Jesuh Thawngin Sunlawinak

Bawipa in"Maw Bethlehem Efratah,nang cu Judah peng ah khawfate bik pakhat nan si na'n na sungin Israel uktu ka suak ter ding. Mikah 5:2 

Leitlun tahnak ah thilsunglawi,thil ropi tampi sim le rel ding tampi an um ko.Asinan tu ih thangzang kan lak tlannak ding cu zianghman lo din hmun ihsin sunlawinak neitu pawl an si.Cu pawl cu Jesuh thawng ih sunlawinak hun nei pawl an si.

1.BETHLEHEM

Bethlehem khua hi thuthlunghlum ihsin khawte pakhat men a si zia kan hmu thei.Asinan a va sunglawi ve hun ti ciamco ding a si lem lo.Mikah 5:2 ih a rak sim cia bangin Jesuh cu Bethlehem khaw te ah a suak.(Mat.2:8-12)

A sungih sin Jesuh a suah tikah Bethlehem khua cun tui hlan hnak ih ngaihsak a hlawh nasa.Nisuahnak lam mifim pawl le Siangpahrang Herod cun Bethlehem lamah an thinlung a hawi hngal.Cu lawng silo in tu ah "Bethlehem" hun ti ah cun kaaan thinlung ah Jesuh a lang hngal.A sung ihsin Jesuh hi suak lo sehla hi tluk lawmmam in Bethlehem hin mi theih a hlawh lo ding.Tu ah cun leitlun san a cem hlan tiang Bethlehem hi a hmin a cuai nawn lo ding.

2.Mary

Bible sungah Mary hmin pu hi an um hnuaihni ko nan Jesuh hringtu Mary tluk ih kan sunsak mi an um ti sehla a sual tuk lemlo ding.A hleice in RC pawl hin kan nih hnak in a sunloih cuang.Mary hi fala pakhat men a si ko,amah ah midang hnak ih hleicetnak a nei ciamco lo.Asinan a sung ihsin Jesuh a suah tikah leitlun ih nu sunglawibik ah a cang a si.Mary hin Jesuh hring lo sehla tuisun ih a sunlawi tluk cun a sunglawi lo ding.

3.Laak note

Jerusalem ih Jesuh a feh tikah zo hman ih to dahlo mi laak note kha Jesuh in a hmang.Cu tikah a fehnak ding lamzin parah mipi in an paun le sawlhnah an phah.Bible sungah hin hi laak note pakhat lawnghi a fehnak ding ih puan an phahsak umsun a si.Ziangah hi tluk lawmmam ih an sunloih ti le a parih Jesuh a to ruangah a si.

4.Kalvary Tlang

Jesuh thihnak hi Bible ih kan hmuh dan ahcun Golgotha,Luruh hmun tihi kan hmuh dan a si.Asinan a tlanghmin Kalvary ti ih kan hman sawn ruangah Kalvary tin kan ti mai ding.Kalvary tlang hi misual thahnak hmun,tihnungza hmun a si.Cu vek hmun cu hmun sunglawi si lo in raptlakza hmun a si.Sunlawinak nei lo Kalvary tlang ah Jesuh a thih tikah raptlakza tlang cu tuisunah tlang sunglawi zet ah a cang.Jesuh thi lo sehla "Kalvary" tuksumza a si,tu ah cunJesuh a thih ruangah "Kalvary" hunti cun nang le kei luatnak tlang sunglawi zia kan thinlung ah a lang.Leitlun tlang hmuahhmuah ah Kalvary tlang cu nang le kei hrangah a sunglawi bik.Khristian kan sinak ah Kalvary tlang cu thlauthlak theih lo khop ih poimawhnak neitu tlang sunglawi a si.

Hi kan tarlangmi pali ih sunlawinak cu Jesuh a si.Curuangah a sunglawinak cotu si lo in sunglawi tertu Jesuh sawn kan thangthah kei uh.Lei dan ih zianghman lo te hi Jesuh ruangah thil sunglawizet ah an cang thei.Unau zohman va hmuhsuam hlah,zianghman lo ih kan ruahmi hi mi sungawitak ah an suak thei.Fimthiamnak zianghman kan na neih lo khal le beidong hlah Jesuh thawngin mi sunglawi kan si thei thluh.Sunlawinak neitu cu Pathian a si ti hi thei ringring cio uh si.