Pathian Hngak

Saam 37:7 Bawipa ih hmaiah daite’n um aw, Amah ih cangvaihnak cu thinsau in hngak aw;

Tahhla 3:26  Thinsau zetin hngah cu kan hrangah a ṭha bik, Amah ih in runnak hngah cu.

            Mi zo cio khal in mi hi kan hngak dah cio ko ding.Mi hngah hi thil awl lo ngaingai a si ih man hlap caan ah phei cu minute 5 hman reitak a si.Asinan kan
mah ten thil kan tuah thei lo mi a um tik ahcun a tuahtheitu rat ding cu kan hngak hrimhrim a tul theu.Pathian

thu lam khal ah zumtu hi kan manhlap a tul caan a um rualrual in daite ih Pathian kan hngah a tul caan khal voi tampi a si.Samaria mi phar pali pawl kha Siria ralkap pawl an tlan theh tikah an riahbuk ah lut in ti le rawl an nei,thil le ri an la nan an lung a fim tikah cun “Hitiih kan tuahmi hi thildik a si lo. Thuthang ṭha kan nei a si ih kanmah ih hrang lawngah siseh ti ding a si lo. Thaizing tiang kan hngah a sile mawh kan phur tengteng ding. Atu rori ah kan feh pei ih siangpahrang kuthnuai ih bawi pawl kan va sim pei,” tiah an ti aw”( 2 Siangp.7:9 ).Hi dinhmun ah cun khulfun a ngah lo zia kan hmu thei.Zum tu khal hi a caancaan ah cun Khulfung lo ih tuan a tul caan a um.Asinan cu vek ringring khi a si theih lo tikah Kan man hlap zet khal le thinsau ih Pathian kan hngah a tul caan khal a um.Tu ah Pathian Hngak timi thu kan vun zoh vivo ding.

1.Ziangruang ah Pathian Hngah A Tul?

            Pathian hi kan dinhmun le kan tulmi pawl thei theihtu a si ko nan kanmai duh dan le kan duh caan ah a vangvai ringring lo.A mah hin tumtah le duhdan a nei theih ih a mai duhdan bangin in hruai sawn.Kan duhdan a si lo hman ah Zumtu cu kan mah ten kan cangvai thei cuang lo.Kan mah ten kan cangvaih tam a si le buainak le mualphonak a tam a si.

A.    Pathian, hlawhtlinnak hram a si ruangah

            Pathian hi ziangtinkim ah kan hlawhtlinnak hram a si ruangah amah hi kan hngah a tul a si.A tello in kan khawsa thei lo.Bawipai hna khal amah thawn lo cun kan tuan thei cuang lo.Kan tuan hmanah hlawhtlingnak kanhmu thei hrimhrim lo.Jesuh in a dungthlun pawl kha leitlun khua za kip thu thuthangtha sim ding in a fial nan Jesuh van ih a a kaisoh veten an feh hngal lo.amah Jesuh rori in “Jerusalem ihsin khuihmanah feh hlah uh. Ka Pa in laksawng a lo pe ding tiah ka lo sim ciami kha hngak sawn uh” a ti ( Tirh.1:4 ).Hi thu ah a fiangmi cu Minung inkan mai sinak lawngin Pathian hna kan tuan thei lo.Ziang vek mi thiamsang kan si hman ah Pathian hna cu amah Pathian thawn lawngin kan tuan thei a si.

            Pathian thu cu leitlun thu vek a si lo tikah minung thiamnak thawn lawng in a theih lo tihi Paul in tongkam khal in fiang ten kan hmu thei.Mithiam sang zet a si nan Efisa zumtu hnenah hitin thlacam a dil: Cun kei khal thusim dingih ka timtuah awk tikah Pathian in ka sim dingmi thu i pe dingah le ralṭha zetin ka sim ih Thuthang ṭha ih thuthup kha ka phuansuak theinak dingah thla i cam sak ve uh ( Efs.6:19).

B.     Tik cu tinmi a neih ruangah

            A caan ah cun zumtu kan nunnak cio ah hin Pathian hi kan ko rero caan ih a cangvaih lo caan hi a um cio ko ding.Kan kawhnak a thei lo si lo in hngak hrih dingih in duh caan tla a rak um theu.Lazarus a besiat tum khal ah Jesuh an ko nan a ra hngal lo.Kana mopuai ih sabit ti a cem cuahco lai ah a nu in thuhla a sim nan a tikcu a kim hrih lo a ti men.Cu ruangah kanmah lam kan man hlap vio hman ah Pathian hi a rak man hlap lo tla a si thei.Cui caan ah zumtu hin Pathian hngak thei lo in kan rak cang theu tik ah buainak kan tong theu a si.

