NUNAU MIPATNAK THUHLA

1 Kor.7:2Asinain nupa sualnak a tam ruangah mipa in amah ih nupi lawng nei sehla, nunau khal in amah ih pasal lawng nei seh.

            Nunau mipatnak thuhla hi Bible sungah tampi  kan thei.Kan leilung feh dan kan zoh nunau mipatnak hi hmun tamtak ah a zalen zawng  kan hmang vivo.
Nunau mipatnak hman hi a nunau lungkimnak le mipa lungkimnak ih hman a si ah tla cun nupa sualnak tin ruat nawn lo in nupa nomnak ti tla
in mi then khat cun an ti.Nunau le nunau,mipa le mipa neihawknak khal a tam vivo.Bible sungah teh ziang tin kan hmu thei timi a tawi zawng in kan zoh pei.

            Bible sungah hin :

·         Tangtawm sualnak ( Uire ) ti le

·         Nupa sualnak   ti in phunhnih in kan hmu thei.

                         Heb.13:4 Nupa sualnak a tuahtu le ṭang ṭawm sualnak a tuahtu pawl cu………..

            Tangtawm sualnak timi cu mi nupi/pasal thawn nunau mipatnak hman khi a si ih nupa sualnak timi cu neihawknak lenglam ih nunau mipatnak ( sex ) hman  khi a si.Tu ah Thuthlung Hlun le Thuthlung Thar ih a lang dank an zoh sehla.

1.      Thuthlung Hlun in a lang Dan

            Thuthlung Hlun ih kan thumawknak ding ah cun Puit.20:11-21 sung ta lawng hi si sehla.Hi sungah tawkfang nawn cipciar in a lang ih cu pawl cu:

a.       Midang nupi thawn a sualtu cu –....................... An pahnih in thah ding  Lev.20:10

b.      A pa ih nupi thawn a sualtu  cu -....................... An pahnih in that ding Lev.20:11

c.       Pafa ih nupi thawn a sualtu cu -........................ An pahnih in that ding Lev.20:12

d.      Mipa le mipa an pawl awk tikah -.................... An pahnih in that ding Lev.20:13

e.       Mi pakhat in nupi le a nupi nu a thit a si le ....... An pathum in that ding Lev.20:14

f.       Mipa in tilva a pawl a si le -............................. An pahnih in that ding Lev.20:15

g.      Nunau cu tilva thawn an pawl aw a si le -........ An pahnih in that ding Lev.20:16

h.      Mi pakhat in a farnu a sualpi a si le –............... A mah cu dawi ding. Lev.20:17

i.        Mi pakhat in nunau dan neih lai a pawl a si le – An pahnih in dawi ding. Lev.20:18

j.        Mi pakhat in a ni a sualpi a si le –.................. An pahnih in hrem ding Lev.20:19

k.      Mi pakhat in a paseu ih nupi a sualpi a si le - An pahnih in hrem ding Lev.20:20

l.        Mi pakhat in a unau ih nupi a thit a si le –..... Rocotu fa nei lawn a thi ding. Lev.20:21

            Thuthlung Hlun ah hin Pathian in nunau mipatnak hman duhdah ruangih hremnak nasa zet a peknak hi kan hmu thei.Cucu Noah san minung pawl le Sadom le Gomorah mi pawl an si.

2.      Thuthlung Thar ih a lang dan.

Thuthlung Thar ah cun hmun dangdang in ih kan hmuhmi pawl kan la khawm ding.

a.       “ Nupa sualnak a tuahtu le ṭang ṭawm sualnak a tuahtu pawl cu thu ṭhennak an tong ding” Heb.13:4 ( Thuthennak an tong ding/Pathian in a hlah men lo ding.)

b.      “Nu le pa sualnak kha hrial uh…….. nu le pa sualnak a tuahtu cun amah ih taksa par hrimhrim ah sualnak a tuah a si”. 1 Kor.6:18 ( Mai parih sualnak tuah a si.)

c.       “Pathian in nannih cu nupa sualnak tuah hrimhrim loin thianghlim dingah a lo duh……… Pathian thei lo khawvel mi bangin taksa hiarnak thlun in nung hlah uh.”   1 Thes.4:3,5 ( Pathian thei lo pawl um dan a si.)

d.      “Nan sungih hna a ṭuantu leilung pumsa duhnak: nupa sualnak le zoh mawi lo nuncan, taksa hiarnak le hurnak le hamṭamnak pawl tla cu nunter nawn hlah uh.”Kol.3:5  ( Pumsa duhnak a si)

e.       Nanmah le nanmah bum aw rero hlah uh: nupa sualnak a tuahtu,….. ṭaangṭawm sualnak a tuahtu, mipa hlawhhlang ṭuantu, nunau le nunau, mipa le mipa sualnak a tuahtu,….. cubangtuk pawl cu Pathian Uknak an co thei lo ding.1 Kor.6:9,10

(Pathian uknak co ban lo pawl )

3.      Ralrin Peknak

·         Luk.17:27-29 Milai fapa a rung lang tikah cun Noah le Sadom san lai vek a si ding.

·         Juda 1:7 Cuih vancungmi vek thothoin Sodom le Gomorrah khua le a kiangkap khua pawl in nupa sualnak an tuah ih an tisa hiarnak an riamter ti kha hngilh hlah uh: annih pawlih kumkhua meisa ih hremnak an tuarmi kha mi hmuahhmuah hrangah ralrin peknak a si ti a fiang a si.

Nunau mipatnak thuhla  Thuthlung Hlun le Thuthlung Thar ihsin a tawi zawng in tarlan a si zo ih a netnak ih kan hngatawknak ding Bible cang pakhat pakhat ka tarlang ta ding. 1 Kor.7:2 Asinain nupa sualnak a tam ruangah mipa in amah ih nupi lawng nei sehla, nunau khal in amah ih pasal lawng nei seh. Hi thu in in zir duhmi cu mah nupi/pasal par lawng ih hman ding a si ti a lang ter.Ziangah ti a si le “Asinain nupa sualnak a tam ruangah” a ti mi hin a fiang ter nasa.Curuangah pahnih lungkimnak um khal sehla neihawknak lenglam thil a si ah cun nunaumipatnak hman hi Sual a si.

Neihawknak leng ih hmanmi hmuahhmuah cu SUAL a si.