JERUSALEM IHSIN ZIRNAK ( EZK.16:1-27)

           
           Jerusalem hi kan theih lar zetmi khawpi a si ih Ezk.16 sungah Jerusalem thuhla hi minung dinhmun vek in Pathian in a relnak kan hmu thei.Cumi ah tampi kan nunnak hrangah zir ding tampi a um.

1.Suahkeh Dinhmun

            Maw Jerusalem, Kanaan ramah a suakmi na si. Na pa cu Amor mi a si ih na nu cu Hit mi  a si ( Ezk.16:3).

            Jerusalem hi a suahkehnak kan zoh a sile Pathian ta a si cia lo ti kan hmu thei.Ziangah ti a si le “Na pa cu Amor mi a si ih na nu cu Hit mi  a si” a ti tik ah Hitmi le Amor mi cu Israel pawl in hlawhhlang phun
le milem be phun ih an ruahmi a si.Cun cang 4,5 ah a dinhmun siat zia kan hmu thei:

1.      Na suah laiah zohman in na laihri an lo tan lo

2.      zohman in an lo kholh lo

3.      ci thawn khal an lo hnawt lo

4.      puan khal in an lo tuam lo

5.      Zohman na parah zaangfahnak nei in hi bangtuk ih a lo tuahsaktu an um lo

6.      Na suah laiah duhtu khal na nei lo

7.      Hramlakih hlon menmi na si.

            Hihi Jerusalem ih hramthoknak a si.Leidan tak ih kan zoh tik ah hi tluk ih dinhmun sia ih ding hi an um kei maw ti ding khop ih rak um a si.Porhawknak ding,hmaihngalnak ding,Uanawknak ding le duhawknak ding pakhat te hman a um lo lawlaw a si.

            Hi dinhmun hi kan nikhal Pathian hmai ih kan dinhmun a si ve.Tluksiatnak ruangah Pathian hmaiah rul cithlah,laktlak lo,fihnungza kan si ih Pathian ih haheuh tlak ding sinak  kan mah ah pakhat te hman a um lo.Jerusalem a suahnak thu ah a hmabak cu thih ding lawng hi a si vekin kan ni khal hremhmun thihnak hi kan hmabak a si.

2.Pathian Zangfahnak le Runnak ( Ezk.16:6 )

            Cule na kiangin ka feh tikah na thisen lakih na taal rero kha ka lo hmu. Thisen in a lo tuam ṭheh, a sinain na thih ding cu ka lo siang lo.

            Pathian cun cui naute thisenlak ih tal,thimai ding a hmuh tikah um men thei lo ih ‘na thih ding cu ka lo siang lo “tiin a runsuak.Ziangruangah a runsuak? Naute kha a mawituk,a thatuk,a duhnungtuk,…tvp  ruangah a si lo.Pathian in a runnak san cu a zangfahnak liolio ruangah a si.Naute cun a luatnak ding hrangah zangfah dil le ngennak cang hman a thiam hrih lo nan zangfahtui zangfahnak cun thih ding siang lo ten a runsauka si.

            Kan ni khal tluksiatnak ruangah thi dingmi kan si lai ah kan dil le ngenkhal tello in Pathian cun a zangfahnak liolio in in rundam a si.Kanmah lam ah duhtlak,haheuh tlak sianak kan neih ruangah in duh khal a si lo.A zangfahnak ruang lawng rori ih rundam kan si ruangah   Kan mah lamah suan ding tlak sinak pakhat te hman kan nei lo,Bawipai’ zangfahnak lawng hi kan suan ding um sun cu a si.

3.Thit umnak Thukam ( Ezk.16:8 )

            Jerusalem cu Pathian in a runsuak lawng si llo in tu ah Amah thawn thit umnak thukam a tuah.Kan ni khal Pathian in a fapa Jesuh hmangin  in rundam lawng ah a duh tawk lo Jesui’ nupi si dingah ham cia mi kan si.Ham ciami kan si ruangah midang thawn hnawihnih awk hi a cang thei nawn lo.