2.Thinsau Ten Hngak

            Johan cabu sung ih kan hmuh theimi cu Bethsaida timi tili kap ah mi damlo tampi an um.Cui dam lo pawl cun hngahmi an nei ih an ngahmi cu bawipai vancungmi in tili a rung cang ter caan hi a si.Ziangtik ah a cang ter ding ti le theih a si lo tik ah damlo pawl cun thinsau tak ih ngah a tul.Tili cu um khal sehla damnak a tling lo ih Bawipai vancungmi ih ti cang lawngah damnak a um.Cu hman ah a dawp hmaisabik lawng in damnak a co.Cu ti a si tikah dam lo hrangah cun ralring zet le thinsau zet ih hngah a tul tinak a si.Joh.5:3,4

A.    Pathian cangvaihnak

            Joseph hi uktu a si ding thu hi a mang hmang in Pathian in a theih ter.Asinan a nunnak kan zoh tik ah uktu a cang mai lo ih harnak hi a tong ve rero a si.Pathian hi a vuivai dah lo ih dik lo zet ih sual an puh hmanah a thiamthu a rel ve lo.Pathian ih cangvaihnak hi a hngak a si bik.A tik cu a kim a ti tikah cun Pathian in lamzin a sial sak ih tui sun thawngkhal kha thaisun ah uktu ah a cang mai.Mang ih ruangah sal ah zuar a tong nan mang hmang in pathian in a cawisang sal.

            David khal Pathian in Israel siangpahrang dingah hriak a thih ih amah David khal hin Pathian ih hrilmi a si cu fiang ten a thei.Cu mi ih ruangah Pathian in hriak I thih a sisi ti in amah ten siangpahrang tohkham a cuh lo ih Bawipa cawisan a hngak sawn.A kar lak ah hual le dawi a tong rero.Asinan Pathian cun a tikcu a kim a ti ah cun Siangpahrang tohkham ah a to mai.Zumtu  hin Pathian cangvaihnak hngah hi kan nun aha tul nasa.

            Hngak thei lo tu pawl hin buainak an tong theu.1Sam.13:8,13,14 sungah Filistin pawl in Israel pawl an do ih Israel pawl cu a tlan darh theh.Sual siangpahrang cu Gilgal ah puithiam Samuel hngak in a um,a ra thleng mai si lo,a ralkap pawl in le a tlansan rero thlang tikah hngak thei nawn lo in mei ur thawinak a rak pek.Cu theh in Samuel cu a ra thleng.Sual hnenih a timi cu Na uknak in rei a daih lo ding ti a si.A hngak thei lo ruangah a uknak cu rei daih lo in a um.1Sam.13:8,13,14

            Abraham khal Pathian in fapa ka lo pe ding tiin thu a kam.Cop le ciln in Pathian in fa a pek mai lo tik ah hngak thei lo in salnu Hagar thawn an it ih Ismael an nei.Cucun an innsang ah buainak a thlen ter lawng si lo in tuisun ni tiang ah Ismael cithlah pawl hi Israel pawl ti buaitu an an rung cang lanta.

            Israel mipi pawl khal hruaitu Moses khal sinak tlangah ni sawmli le zan sawmli rori a hung um tikah a rung tum sal ding hngak thei nawn lo in Aaron hnenah an feh ih cawlem tiang tuah in an biak tikah Moses a rung thleng ih nikhat thu ah minung thawngthum riro an thih phah a si.Suah.24:18;32:28

         Zumtu kan nunnak ah harsatnak,buainak,zatlaknak,thinbangnak ti pawl kan ton caan ah Bawipa hngak lo in kan rak cangvai hmaisa theu.Hi vek dinhmun kan ton caan ah hin Pathian cangvaihnak hngah hi a tul hleice cuang a si.

B.     Jesui ratsalnak

            Zumtu in thinsau te ih kan hngahmi pakhat cu kan Bawipa Jesuh Khrih ratsal caan a si.James 5:7,8 Cuti a si ruangah u le nau pawl, kan Bawipa a ra kir sal hlan tiang thinsaute in um uh. Lothlo pa khi ruathnik uh! A lo in thlairawl man nei a suah hlanlo thinsaute in a hngak a si. Ṭoruah le fur ruah rat ding khi thinsau in a hngak. Cubangtuk in nannih khal thinsau in um uh. Nan ruahsannak cu khohter uh. Ziangah tile Bawipa a ra thlennak ni a nai zo.

            2 Pet.3:9Bawipa cu a thukammi kimter dingah a khul a fung a si tiah mihrek in ruat hman haisehla, a khul a fung a si lo. Nan parah thinsaunak a neih ruangah a si sawn; ziangah tile pakhatte hman siatralnak tong lotein mi hmuahhmuah an sualnak ihsin an kir sal theinak ding a duh ruangah a si.Kan Bawipa Jesuh ratsal ding caan hi fiangten a theitu kan um lo a sin an a rasal ding ti cu fiangzet in kan thei.A thukam a pelh dah lo.Tu ah zumtu pawl in a ratsal caan hi hngakhlap zet in kan thlir nan ziangtik ah ti kan theih lo ruangah thinsau ten hngak ding kan si.

            Zumtu pawl kan nunnak ah manhlap a tul caan ah manhlap ih hngak a tul caan ah Pathian hngak thiamtu le hngak theitu kan si vivo theinak dingah Pathian in siartui’ nun ah thleng hram seh.