PATHIAN A RALRING RINGRING

Pathian in hi tlangval pali cu fimnak, calai lam thiamnak le theihthiamnak a pek. Cuih tlunah Pathian in Daniel cu mang leh theinak le langnak pawl simfiang theinak a pek.Dan.1:17

            Zumtu Pathian mi le fate pawl kan vanneihnak emem cu kan tuahmi pakhat te hman hrelh loih in theihsak tu Pathian kan neih hi a si.
Khuitawk hmun kan thleng le ziangvek kan tuah khal
ah kan Pathian mit cu a mi le fate pawl ih parah a um a ringring.Pathian ih in ngaihsak zia theitu nunah cun hnangam thlak taktak a si.Kan thupi bang in Pathian kan hrangih a ralrin ringring zia kan zoh ding ih Bible kan siar a si len rel ding tampi a um.Asinan tuitum ahcun Pathian mi le fate in Amah kan tihzahnak ruangih tlansanmi le tuahmi kan neihmi parah kan Parhian a um men lo zia le an kan hrangih thiltha a tuah zia kan zoh tlang ding.

            Pathian hi a parih kan that caan lawng ah a tha  a si lo ih a hrangih thatnak zianghmankan neihlo lai khal ah Pathian cu kan hrangah a tha ih,a hrang thiltha kan tuahmi kan neih lawngah kan parah thiltha a tuah ve a si lo.A hrang thiltha kan tuah lo caankhal ah Pathian cun kan hrangah thiltha tampi a tuah thotho.Tuitum ih kan rel duhmi cu Amah tihzahnak neih ih thiltha a tuahtu par sinsin ah cun ziangtluk in kan Pathian in thlitha a tuah ve timi lam kha Daniel le a rualpi pawl nunnak ihsin kan zoh ding.

1.      Siangpahrang Pekmi Rawl An Ei Lo ( Daniel 1:8-10 )

            Daniel te rualvah pawl hi Babilon ih an um lai ah Siangpahrang in an ei le in ding hi tha ten a ngaihtuah sak thluh.An mah tuamhlawmtu Ashpenaz in cu ti le rawl cu a rak ken tiah an nih in kan ei lo ding kan hrangah cun thlairah,thlaihnah le tidai thiang in pe aw tiah an dil.
A voikhatnak siangpahrang ih  thu an elnak a si.Khai ti le rawl kha an ei thei zawng a si lo ih an hriselnak thawn a kaih awk lo ruangih ei duhlo khal a si lo.An ei lo nak san bik cu Pathian a tihzahnak ruangih ei lo an si.Siangpahrang ih pekmi ti le rawl thawthaw,thatha ei ih a thu thlun hnak in Pathian tinzahnak thawn thlaihnah,thlairah ei ih Siangpahrang ih thu dokhal an hril sawn. Siangpahrang ih thu hi an dokalh duh hrimhrim cu a si lo,kan theihtulzetmi pakhat cu Pathian thu thawn an kaih aw lo mi ahcun siangpahrang thu an el ngam sawn tihi a si.

            Pathian an tinzah ruangah ti rawl thawthaw cu an hrial ih cuti asilen cui an thiltuahmi hi a lak in a cem men maw? Naisai lo,Pathian in an hrangah ziangthil a tuah ve kan ti asilen a tlun ih Bible cang kan tarlan bangin Pathian in hi tlangval pali cu fimnak, calai lam thiamnak le theihthiamnak a pek. Cuih tlunah Pathian in Daniel cu mang leh theinak le langnak pawl simfiang theinak a pek ti kan hmu thei.An suahkeh ihsin an neih cia lo mi fimnak,calai lam thiamnak,theihthiamnak pawl a pek a si.Hi Pathian ih pekmi pawl a tak ih anhman tangkai zia khal kan hmu thei.Daniel 1:20 ah Siangpahrang in ziangvek thu a suh ih, ziangvek thuharsa a suahter hmanah hi tlangval pali cun a ram ukmi sungih kut ṭ ial zohthiam le mitkher thiam pawl hnakin a lethra in an thei thei deuh ti kan hmu thei.Cun Daniel in Siangpahrang ih mang le a sullam khal a sim theih ih a mithmai tha an co vivo.

Pathian tihzah ih an tuah mi    : Siangpahrang thu el in a ti le rawl timlammi an ei lo.

Pathian in a tuahsakmi            : Fimnak,Calai lam thiamnak,theithiamnak,mang le langnak                                         pawl lehtheinak a pek

2.      Milem Hmai Ah an Kun Lo ( Daniel 3:12 )

            Siangpahrang Nebuchanezar cun a milem tuahmi apnak ni ah a kuthnuai hnatuan pawl hmuahhmuah cu milem hmai ih kum dingih thu a suah lai ah Daniel rualpi pathum pawl cu an kum ve lo.a voihnihnak siangpahrang thu an elnak a si.Siangpahrang pa an huat ruangih a thu an el a si lo ih Milem nan be lo ding titu Pathian an tihzah ruangah el a tul ih an elnak a si.Siangpahrang thinheng khal an tihlo,caan a pek sal khal an kan kun duh cuang lo.Misa ih mi a kang natdah khal an thei tuk ko nan Pathian tihzahnak ruangah an parih ziangvek thil thleng ding khal an huam sawn a si.Siangpahrang hnenah ziangtin an ti? Meisa alh sungin in hum theitu Pathian a um a si ahcun kan biakmi le kan rianmi kan Pathian lawnglawng a si ih amah cun na cahnak huham sung khal in in hum ko ding. In hum lo a va si hmanah, siangpahrang bawipa, na khawzing pawl cu kan bia lo ding ih na sui milem tuahmi hmai khalah kan kun lo ding, ti cu in theihsak cia aw,” tiah an ti.

