih cu kan Rolnak Khawpi a si.

Ref.     The new compact bible dictionary le internet