4.Pathian ih Ngaihsaknak ( Ezk.16:9-14 )

            Pathian in Jerusalem hi a runsuahnak lawng ah a duh tawk lo ih nitin a tulmi thuil ziangkim ah Pathian in tuanvo a lak zia cu a hnuailam bang in kan hmu thei:

1.      Tidai ka lak ih na thi cu ka lo hnawtfai sak

2.      Na vun cu olif hriak in ka culh

3.      Ṭelhmi puan in ka lo thuam

4.      Saphaw ṭha bik ih tuahmi kedam ka lo pek

5.      lu tuamnak puan paate le pu angkifual ka lo pek

6.      Nunau hlawnthil faute le ṭhi pawl ka lo leih

7.      Hnarkhaih, hnakhaih pawl le suilukhuh mawizet ka lo pek

8.      Sui le ngun hlawnthil na nei

9.      puanṭelh le pu hnipuan na hruk ringring

10.  Maida ṭha bik in tuahmi sang na ei ih khuaitizu le olif hriak na ei

Cang 14 Soisel ding um lo ih na mawi ruangah ramkipah na hmin a thang; hitluk duhnungza ih a lo tuahtu cu keimah ka si,” a ti.

Jerusalem  hi a suahkeh ah cun dinhmun niambik ih ding a sin an Bawipai ngaihsaknak ruangah tu ah cun soi ding um lo khop ih mawi le ram kip hmin thang dinhmun ah a cang a si.A suah keh dinhmun le tu ih a dinhmun tahthim ahcun lei le van tluk in a tan aw.Jerusalem hin Pathian lo hi cu suan ding a va nei lo em.

            Pathian in in rundam lawngin a duh tawk lo ih a rundammi pawl hi kan lei nitin nun ih kan tulmi thil ziangkim ah in ngaihsak a si.Pathian hi in rundamtu lawng a si lo ih ziangkim in pe,in ngaihsaktu a si.Tu ih kan dinhmun ih kan din thei hi Pathian ruangah a si.Pathian siarlo suan ding dang hi kan nei ve lo nasa.

5.Jerusalem tluknak ( Ezk.16:15-27 )

            Jerusalem cu ram kip ih a hmin a than tikah ziang tin a um? Sikhalsehla na mawinak le na hminthannak cu zum awknak ah na hmang ih na hnenih a rami hmuahhmuah thawn na it vivo, a ti.Jerusalem cun Amah ngaihsaktu le cawisangtu Pathian cu dungtun in hlawhhlang hna a tuan ta a si.Pathian thlawsuah a dommi cu Pathian pialsannak ah a cang.Bawipa a thinna lutuk in ziang tin a tong?Ezk.16:22 Hlawhhlang ṭuan in fihnungza ih na nun rero lai sungah hin na sentet lai ih taklawngte in na thisen lakih na rak taal rero kha na vun ruat dah maw?” tiah a ti. Minung hi Bawipa thlawsuahnak thawnin dinhmin sang ih kan thlen tikah kan rak thok peknak dinhmun niamte hi hngilh tahrat in Pathian pialsan hi awl te a si.

            Zumtu kan nunnak hi ralrin a tul nasa.A caan ah cun Pathian hnenah kan duhmi,tulmi pawl kan dil ih Pathian in hlawhtlinnak in pek tikah Amah phatsannak ah kan hmang theu.Kan Pathian ziangtluk in ningna hen maw!Pathian hnen ihsin kan donmi pawl hi ziang ti vek in kan hmang ti hi kan nunnak ah zohsal awk a va tul ve.

6.Pathian Hremnak ( Ezk.16:27 )

            Atu-ah nangmah hrem dingah le na covo leiram thlawsuah lakkir dingah ka kut ka hawi zo. Nangmah a lo huatu le na nunsual ruangih a lo mitkemtu Filistin mi pawlih kut sungah ka lo pe zo.Jerusalem in hi tluk in Pathian a phatsan tikah Pathian khal daiten a um ve lo.Hrem dingah le a covo pawl lakir dingah a kut a hawi ve a si.

            Zumtu pawl in Pathian hi thlawsuah petu a sinak hi  kan thei zet ko nan lakir sal theitu a sinak hi kan thei lo theu.Pathian hnen ihsin kan donmi pawl hi Amah phatsannak ih kan hman tikah Pathian cu in pekciami pawl la kirsaltu ah a cang tihi kan cinken a tul nasa.Pathian cun zianghmanlo dinhmun ihsin in khaisang thei bangtuk in dinhmun sang khalin in hlon thla thei a si.Zumtu kan nun hi duhdah tak men ih hman a ngah lo,Pathian mitheih kan si ih a thiikmi kan si tikah khawvel mi bangtuk ih nun ding hi cu a cang thei nawn lo.Bawipa runmi,Bawipa ta,Bawipa hrang kan si tihi kan nunnak in fehpi vivo a tul.

            Hi Jerusalem thuhla hi Zumtu kan nunnak hrangah ralrinnak in petu a si ih Pathian hnen ihsin kan pial ve lo nak dingah kan nunnak ah Pathian in a thar in thlawsuah hram seh.