            Cui tluk ih thil tihnung hman huam ih Pathian an tihzahnak an langternak ah Pathian daiten a um maw kan ti a si len daiten a um men lo a katcak nasa tak in an parah a lang ter a si.Siangpahrang cun a thusuah bangin meipi a let sarih ih sattermi ah a thlak hai.Asianan Daniel rualpi pathum hrangah cun cui meipi cu an thihnak ah cang lo in Pathian in a humhim zia langtertu ah a cang.Lei dan ih thilcang thei lo tiangin an hnenah Pathian a phuang aw a si.Minung Pathum an sin an mi pali ah an cang ih a palinak tla cu pathian Fapa a bang tiah Siangpahrang in a ti.Pathian in an nunnak a hum men lawng hman si lo in an hnatuan a kar ter ih a kut hnuaipawl Pathian upat lo ih a tong tu cu siatsuah theh ding in thu a suah bet a si.

Pathian tihzah ih an tuahmi     : Milem hmaiah an kun lo.

Pathian in a suahsakmi            : Meipi in a hum,Fapa hmel a lang,An hnatuan a kai ter.

3.      Daniel Thla A Cam ( Daniel 6: 10 )

            Darias Siangpahrang a si hnuah Daniel cu mifel le a hnatuah a that cuang ruangah Siangpahrang in a ram pumpi uktu an a tuah ih cimi cu a hnatuanpi pahnih inan halhsik tuk ih Daniel phiarnak ding hrangah Siangpahrang thu thu an hi vek in an forhfial:6: ⁷Na ram pumpi uktu bawi pawl, hotu pawl, ramṭhen uktu bawi pawl, ramṭhen uktu bawi bawmtu pawl le bawi dangdang kan zatein thinlung khati’n thil pakhat kan lo dil. Thu pe awla na thupekmi vekih an thlun ṭhehnak dingah ngaihtuah aw. Ni sawmthum sungah zohman in siangpahrang bawipa nangmah hnen siarlo ziangvek khawzing le zovek milai hnen hmanah thlacammi le ngenmi nei hlah haiseh. Hi thupekmi a thlun lotu cu kiosa khumnak sungah hlon haiseh. ⁸Siangpahrang bawipa nangmah in hi thu hi suah awla na hmin khen aw. Cule mi hmuahhmuah ih thlun ṭheh dingin ngaihtuah aw; zohmanih thleng thei lomi Media mi le Persia mi pawlih daan suahmi ah cang seh,” tiah an ti.Saingpahrangin Daniel an phiarduhnak ruangah a si ti a thei lo ih a rak lungkimpi.Daniel cun cui thu a theih tikah a tuah theu vek in a inn tlunta khaan sangkate ong in Jerusalem lam hoi in nikhat ah voi thum thla a cam thotho.Saingpahrang thu el voi thumnak a si.Daniel hi mi fel ngaingai a si ih Siangpahrang duhzawng ten ummi a si ko nan hi tum ah cun a thu a el.Ziangruangah ah kan ti asilen Pathian a tihzahnak ruangah a si.Kiosa thawninn tihnun zia thei cingin Pathian a tihzahnak a langter ih Siangpahrang thu a el a si.Siangpahrang run Daniel a duhtuk ruangah a luat thei nak ding lamzin sunvu ten a hawl nan a hmu lo.

            Pathian in Amah tihzahtu  a daithlan lo zia hi Daniel nunnak ah cop le cilh in a tak rori in a rung lang ve.Siangpahrang cun a thusuah zo vekin Daniel cu Kiosa khumnak sungah cun an thlak.Asinan Kiosa pawl tuahtu Pathian cun Daniel cu a nunnak a humhim ih kiosa pawl in ziangti hkan in a siatsuah lo,a va sunglawi em.A thaizing thlapit ah Siangpahrang cu Kiosa khumnak ah cun a feh ih Daniel cu himdam ten a um kha a hmuh tikah a lungawi tuk ih a mah phiartu pawl kha an innsang in a thlak hai ih lei hman an thlen hlan ah kiosa pawl cun an rak bpot thlek thluh.daniel thihnak in ih a ruahmanmi cu an mai thihnak ah a cang.Culawng si lo in Siangfpahrang  Darias cun mi phunkip, hnamkip le ṭongkip a ṭongtu leitlun mi hmuahhmuah hnenah ca a ngan ih a ramsung mi hmuahhmuah in Daniel ih Pathian cu upat ding le ṭih dingah thu a pek.Cun Daniel cu neinung zet ih a nun thu kan kan hmu thei a si.Dan.6:28

Pathian tinzah in a tuah mi      : Nikhat ah voi thum thla a cam

Pathian in a tuah ve mi            : Kiosa lak in a hum,Amah phiartu a thahsak,Siangpahrangin                                                   a rammipawl Pathian upat tihzahnak pek a fial,mi neinung a                                                si ter.

            Zumtu nu le pa,u le nau kan that lo lai khal ah Pathian in kan hrangah ziangtluk in thil tha a tuah ti cu kan thei theh.Cumi tlun ah zumtu in amah kan tihzah ruangih kan tuahmi parah kan Pathian cun thiltha tuah lo ih a um lo zia Daniel le a rualpi pawl nunnak in kan hmu fiang thei nasa a si.Pathian ruangih thiltha kan tuah mi parah kan Pathian cun a tuahtu pawl parih thiltha tampi tuah ding ah a ral ringring a si.Thil kan tuahmi hi ziangruangah kan tuah?Bawipa kan tihzahnak ruangah si hramseh,a lak in a ziam ral men lo a si.

Pathian cu a ralring ringring,Amai ruangih thiltha tuahtu pawl parah Amen.